Ples Matmat i Narapela Kain
WANPELA MAN LONG EKWADO I RAITIM DISPELA STORI BILONG KIRAP!
LONG taun Ibara, long hap not bilong biktaun bilong Ekwado, em Kito, i gat wanpela ples matmat i narapela kain—el cementerio de los pobres (Ples Matmat Bilong Ol Rabisman). Wanem samting i mekim na em i narapela kain? Ol piksa ol i droim long ausait bilong banis ol i bin kisim long ol buk bilong Sosaiti Was Taua na wokim i go bikpela!a Piksa i stap namel em i makim aposel Jon—ol i bin kisim dispela piksa long pes 7 bilong buk Kamapim Tok Hait—Bikpela Samting Bilong En i Laik Kamap! Antap long piksa bilong Jon, ol i raitim long tok ples Spen dispela tok: “Kingdom bilong God i makim stretpela pasin na bel isi na amamas. Rom 14:17.” Long han kais bilong piksa i gat tok bilong Matyu 11:28: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.” Yumi ken save dispela banis bilong ples matmat i stiaim ol man i go long Tok Bilong God.
[Futnot]
a Bilong inapim lo, pastaim ol man i mas kisim tok orait bambai ol i ken raitim gen ol stori o wokim gen ol piksa bilong ol buk samting bilong Sosaiti Was Taua, na ol i mas kamapim olsem ol i bin kisim stori o piksa long Sosaiti Was Taua bilong Pensilvenia.