Baibel i Tok Wanem?

Yu Ken Mekim Wanem Taim Bel Hevi i Daunim Yu Olgeta?

EM PASIN bilong yumi olgeta man long kisim bel hevi long sampela taim. Tasol long sampela man, hevi i daunim ol olgeta na ol i kisim tingting olsem ol i laik dai, olsem dai i winim pasin bilong stap laip.

Tok i stap long Baibel i helpim yumi long save olsem ol man i stap gut long God ol i no inap abrusim ol hevi, na pasin bilong karim ol hevi inap daunim ol sampela taim. Tingim Elaija na Jop, tupela wantaim i bin pas gut wantaim God. Taim Elaija i ranawe bilong abrusim birua i laik painim em long han bilong Kwin nogut Jesebel, em i tokim Jehova: “Nau mi laik bai yu larim mi i dai.” (1 King 19:​1-4) Ol hevi i bin painim stretpela man Jop klostu klostu, na sampela bilong ol dispela hevi i olsem, wanpela sik nogut i kisim em, na 10-pela pikinini bilong em i dai. (Jop 1:​13-19; 2:​7, 8) Ol hevi i daunim em olgeta na dispela i kirapim em long tok olsem: “Mi laik dai, dispela bai winim pasin bilong karim ol pen na hevi bilong mi.” (Jop 7:​15, The New English Bible) Tru tumas, pasin bilong tingting planti long ol hevi, em i kamap strong tru long dispela tupela man bilong God.

Bel hevi bilong daunim man olgeta i save painim sampela man long nau, ating hevi bilong go lapun i mekim, o poroman marit bilong ol i dai, o ol i gat bikpela hevi long mani samting. Na long sampela man, hevi bilong olgeta de i no save slek liklik, o samting nogut tru i bin painim ol na ol i pilim yet hevi bilong dispela samting, o ol i gat ol hevi i stap long famili na ol i pilim olsem ol i stap long solwara na biksi i pasim ol long go kamap long nambis. Wanpela man i bin tok: “Bai yu pilim olsem yu nogut tasol​—⁠olsem sapos yu no stap moa bai i no gat man i tingting planti long dispela samting. Sampela taim bai yu pilim olsem yu no inap karim hevi bilong i stap wanpis moa.”

Sampela taim senis i kamap na hevi i no bikpela moa, na i olsem yu kisim malolo. Tasol olsem wanem sapos i no gat senis i kamap na hevi bilong yu i stap wankain tasol? Olsem wanem tok bilong Baibel i ken helpim yumi long sanap strong taim hevi i laik daunim yumi olgeta?

Tok Bilong Baibel Inap Helpim Yumi

Jehova i gat strong bilong inapim Elaija na Jop long karim ol hevi bilong ol. (1 King 19:​10-12; Jop 42:​1-6) Dispela i save strongim bel bilong yumi long nau! Baibel i tok olsem: “God em i ples hait bilong yumi, na em i save strongim yumi oltaim. Em i stap klostu na i redi long helpim yumi long taim bilong bikpela hevi.” (Song 46:1; 55:22) Maski yumi pilim olsem ol hevi i wok long daunim yumi olgeta, Jehova i tok promis pinis long mekim wok long bikpela strong bilong em long was gut long yumi. (Aisaia 41:10) Bai yumi mekim wanem bilong kisim dispela helpim long em?

Tok i stap long Baibel i kamapim klia olsem long rot bilong beten God “bai i mekim [yumi] i stap bel isi tru, na long dispela pasin [yumi] bai i pas gut wantaim Krais Jisas, na bel na tingting bilong [yumi] bai i stap gut tru.” (Filipai 4:​6, 7) Hevi bilong yumi i mekim na long tingting yumi bai pilim olsem i no gat rot bilong stretim. Tasol sapos yumi “beten long olgeta taim,” Jehova inap strongim bel na tingting bilong yumi bilong helpim yumi long karim dispela hevi.​—⁠Rom 12:12; Aisaia 40:​28-31; 2 Korin 1:​3, 4; Filipai 4:⁠13.

Pasin bilong tokaut stret long ol samting taim yumi beten, dispela bai helpim yumi. Tru, sampela taim i hatwok long kamapim ol tok i stret long tingting bilong yumi, tasol taim yumi toktok long Jehova yumi no ken pret long kamapim ol samting yumi ting i as bilong dispela hevi. Yumi mas askim Jehova long givim strong long yu long karim hevi bilong ol wan wan de. Tok bilong Baibel i strongim yumi olsem: “Wanem ol manmeri i save pret long em, em i save givim ol samting long ol. Na em i save harim krai bilong ol na kisim bek ol.”​—⁠Song 145:⁠19.

I gat narapela samting moa yumi mas mekim​—⁠i no beten tasol. Yumi mas wok strong long sakim pasin bilong i stap yumi yet. (Sindaun 18:⁠1) Sampela i kisim strong taim ol i wok long helpim ol narapela. (Sindaun 19:17; Luk 6:38) Tingim wanpela meri nem bilong em Maria,a em i bin kisim sik kensa na i no dispela samting tasol​—⁠insait long wanpela yia tasol 8-pela long famili bilong em i bin dai. Maria i wok strong long subim em yet long lusim bet na kirap na mekim gen ol wok bilong em. Klostu olgeta de em i go na skulim ol narapela long tok bilong Baibel, na em i save go long ol miting Kristen. Taim em i go bek long haus, bel hevi bilong em i kamap strong gen. Tasol em i wok long tingim rot bilong helpim ol narapela, na dispela i helpim em na em inap karim ol hevi.

Tasol olsem wanem sapos yumi gat hatwok long beten, o yumi no inap abrusim pasin bilong surik long ol narapela na stap yumi yet? Sapos olsem, yumi mas kisim sampela helpim. Tok bilong Baibel i strongim yumi long go long “ol hetman bilong sios.” (Jems 5:​13-16) Wanpela man i gat dispela pasin bilong stap bel hevi tumas em i tok: “Sampela taim pasin bilong toktok wantaim wanpela gutpela pren inap helpim yu long stap bel isi na daunim pasin bilong tingting planti bambai gutpela tingting i ken wok strong gen.” (Sindaun 17:17) Tasol taim pasin bilong stap bel hevi longpela taim i makim olsem man i gat wanpela sik, ating em i mas kisim helpim long ol man i gat save long stretim kain sik olsem.b​—⁠Matyu 9:⁠12.

I no olsem i no gat hatwok long stretim ol hevi, tasol yumi no ken kisim tingting olsem God i no inap helpim yumi tumas long karim hevi. (2 Korin 4:⁠8) Beten long olgeta taim, abrusim pasin bilong surik long ol narapela, na kisim helpim long ol lain i gat save, ol dispela samting bai helpim yumi long kamap strong gen. Olsem Baibel i tok, i no longtaim na God bai pinisim olgeta samting i save kirapim yumi long stap bel hevi tru. Ol Kristen i gat strongpela tingting long larim God i helpim ol na wetim dispela taim “ol man bai i no inap tingim moa ol samting i bin kamap bipo.”​—⁠Aisaia 65:17; KTH 21:⁠4.

[Ol Futnot]