Bilong Wanem Planti Man i Bel Hevi Tru?
PLANTI manmeri bilong Is Jemani i ting, taim ol i brukim pinis banis ston namel long Is na Wes Jemani long Novemba 1989, nau bai ol i kisim gutpela sindaun! Wanpela yia samting bihain, ol i tok ‘hevi i painim ol aninit long gavman demokratik i winim hevi i bin painim ol taim banis ston i bin lukautim ol.’ Ol i ting nupela kain gavman bai helpim ol, tasol nogat, olsem na ol i bel hevi tru.
Taim pait i kamap long famili o long ples, planti taim dispela samting bai kirapim man long painim gutpela sindaun long narapela hap, tasol wan wan tasol i painim gutpela sindaun. Sampela i save slip long rot wantaim ol narapela man i no gat ples slip. Na long sampela kantri planti ol i no inap kisim ples slip long wanem ol i no gat wok, na ol i no inap kisim wok, long wanem ol i no gat haus. Sampela lain bilong welfe i wok long helpim ol, tasol bikpela hap taim i mas lus bilong stretim hevi bilong ol. Olsem na ol dispela man i bel hevi na i pilim olsem ol i no gat rot moa.
Planti meri ol i stap nogut tru na ol i pilim olsem ol i no gat rot, olsem na ol i mekim wanpela samting nogut tru. Wanpela ripot (Women and Crime in the 1990s) i kamapim tok bilong wanpela tisa meri i save gut long lo (Dr. Susan Edwards), olsem: “Ol yangpela meri i mekim pasin pamuk olsem wok mani bilong ol long wanem ol i no gat mani.” Na ol yangpela man tu i lusim papamama na i go painim wok, tasol i no gat wok. Sampela, ol i pilim olsem ol i stap nogut na i no gat rot, olsem na ol i baim skin bilong ol i go long ol man i gat wok bisnis long bosim sampela lain long mekim pasin sodom, na long dispela rot ol i gat ples slip na kaikai, tasol nau ol dispela man nogut i bosim olgeta samting ol i mekim.
Ating sampela man i lukim hatpela pasin bilong sampela gavman, na pasin bilong pait na bagarapim man, na ol man i sot long mani, olsem na ol i stap bel hevi tru. Ol man i gat bikpela namba long sampela wok, ol tu i bel hevi. Wanem samting i kamap? King Solomon i tok: “Sapos planti hevi i painim man, dispela samting bai paulim tingting bilong em.” (Saveman 7:7, NW) Planti man i bel hevi tru na ol i pilim olsem ol i no gat rot, na dispela samting i kirapim ol long mekim samting nogut tru—ol i kilim i dai skin bilong ol.
Wanpela Samting i Nogut Tru
Planti yangpela i kilim i dai skin bilong ol, olsem na yumi save, ol tu i bel hevi na ol i pilim olsem ol i no gat rot. Wanpela meri i raitim tok long wanpela nius na em i askim olsem: “Wanem samting i mekim na ol yangpela i bel hevi?” Ol i skelim sampela pikinini em krismas bilong ol i namel long 8 na 16, em ol i slip long haus sik long wanem ol i bin dring marasin nogut bilong kilim i dai skin bilong ol yet. Wanpela dokta bilong stretim sik long tingting (Dr. Eric Taylor), em i tok: “Mi kirap nogut long lukim planti pikinini em ol i stap bel hevi na ol i ting i no gat wanpela gutpela samting inap painim ol long bihain.” Long olgeta yia long Inglan, ol i ting inap olsem 100,000 pikinini i dring marasin nogut. Ol i mekim olsem bilong kirapim wanpela man long helpim ol.
Wanpela lain long Inglan em ol i save wok long helpim man, ol i kirapim wanpela lain bilong putim yau long tok bilong ol man i stap bel hevi. Long dispela rot dispela lain i tingting long helpim ol man na bai ol i no kilim i dai skin bilong ol yet. Tasol dispela lain i tok ol i no inap pinisim ol samting i mekim man i bel hevi.
Planti man long nau i kilim i dai skin bilong ol, na wanpela nius (The Sunday Correspondent) i tok as bilong dispela samting em ‘ol manmeri i no pas gut wantaim.’ Bilong wanem ol i kilim i dai skin bilong ol? Nius i tok ‘ol i no gat ples slip, na ol i dring planti, na ol i pret long kisim sik AIDS, na planti haus sik bilong ol longlong man i pas.’ Ol dispela samting i mekim na ol manmeri i bel hevi tru, na ol i laik kilim i dai skin bilong ol, long wanem ol i ting i no gat narapela rot bilong pinisim hevi bilong ol.
Olsem wanem? I gat wanpela samting bilong helpim ol manmeri long daunim bel hevi bilong ol? I gat! Jisas i tok: “Yupela i mas sanap na litimapim het bilong yupela.” (Luk 21:28) Wanem insait bilong dispela tok? I gat gutpela samting bilong wetim o nogat?