Nambawan Laik Bilong Mi Em Bilong Stap Gut Long God
STORI BILONG ALEXEI DAVIDJUK
Em yia 1947, long hap i stap klostu long boda bilong Polan, na sampela kilomita tasol long ples bilong mipela, em Laskiv bilong Yukren. Pren i bikpela long mi, Stepan, em i save wok hait na go long Polan bilong kisim ol nius bilong Baibel i kam bek long Yukren. Wanpela nait wanpela gad bilong was long boda i lukim em na i ranim em na sutim em long gan. Bihain mi bai stori long olsem wanem i dai bilong Stepan i bin mekim bikpela samting long mi 12-pela yia bihain.
TAIM mama i karim mi long Laskiv long 1932, i gat 10-pela famili long dispela hap em ol i Sumatin Bilong Baibel, em nem bilong ol Witnes Bilong Jehova bilong bipo. Papamama bilong mi i insait long dispela lain, na ol i stap gutpela piksa long pasin bilong stap gut long Jehova inap long tupela i dai long 1975 samting. Na long laip bilong mi tu, dispela pasin bilong stap gut long God i namba wan bikpela samting.—Song 18:25.
Long 1939, taim Namba Tu Pait i kirap, ples mipela stap long en long hap is bilong Polan i kamap olsem hap bilong Soviet Yunion. Na ol lain Soviet i bosim dispela hap i go inap long Jun 1941, long dispela taim ol Jeman i kam na kisim hap bilong mipela na bosim.
Long taim bilong Namba Tu Pait mi gat sampela hevi long skul. Ol i skulim ol pikinini long ol singsing bilong litimapim kantri na bilong lainim sampela wok bilong ami. Wanpela samting bilong ami ol i lainim mipela long en, em long tromoi ol hanbom. Tasol mi tok nogat long lainim wok bilong ami na ol singsing bilong litimapim kantri. Samting mi lainim taim mi liklik yet, olsem pasin bilong sanap strong na bihainim bilip em Baibel i as bilong en, dispela i bin helpim mi long stap gut long God long bihain.
I gat planti manmeri i laik save long ol trupela tok bilong Baibel long teritori bilong kongrigesen bilong mipela, olsem na bilong helpim ol, Sosaiti i salim tupela painia i kam, em ol Witnes Bilong Jehova i save mekim wok autim tok long olgeta de. Nem bilong wanpela painia em Ilja Fedorovitsch, em i bin stadi wantaim mi long Baibel na lainim mi long autim tok. Taim ol Jeman i stap na bosim kantri, ol i kisim Ilja na putim em i go long banis kalabus nogut bilong ol Natsi, na em i dai long dispela hap.
Hatwok Bilong Papa
Long 1941, sampela hetman bilong Soviet Yunion i laik subim Papa long putim nem bilong em long wanpela pepa i tok em bai givim mani bilong helpim pait. Papa i tokim ol olsem em i no inap mekim wanpela samting bilong helpim wanpela lain i insait long dispela pait, na em i stap wokman bilong trupela God, olsem na em bai i no insait long ol samting bilong graun. Ol hetman i tok Papa i wanpela birua bilong gavman na ol i makim em long stap long kalabus inap 4-pela yia. Tasol em i stap long kalabus 4-pela de tasol. Bilong wanem? Long wanem, long Sande taim em i kalabus 4-pela de pinis, ol ami bilong lain Jeman i kam na bosim taun bilong mipela.
Taim ol woda i harim olsem ol Jeman i kam klostu, ol i opim ol dua bilong kalabus na ranawe. Na taim ol kalabusman i kam ausait, lain ami bilong Soviet Yunion i sutim planti bilong ol. Papa i no lusim kalabus hariap, tasol bihain em i lusim na ranawe i go long haus bilong sampela pren. Em i stap wantaim ol pren na salim tok i go long Mama long kisim ol pepa bilong em i kam, em ol pepa i kamapim klia olsem em i kalabus, long wanem, em i no laik helpim ol Rasia long pait. Taim Papa i soim ol dispela pepa long ol Jeman, ol i larim em i stap laip.
Ol Jeman i laik save long nem bilong olgeta manmeri i bin helpim ol lain bilong Soviet Yunion. Ol i strong olsem Papa mas kamapim nem bilong ol, tasol Papa i no harim tok bilong ol. Em i tokim ol olsem em i no insait long ol samting bilong dispela pait. Sapos em i bin kolim nem bilong wanpela man o wanpela meri, ol Jeman bai sutim ol. Olsem na pasin bilong Papa long sakim olgeta samting i insait long pait i bin lukautim laip bilong sampela manmeri, na ol i pilim tru dispela samting.
Ol i Wok Hait
Ol lain bilong Soviet Yunion i kam bek long Yukren long Ogas 1944, na long Me 1945, Namba Tu Pait long hap bilong Yurop i pinis. Bihain pasin birua bilong Soviet Yunion i mekim na mipela ol manmeri i stap long dispela hap, mipela i no inap kisim tok long ol samting bilong ol narapela hap bilong graun. Na i hatwok tu long mipela long kisim sampela tok long ol Witnes Bilong Jehova i stap long Polan, em hapsait long boda tasol. Sampela ol Witnes i gat strongpela bel ol bai hait na brukim boda na bihain kam bek wantaim samting i dia tumas, em ol nius Wastaua. Boda i stap longwe long haus bilong mipela long Laskiv inap 12-pela kilomita tasol, olsem na mi bin harim ol stori bilong ol hevi samting i painim ol lain i go bilong kisim ol nius samting.
Olsem: Wanpela Witnes, em Silvester, em i brukim boda na kam bek tupela taim na i no gat wanpela hevi i bin kamap. Tasol long namba tri raun bilong em, ol polis i was long boda wantaim ol dok bilong ol, ol i lukim em. Ol i bikmaus long Silvester na tokim em long sanap, tasol em i ranawe. I gat wanpela rot tasol bilong abrusim ol dok—em i mas kalap i go insait long wanpela raunwara i stap klostu. Long dispela nait olgeta em i hait namel long ol longpela gras insait long wara, na wara i kam antap inap long nek bilong em. Bihain tru, taim ol polis i no wok moa long painim em, Silvester i wokabaut i go long haus, na olgeta strong bilong em i laik pinis.
Silvester em i ankol bilong Stepan, em dispela man i bin dai taim em i laik brukim boda. Tasol i bikpela samting tru long mipela i mas wok yet long kisim ol nupela tok samting i kam long lain bilong Jehova. Long rot bilong ol brata i gat strongpela bel, mipela i kisim ol kaikai bilong spirit na tok bilong stiaim mipela.
Long yia antap long dispela, em 1948, mi kisim baptais long nait long liklik raunwara i stap klostu long haus bilong mipela. Ol lain i laik baptais i bung long haus bilong mipela, tasol mi no save long ol, long wanem, em i tudak na mipela mekim dispela samting long pasin hait. Mipela ol lain i laik kisim baptais, mipela i no toktok wantaim. Mi no save husat i givim tok bilong baptais, o husat i givim ol askim bilong baptais long mi taim mipela sanap klostu long wara, na tu mi no save husat i baptaisim mi. Planti yia bihain, taim mi toktok wantaim wanpela gutpela pren bilong mi, mipela kisim save olsem mitupela i bin stap insait long dispela lain i bin baptais long dispela nait!
Long 1949 ol Witnes bilong Yukren i kisim tok long Bruklin olsem i gutpela long askim gavman bilong Soviet Yunion i stap long Mosko long orait long ol Witnes i ken autim tok long dispela hap. Bilong bihainim dispela tok, ol Witnes i salim wanpela pepa i go long minista i bosim ol samting insait long kantri, na minista i salim i go long wanpela liklik lain i kamapim ol lo samting bilong Soviet Yunion. Bihain ol brata i askim Mykola Pyatokha na Ilya Babijchuk long go long Mosko na kisim bekim bilong gavman. Ol i wanbel na raun i go long dispela hap.
Bikman bilong gavman i harim toktok bilong tupela taim ol i stori long wok bilong mipela em Baibel i as bilong en. Ol i stori olsem mipela mekim ol wok i truim tok profet Jisas i kamapim olsem “bai ol i autim dispela gutnius bilong kingdom bilong God long olgeta hap bilong graun.” (Matyu 24:14) Tasol dispela bikman i tok olsem gavman bai i no inap orait long mipela, nogat tru.
Tupela Witnes i go bek long ples bilong ol na ol i go long biktaun bilong Yukren, em Kiev, bilong kisim tok orait long mekim wok bilong mipela long Yukren. Na bekim i wankain olsem ol lain bilong Mosko i mekim, ol i tok nogat. Ol i tok, sapos ol Witnes Bilong Jehova i mekim ol samting bilong helpim gavman, bai ol i no pasim ol. Ol i tok olsem ol Witnes i mas insait long ami na ol eleksen. Tupela i stori gen long tingting bilong mipela long ol dispela samting, olsem bilong bihainim Bikman, em Jisas Krais, mipela i no ken insait long ol samting bilong dispela graun.—Jon 17:14-16.
I no longtaim bihain long dispela ol i kisim Brata Pyatokha na Brata Babijchuk na kalabusim ol na kot i makim ol long stap kalabus 25 yia. Na klostu long dispela taim, em long 1950, ol polis i kisim planti Witnes, na papa bilong mi tu wantaim. Kot i makim em long stap kalabus inap 25 yia na ol i salim em i go long Kabarask, em hap is tru bilong Soviet Yunion, na i stap longwe long mipela inap olsem 7,000 kilomita!
Kalabus Long Saibiria
Bihain, em long Epril 1951, gavman Soviet i stretim ol samting bilong givim bikpela hevi long ol Witnes i stap long ol hap wes bilong kantri, nem bilong ol dispela ples long nau i olsem Latvia, Estonia, Lituenia, Moldova, Belarus, na Yukren. Long dispela mun Epril, ol i salim mi na mama wantaim 7,000 ol narapela Witnes i go kalabus long Saibiria. Ol lain ami i kam long haus bilong mipela long wanpela nait na kisim mipela i go long ples bilong kalap long tren. Na ol i kalabusim mipela insait long ol hap bilong tren ol i save karim ol bulmakau long en—i gat 50 samting manmeri insait long ol wan wan hap bilong tren. Tupela wik bihain, ol i lusim mipela long wanpela hap ol i kolim Salari, em hap i stap klostu long raunwara Baikal long provins bilong Irkusk.
Mi sanap long ais i karamapim graun, na win i kol nogut tru olsem ais i holim skin bilong mi, na ol lain ami i holim gan i stap na was long mipela. Mi tingting long wanem wanem ol samting bai kamap long mipela. Olsem wanem mi bai mekim ol samting bilong stap gut long Jehova long dispela ples? Bilong helpim mipela long lusim tingting long kol, mipela kirap na mekim ol singsing bilong Kingdom. Long dispela taim ol maneja bilong sampela bisnis bilong dispela provins yet ol i kam. Sampela maneja i painim ol man i gat strong bilong mekim ol bikpela wok, na sampela i laikim ol meri bilong lukautim ol animal samting. Ol i kisim mi na mama i go long wanpela hap ol i laik wokim Tagninskiya paua-stesin long en.
Taim mipela kamap long dispela hap, mipela lukim wanpela lain haus ol i wokim long plang, em ol haus bilong mipela ol lain em gavman i rausim. Ol i makim mi bilong draivim trakta na mekim wok elektrisen, na ol i makim mama bilong wok long fam. Gavman i makim mipela olsem ol lain em gavman i rausim ol, na i no olsem ol man i kalabus. Olsem na mipela inap lusim hap em paua-stesin i stap long en na raun liklik, tasol mipela no inap go long narapela ples i stap longwe long mipela olsem 50 kilomita. Ol hetman i laik subim mipela long putim nem bilong mipela long wanpela pepa i tok olsem mipela bai stap long dispela hap oltaim. Mi wanpela manki i gat 19 krismas tasol, na long tingting bilong mi yet em i longpela taim tumas, olsem na mi no sainim nem bilong mi. Tasol mipela bin stap long dispela hap inap long 15 yia.
Long dispela hap bilong Saibiria, boda bilong Polan i no longwe olsem 8-pela kilomita tasol, nogat, em longwe tru olsem 6,000 kilomita samting! Mipela ol Witnes i traim mekim ol samting bilong kamapim ol kongrigesen na bilong makim ol man i olsem gopas. Pastaim mipela i no gat ol nius bilong Baibel, tasol sampela Witnes i bin kisim wan wan nius bilong Baibel taim ol i lusim Yukren. Na mipela raitim ol kopi bilong ol dispela nius na tilim i go long narapela narapela.
I no longtaim na mipela i kirap na wokim ol miting. Na planti bilong mipela i stap long ol dispela haus bilong ol wokman, olsem na planti taim mipela save bung long nait. Kongrigesen bilong mipela i gat olsem 50 manmeri long en, na ol i makim mi long lukautim Skul Bilong Wok Autim Tok. I no gat planti man long kongrigesen, olsem na ol meri tu i mekim ol tok olsem sumatin i insait long skul. Ol narapela kongrigesen bilong ol Witnes Bilong Jehova i kirapim dispela pasin long 1958. Olgeta i pilim olsem ol wok ol i kisim long skul i bikpela samting; ol i pilim olsem em i rot bilong litimapim nem bilong Jehova na strongim bel bilong ol narapela long kongrigesen.
God i Blesim Wok Bilong Mipela
I gat ol man i no Witnes i stap insait long ol dispela bikpela haus bilong kampani, olsem na klostu olgeta de mipela i toktok wantaim ol long bilip bilong mipela, maski i gat bikpela tambu long dispela samting. Taim bikman bilong ol Soviet, em Joseph Stalin, i dai long 1953, ol samting i kamap gutpela liklik. Na ol i larim mipela i toktok wantaim ol narapela long ol bilip bilong mipela em Baibel i as bilong en. Long ol pas mipela kisim long ol pren i stap long Yukren, mipela kisim toksave long wanem wanem hap klostu long mipela i gat ol narapela Witnes i stap long en, na mipela toktok wantaim ol. Long dispela rot, mipela inap skelim ol kongrigesen bilong mipela na kamapim ol sekit.
Long 1954, mi maritim Olga, em tu ol i bin rausim em long Yukren. Inap planti yia em i helpim mi tru long ol wok mi mekim bilong lotuim Jehova. Stepan em brata bilong em, ol i bin kilim em i dai long 1947 long boda i stap namel long Yukren na Polan. Bihain, pikinini meri bilong mipela, em Valentina, i kamap.
Mi na Olga i kisim planti blesing long wok Kristen bilong mipela long Saibiria. Olsem: Mipela bungim George, em i gopas bilong wanpela lain Baptis. Mipela go lukim em planti taim na stadi long ol Wastaua mipela inap kisim. I no longtaim na George i pilim tru olsem ol tok bilong Baibel ol lain bilong Jehova i autim em tok i tru. Na tu, sampela ol pren bilong em bilong lotu Baptis i kirap na stadi wantaim mipela. Mipela i kisim bikpela amamas taim George na sampela pren bilong em i kisim baptais na kamap ol brata bilong mipela long spirit!
Long 1956, ol i makim mi long kamap wasman bilong raun, olsem na mi mas go lukim wanpela kongrigesen long hap bilong mipela long olgeta wik. Bilong mekim olsem, mi bai wok skin long de olgeta, na long apinun tru mi bai kalap long motabaik na bung wantaim kongrigesen. Long moningtaim tru mi bai go bek long hap bilong mi na wok. Mykhailo Serdinsky, em brata ol i bin makim bilong helpim mi long raun, em i kisim bagarap long rot na i dai long 1958. Em i dai long wanpela Trinde, tasol mipela i no wokim bung bilong planim em hariap—mipela i wokim long Sande na bai rot i op na planti ol Witnes inap bung wantaim.
Taim bikpela lain bilong mipela i wokabaut i go long matmat, i gat ol sekyuriti bilong gavman i bihainim mipela. Ol dispela sekyuriti inap kalabusim man i kamapim ol tok bilong Baibel long bilip bilong kirap bek long matmat. Tasol mi pilim olsem mi mas tokaut long Mykhailo na long ol gutpela samting tru i laik painim em long bihain. Na maski mi mekim wok long Baibel, ol sekyuriti i no kalabusim mi. I luk olsem wok bilong kisim mi i no inap helpim ol liklik, na ol i save gut long mi, long wanem planti taim ol i bin singautim mi i kam long hetkota bilong ol taim ol i laik givim sampela askim long mi.
Wanpela i Kamapim Ol Long Ol Birua
Long 1959, polis i kalabusim 12-pela Witnes, em ol i go pas bilong wok autim tok. Na tu, ol polis i tokim sampela narapela Witnes long kam bilong bekim sampela askim, na mi yet i insait long dispela lain. Taim ol i givim sampela askim long mi, mi kirap nogut tru long harim ol i toktok long ol samting bilong wok bilong mipela em mipela i mekim long pasin hait. Olsem wanem ol i bin kisim save long ol dispela samting? I mas i gat wanpela i bin tokim ol, em wanpela i save long planti samting bilong mipela na inap longpela taim em i kamapim ol samting long ol polis.
Ol dispela 12-pela brata i kalabus long ol rum i stap klostu klostu, olsem na ol i pasim tok olsem ol bai i no kamapim wanpela tok moa long ol polis. Long dispela rot, man i bin kamapim mipela i mas kam long kot na tokaut long jas long ol samting em i save long en. Ol i no bin kotim mi, tasol mi go long kot bilong save long wanem ol samting bai kamap. Jas i givim askim long ol dispela 12-pela brata, tasol ol i no bekim. Orait, nau wanpela Witnes mi bin save long em inap planti yia pinis, em Konstantyn Polishchuk, em i tokaut long kot long ol samting ol brata i bin mekim. Kot i makim sampela bilong ol dispela Witnes long kalabus. Bihain mi bungim Polishchuk long rot i stap ausait long haus kot.
Mi askim em: “Bilong wanem yu kamapim mipela?”
Em i bekim olsem: “Long wanem mi no bilip moa.”
Mi askim em: “Yu no bilip moa long wanem samting?”
Em i bekim olsem: “Mi no inap bilip moa long Baibel.”
Polishchuk inap tokim kot long ol samting mi bin mekim, tasol taim em i toktok long kot, em i no kamapim nem bilong mi. Olsem na mi askim em bilong wanem em i no bin mekim olsem?
Em i tok: “Mi no laik bai yu kalabus. Bel i kotim mi yet long samting i bin kamap long brata bilong meri bilong yu, em Stepan. Mi yet i bin salim em i go brukim boda long dispela nait ol i bin kilim em i dai. Na mi sori tru long dispela samting.”
Tok bilong em i mekim na mi tingting planti. Tingting bilong bel bilong em i paul tru! Em i pilim nogut long i dai bilong Stepan, tasol long kot em i givim baksait long lain bilong Jehova na kamapim ol samting bilong ol. Mi no bin lukim Polishchuk gen. Na sampela mun bihain em i dai. Dispela samting mi lukim, olsem wanpela mi bin bilip long en inap planti yia em i kamapim ol brata bilong mipela long ol polis, dispela i bagarapim tru bel bilong mi. Tasol dispela i lainim mi long wanpela bikpela samting olsem: Polishchuk i no stap gut moa long bilip, long wanem, em i lusim pasin bilong ritim na bilipim ol tok bilong Baibel.
Yumi mas tingim yet dispela samting: Sapos yumi laik stap gut long Jehova, yumi mas bihainim pasin bilong stadi oltaim long Baibel. Baibel i tok: “Gutpela tingting bilong stiaim laip bilong yu, em i save kamap long tingting bilong yu . . . Olsem na olgeta taim yu mas was gut tru long tingting bilong yu.” Na tu, aposel Pol i givim wanpela tok lukaut long ol Kristen. Bilong wanem em i mekim olsem? Long wanem, “nogut wanpela brata namel long yupela em i gat tingting nogut long bel bilong en na em i lusim bilip na i givim baksait long God i gat laip.”—Sindaun 4:23; Hibru 3:12.
Mipela Go Bek Long Yukren
Long 1966 ol no pasim mipela moa long Saibiria, olsem na mitupela Olga i go bek long Yukren, long wanpela taun ol i kolim Sokal, em i stap longwe long taun Lavif olsem 50 kilomita. I gat planti wok long mekim, long wanem, i gat 34 Witnes tasol i stap long Sokal na tupela narapela taun i stap klostu, olsem Servonograt na Sosnifka. Long nau i gat 11-pela kongrigesen i stap long dispela hap!
Olga i stap gut long Jehova i go inap long em i dai long 1993. Tripela yia bihain mi maritim Lidiya, na em i stap olsem gutpela helpim bilong mi. Na tu, pikinini meri bilong mi, Valentina, na famili bilong em, ol i givim bel long Jehova, na dispela tu i strongim bel bilong mi. Tasol nambawan samting i givim bikpela amamas long mi i olsem mi bin stap gut long Jehova, em God i no save lusim man i stap gut long Em.—2 Samuel 22:26.
Alexei Davidjuk i stap gut long Jehova i go inap long em i dai long Februeri 18, 2000, taim ol i wok yet long redim dispela stori.
[Piksa long pes 16]
Kongrigesen bilong mipela i bung long ol haus bilong kampani long is Saibiria long 1952
[Piksa long pes 19]
Skul Bilong Wok Autim Tok bilong mipela long 1953
[Piksa long pes 19]
Bung bilong planim Mykhailo Serdinsky long 1958
[Piksa long pes 20]
Mi wantaim meri bilong mi Lidiya