Bai Yu Wok Long Wanpela Kampani Inap Yu Lapun Pinis?

GRAHAMa i bin wok long wanpela bikpela kampani bilong Ostrelia inap long 37 yia. Taim em i gat 58 krismas samting, kampani i toksave olsem em bai wok inap sampela wik moa na bihain ol i no gat wok moa bilong em. Em i kirap nogut olsem kampani i rausim em na em i no save long samting em bai mekim long bihain. Graham i tok: “Olsem wanem long wok mani bilong mi? Mi bin ting olsem mi bai holim dispela wok inap mi lapun pinis.”

Tru, pasin bilong kampani long rausim wokman i no narapela kain samting, o nupela samting. Tasol long olgeta hap, ol kampani i wok long rausim bikpela lain wokman, na dispela i nupela samting long planti wokman bilong nau. I gat kain kain as bilong rausim wokman, tasol i luk olsem wanpela bikpela as na ol kampani i mekim long nau, em bilong daunim namba bilong lain wokman. Tasol bilong wanem dispela pasin i kamap bikpela?

Ol Senis Long Wok Mani

Long nau, pasin bilong baim ol samting ol i wokim long narapela narapela kantri i kamap bikpela moa. Dispela pasin i kamap klia moa long Amerika long 1977 i go inap long 1979 samting, long dispela taim ol kampani i luksave olsem ol manmeri i wok long baim ol samting olsem ka, samting bilong pawa, na planti narapela samting, ol man i bin wokim long ol narapela kantri.

Bilong helpim ol long winim ol dispela kampani na daunim pe bilong wokim ol samting, ol kampani bilong Amerika i kirap na rausim sampela wokman, na mekim ol samting i helpim wok bilong ol long kamap gutpela moa. Dispela pasin bilong rausim sampela lain wokman i kisim nem olsem daunim namba. Bilong daunim namba bilong lain wokman, sampela kampani i save makim sampela long malolo, o kirapim sampela i wok longpela taim long lusim wok, o makim sampela long wok long narapela hap, o pinisim sampela em ol i gat laik long lusim wok.

Pastaim dispela samting i painim planti ol wokman i save wok leba. Tasol long 1989 i go inap long 1990 samting, dispela pasin i wok long kamap long ol man i wok long ol ofis, na i kamap moa yet long ol man i olsem nambatu bos. I no longtaim na dispela pasin i kamap long olgeta kantri i gat planti wok bisnis long en. Na taim hevi i stap yet bilong kisim mani, sampela gavman na bosman i rausim sampela wokman moa bilong daunim pe bilong wokim ol samting.

Planti wokman long nau i no ken ting ol bai i holim wanpela wok mani inap long ol i lapun. Wanpela mausman bilong ol wokman i tok: “Sampela manmeri ol i bin stap gut long wok inap 10, 15, o 20 yia, na long ai bilong ol yet bos i brukim pepa kontrak bilong ol na rausim ol long wok.” Buk bilong Delorese Ambrose (Healing the Downsized Organization) i stori long olsem wanem dispela tok “man bilong kampani” i bin kamap long 1956 bilong makim wokman bilong wanpela kampani. Em i tok moa olsem: “Maski em i wokman tasol o wanpela maneja, em i stap gut long kampani na larim kampani yet i bosim planti samting long i stap bilong em, na em i mekim olsem bilong kisim wanpela samting​—⁠em wanpela wok mani em i ken holim inap long em i lapun. Tasol long nau planti kampani i no bihainim moa dispela pasin.”

Wok mani bilong planti milion manmeri long olgeta hap i lus long dispela pasin bilong daunim lain wokman, na i no gat wanpela lain wokman i abrusim olgeta dispela hevi. Dispela samting i kamap long bikpela lain tru bilong Amerika, long dispela hap i gat planti milion manmeri em ol kampani i bin pinisim ol long wok. Wankain samting i kamap long planti narapela kantri. Tasol taim ol i kolim namba tasol, yumi no pilim bikpela bel hevi ol dispela man i kisim taim bos i pinisim ol long wok.

Bel Hevi Bilong Ol

Graham, em mipela i stori pinis long en, em i tok: “Dispela samting i save bagarapim tru bel na tingting bilong man.” Em i tok samting ol i mekim long em taim ol i rausim em long wok i olsem “wanpela sik o wanpela bagarap em i kisim long wanpela pait.”

Taim kampani i no tingim ol man i stap gut long en, ol man i pilim nogut, long wanem, ol i bin givim bel na strong olgeta long kampani, tasol dispela i olsem samting nating long ol bosman. Ol hetman bilong kampani i kisim bikpela winmani samting taim ol i daunim namba bilong lain wokman, na dispela i mekim na ol man i no bilip moa long ol. Na tu, man i no gat wok mani bai i gat hatwok long bekim dinau, na lukautim famili taim ol i sik, baim skul-fi, bihainim wankain pasin bilong baim ol samting olsem bipo, mekim ol samting bilong amamas, na lukautim ol samting em i holim pinis. Dispela i mekim na bel bilong em i bagarap stret, na em bai ting olsem em i no inap mekim wanpela gutpela samting.

Pasin bilong holim wanpela wok mani i save mekim bel bilong man i gutpela, olsem na taim dispela hevi i painim ol man i gat sampela bagarap long skin, o man i no gat save long mekim sampela wok, na ol lapun, bel bilong ol bai bagarap stret. Ol i skelim dispela hevi long Ostrelia na dispela i kamapim klia olsem ol manmeri i gat 45 i go inap long 59 krismas i olsem namba wan lain ol kampani bai rausim. Tasol ol dispela lain i gat hatwok moa long stap isi taim dispela kain senis i kamap.

Olsem wanem? I gat ol narapela samting ol i ken mekim? Wok haptaim o ol wok i no gat bikpela pe, dispela i winim pasin bilong stap nating. Tasol sapos man i kisim kain wok olsem, nau em i no gat rot long baim planti samting olsem bipo. Liklik hap lain tasol i save painim wanpela wok mani i gat wankain pe olsem wok mani bilong ol long bipo. Na dispela i givim hevi long ol famili.

Tasol maski man i holim wanpela wok mani, dispela i no makim olsem em bai stap bel isi. As bilong dispela i olsem, pasin bilong tingting planti olsem ol bai pinisim em long wok, dispela i save bagarapim bel bilong man. Wanpela buk (Parting Company) i tok: “Pasin bilong tingting planti olsem ol bai pinisim yu long wok em i kain olsem pasin bilong makim wanem hap i gutpela moa long wanpela ka i ken bamim yu long en. Yu no inap redi long dispela samting, long wanem, yu no save olsem wanpela ka i kam, inap em i bamim yu pinis.”

Taim ol yangpela i no gat wok mani, dispela i mekim wanem long ol? Wanpela dipatmen bilong saiens na edukesen i tok: “Wok mani em i wanpela bikpela samting i makim olsem man i bikpela pinis. Taim yangpela i kisim wok mani, i olsem em i stap bikpela pinis long ai bilong ol narapela, na em i gat mani bilong lukautim em yet.” Olsem na sapos ol yangpela i pilim olsem pasin bilong kisim wanpela wok i makim olsem ol i bikpela pinis, orait pasin bilong stap nating inap bagarapim tru bel bilong ol.

Winim Hevi Bilong Stap Nating

Sampela i tok pasin bilong karim hevi bilong taim bos i rausim yu long wok i olsem pasin bilong wokabaut long wanpela hap graun ol i haitim ol bom long en. Dispela buk (Parting Company) i tok, ol samting i save kamap long bel i olsem belhat, sem, pret, bel hevi, na pasin bilong tingim hevi bilong yu yet tasol. I hatwok long karim hevi bilong ol dispela samting. Man i raitim buk i tok: “I olsem ol i givim wanpela wok long yu i gat hatwok long en, em wok bilong makim ol samting yu bai mekim long bihain. Yu no save bai yu mekim olsem wanem, na yu pilim olsem yu stap wanpis.” Na olsem tasol, taim man i mas tokim famili olsem kampani i bin rausim em, em bai i hatwok tru long tokim ol.

Tasol i gat sampela samting man i ken mekim bilong helpim em taim kampani i rausim sampela wokman. Namba wan samting long mekim, em yu ken senisim sampela pasin long sindaun bilong yu na bai yu no gat wok long baim planti samting olsem bipo.

Mipela kamapim sampela tok daunbilo i ken helpim yu long karim dispela hevi, tasol i no olsem em bai pinisim. Yumi mas save, pasin bilong rausim nating man long wok i save kamap long nau. Na yu no ken ting krismas o bikpela save bilong yu i mekim na bai yu no gat hevi long dispela samting, olsem na no ken tingting planti, tasol bihainim pasin long sindaun bilong yu i makim olsem yu stap redi sapos dispela hevi i kamap long yu.

Namba 2, tingting gut pastaim sapos yu laik kisim bikpela dinau long ol samting i no olsem samting yu mas i gat bilong stap laip. Baim ol samting i stret long skel bilong mani bilong yu, na no ken ting yu inap bekim dinau long sampela winmani yu bai kisim bihain. Samting i kamap long ol wok bisnis bilong nau i makim olsem man i no ken ting olgeta taim em bai i holim wanpela wok mani.

Namba 3, skelim ol samting yu mekim na bai i no gat planti samting bilong pulim mani bilong yu. Na tu, dispela i makim olsem yu bai rausim sampela dinau long ol samting i no olsem yu mas i gat bilong stap gut.

Namba 4, skelim gen ol mak samting yu laik winim long bihain, em sampela mak bilong spirit na bilong ol narapela samting tu. Orait nau yu ken mekim olsem: Ol samting yu tingting pinis long mekim, skelim wantaim ol mak yu laik winim, na skelim tu ol samting dispela bai mekim long i stap bilong yu.

Na laspela samting long tingim i olsem, no ken aigris long sindaun bilong ol narapela em ol i no bosim tumas laik bilong baim ol samting, nogut yu kirap long laikim ol samting ol i gat na yu bihainim pasin bilong ol.

Dispela em sampela tok bilong helpim yu yet na famili bilong yu long abrusim planti ol hevi i save kamap long dispela pasin bilong kisim planti samting na bilip tumas long mani.

Wanpela man i mekim wok bisnis wantaim ol beng, em Felix Rohatyn, em i tok: “Em pasin kranki tru i kamap long taim bilong yumi, olsem wanpela wokman i save kisim winmani taim kampani i pinisim narapela long wok.” Tru tumas, pasin bilong dispela graun i no stret liklik, olsem na i no longtaim na bai dispela pasin bilong graun i pinis na nupela taim bai kamap, na bai yumi kisim narapela kain tingting tru long dispela tok olsem ‘wanpela wok bilong holim oltaim.’​—⁠Aisaia 65:​17-24; 2 Pita 3:⁠13.

[Futnot]

[Rait long pes 22]

‘Em pasin kranki tru i kamap long taim bilong yumi, olsem wanpela wokman i save kisim winmani taim kampani i pinisim narapela long wok’

[Piksa long pes 23]

Senisim sampela pasin long sindaun bilong yu na bai yu no gat wok long baim planti samting