Strong i Kam Long God i Helpim Mi Long Winim Ol Traim
EM STORI BILONG STEPAN KOZHEMBA
Wanpela nait bilong mun Epril 1951, ol ami bilong lain Soviet i pulap long ol ka na kam long ples bilong mipela long Stenyatin bilong Yukren. Ol i holim gan na raunim ol haus ol i bin pasim tok pinis long go long en bilong kisim sampela famili olgeta bilong ol Witnes Bilong Jehova na karim ol i go long Saibiria. Mi wanpela yangpela i gat 12-pela krismas tasol na mi pilim tru ol samting long bel, olsem na mi tingting planti, i gat wanem as na ol ami i mekim olsem long ol Witnes, na olsem wanem ol Witnes inap karim dispela hevi.
MAMA i karim mi long Stenyatin long Oktoba 1938, na tupela wik bihain em i dai. Papa i insait long ami bilong lain Soviet, na em i dai long 1944 taim ol i pait wantaim ol lain Jeman. Tupela susa bilong papa, em Olena na Anna, ol i lukautim mi inap mi bikpela.
Taim mi stap manki yet mi save long sampela Witnes Bilong Jehova i stap long taun bilong mipela. Wanem wanem taim rot i op ol i stori long mi na ol narapela tu long Kingdom bilong Krais. Isi isi mi kamap pren wantaim sampela yangpela bilong ol. Na taim ol ami bilong Soviet i kam kisim ol na rausim ol i go long Saibiria, mi kirap nogut tru.
Tasol ol i no rausim olgeta Witnes. Stepan em i wanpela Witnes i sindaun klostu long haus bilong mi na ol i larim em i stap, long wanem, famili bilong em i no Witnes. Em i bikpela long mi inap long 6-pela krismas, na taim mi lusim skul, mi wok kamda wantaim em. Em i mekim wok long wanem wanem Wastaua i stap bilong stadi long Baibel wantaim mi. Stepan i amamas tru taim mi kisim baptais long Julai 1956. Long nau em i mekim wok bilong Jehova long Estonia.
Long dispela taim bipo olgeta man i lotuim Jehova long Yukren i karim hevi long pasin birua. Ol polis i save go long ol haus bilong painim painim ol nius bilong Baibel, olsem na mi gat planti hap mi haitim ol nius long en. Tupela anti bilong mi, em Olena na Anna, i bilong lotu Katolik bilong ol Grik, na tupela i no amamas taim mi wok long toktok wantaim ol Witnes. Na ol i laik kirapim mi long lusim pasin bilong bung wantaim ol. Sampela taim tingting bilong mi i wankain olsem Pol taim em i tok, “bikpela hevi moa i bin daunim [mi], na i winim tru strong bilong [mi].” Tasol mi stap gut long Jehova na dispela i bin strongim mi long karim olgeta hevi.—2 Korin 1:8; Filipai 4:13.
Hatwok Bilong Mi Long Abrusim Ol Wok Bilong Pait
Lo i tok ol man i gat 18 krismas i mas insait long ami bilong Soviet. Save bilong mi long tok bilong Baibel i kirapim mi long klia long ol samting bilong graun, olsem na mi tok nogat long wok bilong insait long ami. (Aisaia 2:4; Jon 17:14-16) Olena na Anna i laik kirapim mi long insait long ami maski brata bilong ol, em papa bilong mi i bin dai long pait.
Taim mi kisim pepa i toksave olsem mi mas insait long ami, mi go long hetkota bilong ol long hap bilong mipela na kamapim bilip bilong mi. Wantu ol i kalabusim mi na mi stap kalabus taim ol i wok long stretim ol samting ol i laik kotim mi long en. Ol i no larim ol man i kam na harim kot, na ol i no toksave long tupela anti bilong mi long kot bai kamap long wanem de. Mi autim gut ol tok bilong Baibel long jas wantaim man i kotim mi na tupela narapela i sindaun long harim kot. Na insait long 20 minit tasol kot i pinis. Kot i makim mi long kalabus 5-pela yia, na insait long 5-pela yia bihain long kalabus ol i tambuim mi long mekim sampela samting ol narapela lain bilong kantri ol inap mekim.
I Stap Bilong Mi Long Kalabus
Bihain long kot mi kalabus long Lavif. Insait long 3-pela mun, kirap long taim ol i bin kotim mi i go inap long taim ol i kisim mi i go long wanpela kain kalabus bilong wok leba, mi no bung wantaim narapela wanbilip, na mi no holim wanpela Baibel o wanpela nius bilong Baibel. Tasol mi stap strong long ol samting bilong spirit long rot bilong autim tok long ol narapela kalabusman, em ol i hatwok long save long as na mi tok nogat long insait long ami. Long dispela 3-pela mun ol samting mi bin stadi long en paslain long kalabus i helpim mi. Long dispela rot mi kisim bikpela skul olsem: Baibel-stadi bilong yumi yet i helpim yumi long putim gut ol samting bilong spirit long tingting na bihain dispela bai strongim yumi taim ol traim i kamap.—Jon 14:26.
Long Epril 1958, ol i kisim mi i go long kalabus 21 bilong wok leba bilong inapim hap taim i stap yet long kalabus bilong mi. Dispela kem i stap klostu long Nipropatrosk, na em i longwe long ples bilong mi olsem 700 kilomita. Long kalabus mipela kirap long 6 klok moning, na taim kaikai i pinis mipela kalap long ol ka na go longwe inap olsem 50 kilomita long hap mipela bai wok long en. Mipela stap 8-pela aua long ples wok na bihain ol i karim mipela i go bek long kem.
Ol haus slip i bikpela inap wan handet man i ken stap long wanpela. Kaikai mipela kisim i no gutpela tumas, na haus yet i no gat planti samting i stap long en. Tasol i gutpela mi inap poromanim tupela narapela Witnes i wanhaus bilong mi. Na narapela i wok strong long strongim bel bilong narapela. Dispela em i narapela rot bilong Jehova long strongim bel bilong ol lain bilong em—em long pasin poroman i stap namel long ol wanbilip.—2 Korin 7:6.
I gat 12-pela Witnes i stap long kem. Na sampela i gat ol wantok i no kalabus, olsem na long pasin hait ol i salim ol pes bilong Wastaua long mipela insait long sampela karamap kaikai. Na planti taim ol woda bai opim karamap na skelim ol samting paslain long mipela i ken kisim. Tasol bilong haitim gut ol pes bilong Wastaua, ol i karamapim long plastik na putim insait long wanpela tin jem, na ol woda i no gat tingting long opim ol dispela tin. Taim mipela kisim ol pes bilong Wastaua, mipela raitim sampela kopi bilong ol na tilim namel long mipela yet.
Na tu, mipela wok strong long autim tok long Kingdom Bilong God, na Jehova i blesim wok bilong mipela. Olsem: Mi wok long toktok wantaim narapela wankalabus, em Sergei, em i bin lukautim mani bilong wanpela bisnis bilong gavman long hap is bilong Yukren. Taim pasin giaman bilong paulim mani i kamap ples klia long ples wok, ol i sutim asua i go long em na kot i makim em long stap kalabus inap 10-pela yia. Sampela Witnes i mekim wok long wanem ol magasin ol i ken kisim bilong stadi wantaim em. Sergei i laikim ol save em i kisim na bihain em i tokim mi olsem: “Taim mi lusim kalabus, mi laik baptais na kamap wanpela Witnes Bilong Jehova!” Orait bihain liklik long taim em i lusim kalabus, em i truim tok bilong em na i kisim baptais. Na em i stap gut long Jehova inap long em i dai.
Tupela Tingting Long Rom Sapta 13
Long Janueri 1963 mi lusim kalabus na go bek long ples bilong mi long Stenyatin. Wantu mi pilim olsem samting i no stret long kongrigesen bilong mipela long Sokal. Ol brata i no stap bel isi wantaim. Wanem hevi bilong ol? Wanem samting i kirapim pasin bilong holim tupela tingting?
Inap planti yia ol hetman bilong lain Soviet i laik bagarapim pasin wanbel i stap namel long lain bilong Jehova, olsem na taim ol i kisim sampela brata bilong givim askim long ol, ol i save tokim ol brata olsem oganaisesen bilong ol Witnes i giaman na mekim wok long ol bilong helpim gavman bilong Amerika tasol. Na ol hetman i tokim ol Witnes i stap long Soviet Yunion long kamapim oganaisesen bilong ol yet. Na tu, dispela bai helpim ol long stap wanbel wantaim gavman Soviet, na gavman bai larim ol i bihainim lotu bilong ol na bai i no gat pasin birua moa. Long pasin bilong grisim man ol hetman i kamapim ol dispela tok.
Orait Wastaua bilong Novemba 15, 1962 long tok Inglis i kamapim nupela tingting long Rom sapta 13, na bihain dispela tok i kamap long Wastaua bilong Yukren long Julai 1, 1964. Taim dispela nupela tok i no kamap yet, mipela gat tingting olsem ol “gavman” em ves 1 i stori long ol i makim God Jehova na Jisas Krais, tasol Wastaua i tok olsem “ol gavman” i makim ol gavman bilong graun, na “God yet i putim ol na ol i stap.”—Rom 13:1.
Sampela Witnes i gat hatwok long bilip long dispela nupela tingting, long wanem, ol bikman bilong gavman bilong Soviet Yunion i bin mekim pasin nogut tru bilong traim pinisim trupela lotu bilong God. Olsem na ol dispela Witnes i ting olsem dispela Wastaua i kamapim nupela tingting i no kam long oganaisesen tru bilong ol Witnes Bilong Jehova. Ol i ting sampela Witnes i pundaun na bihainim tok bilong ol hetman bilong gavman na kamapim nating tok bilong dispela Wastaua bilong kirapim ol lain Witnes long Soviet Yunion long bihainim olgeta tok bilong gavman Soviet.
Olsem na dispela i kamapim wanpela askim olgeta wokman bilong Jehova long Yukren i mas bekim: Wanem lain i stret na wanem lain i no stret? Mi luksave olsem ol Witnes i bruk long tupela lain long dispela samting, na mi askim mi yet, ‘Wanem as bilong tingting bilong ol?’ I no longtaim na mi inap luksave olsem tingting bilong tupela lain i narapela narapela.
Planti Witnes Bilong Jehova ol i laik stap gut long Jehova na oganaisesen bilong em, maski sampela i no klia tumas long nupela tingting bilong Rom sapta 13. Tasol sampela i wok long kisim tingting olsem ol nupela buk na nius samting bilong Sosaiti Was Taua i no kam long oganaisesen tru bilong ol Witnes Bilong Jehova. Na tu, ol dispela lain i gat narapela kain tingting olgeta long sampela narapela samting. Olsem: Ol i ting i no stret sapos meri i pasim waitpela klos long taim bilong marit na tupela marit i pasim ring bilong makim olsem ol i marit. Sampela i lusim oganaisesen long dispela taim. Tasol bihain planti liklik ol i tingim popaia bilong ol na ol i kirap gen na lotuim Jehova.
Ol i Wok Hait
Maski i gat tambu long ol wok Kristen bilong mipela, taim rot i op mipela i save bung olsem 10-pela o 15 manmeri bilong wokim ol miting bilong wik. Long ol miting mipela kisim strong long samting bilong spirit long rot bilong stadi long Baibel na long pasin bilong toktok gut wantaim ol brata sista taim stadi i pinis. Mipela bai stori long ol samting i bin kamap long mipela, na dispela i helpim mipela long save olsem mipela i karim wankain hevi. Mipela i pilim tru tok bilong aposel Pita, olsem: “Ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela.”—1 Pita 5:9.
Ol tok i stap long Wastaua i olsem as bilong ol samting mipela i stori long en long ol miting. Olsem wanem mipela kisim ol dispela nius? Sampela Witnes ol i wok hait na wokabaut longwe na brukim boda bilong karim ol liklik kopi bilong nius i kam long Yukren. Bihain ol liklik kopi bai i go long narapela narapela brata ol i makim pinis, na em bai i wokim ol kopi inap long kongrigesen bilong em. Sampela taim mi insait long dispela wok bilong wokim ol nius. Long san mi wok skin na long nait mi givim bel long mekim wok bilong Jehova na wokim kopi bilong ol nius na ol narapela samting. I hatwok long mekim ol dispela wok, tasol mipela ol lain i gat ol bikpela wok insait long oganaisesen i kisim save olsem Jehova “i save strongim ol man i no gat strong.”—Aisaia 40:29.
Mipela yet i kamapim rot bilong stori long Baibel long ol manmeri mipela bungim. Planti bilong mipela i mekim olsem taim mipela raun long ol bas. Bilong kirapim toktok, mipela ritim niuspepa na kamapim sampela stori bilong en long narapela pasindia. Taim toktok i kirap pinis, mipela bai stiaim tok i go long sampela tok bilong Baibel. Long dispela rot, tok bilong gutnius i wok long go long ol man i stap long hap bilong mipela.
Gutpela Meri Marit
Long 1965, mi maritim Tamara. Kirap long taim em i liklik em i lainim pasin bilong lotuim trupela God, na em i save pinis long pasin bilong holimpas bilip long taim bilong traim. Tripela taim brata bilong em Sergei i kalabus na kot long ol wok em i mekim olsem wanpela Witnes. Laspela taim ol i kisim em, ol i painim sampela Wastaua em i holim, olsem na kot i makim em long kisim kalabus inap long 10-pela yia. Na Tamara tu, ol polis i kisim em i go long hetkota bilong givim sampela askim long em na pretim em olsem em bai kalabus.
Taim mipela marit pinis mipela gat hatwok long painim haus mipela i ken stap long en, tasol wanpela famili i stap long Sokal i save mekim gutpela pasin long ol Witnes, na ol i tok mipela ken kisim wanpela liklik rum long haus bilong ol long liklik pe tasol. Na dispela famili i tokim mipela olsem Tamara i ken stap yet long dispela rum sapos polis i kisim mi na mi kalabus gen. Mitupela i tenkyu tru long dispela blesing bilong Jehova na long gutpela pasin bilong dispela famili. Taim wanpela long dispela famili i dai, Tamara i stori long pikinini meri, em Galina, long bilip olsem ol man i dai pinis ol bai kirap bek. Dispela tok bilong Baibel Tamara i planim i karim kaikai, na Galina i kisim pasin bilong laikim tumas dispela Man bilong wokim yumi. Em i kisim baptais, na nau em i mekim wok bilong Jehova wantaim man bilong em.
Long planti Sarere Sande bilong 1970 i go inap long 1979, mi raun long ol narapela narapela hap bilong Yukren, Moldova, na ol maunten Kapetian bilong bung wantaim na strongim bel bilong ol lain i olsem gopas insait long oganaisesen bilong Jehova. Mi save lusim haus long apinun long Fraide na kam bek long biknait long Sande. Planti taim Tamara i no save mi go long wanem hap, na sampela taim em i no save mi bai kam bek o nogat. Inap planti yia mi bihainim dispela pasin. Mi wanbel tru long dispela tok bilong Baibel i stori long gutpela meri marit: “Kain meri olsem i winim olkain ston i dia tumas.”—Sindaun 31:10.
Long dispela taim olgeta wok bilong mipela ol Witnes Bilong Jehova inap kamapim sampela hevi long mipela. Olsem na mipela inap mekim yet ol dispela samting long strong i kam long Jehova tasol. Planti taim i gat ol samting i kamap na mi no save mi bai mekim wanem. Olsem na mi bai beten long tingting na wetim Jehova i givim strong long mi. Dispela i kamap olsem pasin bilong mipela.—Aposel 4:29.
Ol Samting Bilong Nau
Isi isi ol hevi mipela ol lain bilong Jehova i karim long Yukren i go liklik na i no bikpela olsem bipo. Pasin birua i pinis liklik na ol i no kalabusim mipela moa, ol i makim mipela long baim kot tasol. Long 1985 samting ol hetman bilong Yukren i wok long kisim stretpela tingting olsem oganaisesen bilong ol Witnes Bilong Jehova i save stap long olgeta hap. Olsem na taim gavman i kalabusim ol Witnes long Yukren na ol narapela hap bilong Soviet Yunion, gavman i kisim nem nogut long ai bilong ol narapela kantri. Mi ken tingim yet tok wanpela hetman i mekim taim em i givim sampela askim long mi, em i tok olsem: “Nau mipela save olsem lotu i no samting nogut. Namba wan samting mipela tingting long en i olsem lotu i no ken bagarapim gavman.”
Long 1988 samting ol kantri bilong Isten Yurop i no pasim moa ol man long mekim ol samting ol i laik mekim, na kirap long dispela taim mipela i stap fri liklik long mekim ol samting long Yukren. Long 1991, lo bilong gavman i orait long mipela long autim tok. Na long Septemba 1998, Sosaiti Was Taua i kamapim wanpela brens-ofis long Lavif. Long kirap bilong 1999, ol i kirapim wok bilong wokim wanpela nupela brens-ofis i bikpela inap long 170 manmeri i ken wok long en. Nau long Yukren namba bilong ol lain i insait long wok autim tok i winim 112,000, na winim 250,000 i bin go long Memorial bilong yia 2000. Bikpela samting tru planti man i lukim em namba bilong ol yangpela i save bung wantaim mipela. Long wanpela kibung long 1991, wanpela niusmeri i givim dispela askim long mi:
“Ol dispela manmeri i kam long we? Mi bin ting olsem i no gat ol Witnes long Soviet Yunion, tasol i olsem wantu planti tausen i stap!”
Mi tokim em: “Mipela i no kamap wantu tasol. Inap planti yia mipela stap na mekim wok bilong Jehova.”
Na em i laik save: “Wanem samting i mekim na planti yangpela i laik insait long lotu bilong yupela?”
“Em bai gutpela moa sapos yu givim dispela askim long ol yangpela yet. Na ol i ken tokim yu long wanem as na ol i laik lotuim Jehova.”
Dispela niusmeri i tok: “Mi askim ol pinis na ol i tokim mi olsem ol i amamas long mekim.”
Na mi tok: “Em nau, yu save long as na ol i mekim. Sapos ol yangpela bilong mipela i bin tok olsem, yu ken save em as tru bilong dispela samting.”
I no ol yangpela tasol i kisim amamas long bihainim laik bilong Jehova. Taim mitupela Tamara i bungim ol yia mipela i bin mekim wok bilong Jehova, dispela i winim 80 yia, na mipela i no gat tingting liklik long lusim bilip bilong mipela. Na maski mipela i Witnes Bilong Jehova, mipela i gat ol hevi tu. Mipela save, insait long dispela taim nogut yumi stap yet long en, olgeta man bai gat sampela hevi long karim. Tasol mipela i gat ol samting bilong helpim mipela long karim ol hevi, winim ol narapela lain long graun. Mipela redi long sanap strong long taim bilong ol traim olsem mipela i bin mekim long bipo, long rot bilong strong i kam long Jehova, em God i gat olgeta strong. Mipela i gat wankain tingting olsem Moses i gat taim em i bin singim song bilong winim pait: “Bikpela yet i save mekim mi strong . . . Em i save kisim bek mi.”—Kisim Bek 15:2.
[Piksa long pes 22]
Mi wantaim ol narapela Witnes long kalabus 21
[Piksa long pes 22]
Liklik kopi bilong “Wastaua” bilong Yukren (mak tru bilong en)
[Piksa long pes 23]
Mi wantaim meri bilong mi, Tamara
[Piksa long pes 24, 25]
Em piksa bilong brens-ofis long Lavif, nau ol i wokim i stap
[Ol Piksa long pes 25]
Wanem samting i mekim na planti yangpela long Yukren i lotuim Jehova?