Nius i Helpim Em Long Abrusim Bagarap
Nius “Kirap!” (tok Inglis) bilong Disemba 22, 1999, i stori long pasin bilong stilim man (“Kidnapping—Why a Global Threat”). William Louis Terrell i tok dispela stori bilong “Kirap!” i bin helpim em long abrusim bagarap.
BIHAIN liklik long 10 klok moningtaim long Fraide, Mas 10, 2000, Joseph C. Palczynski, Jr., em i makim gan long Terrell na i kisim em long haus bilong em. Terrell i tok, long taim bilong dispela hevi em i bin tingim bek ol stori bilong Kirap!—ol i kamapim sampela gutpela tok bilong helpim ol man em ol narapela i bin stilim ol. Nius i tok olsem:
“Wok gut wantaim; no ken tok pait na sakim man i holim yu. Planti taim ol man bilong tok pait i save kisim bikpela hevi moa, na ol man i holim ol inap kilim ol o givim strafe long ol.
“No ken pret. No ken lusim tingting olsem planti man em kain samting olsem i painim ol, ol i save abrusim bagarap.”
“Mekim sampela tok nating, olsem yu laik mekim pasin pren long em. Sapos ol i lukim olsem yu mekim gut long ol, ating ol bai i no inap long bagarapim yu o kilim yu i dai.
“Long gutpela pasin toksave long ol [man i holim yu] long ol samting yu mas kisim.”
“Pasin bilong toktok gut wantaim i save helpim ol man long abrusim ol bikpela hevi, olsem buk Criminal Behavior i tok: ‘Sapos man i kisim hevi na man i givim hevi i save gut long narapela narapela, dispela bai i kirapim tupela long laikim moa yet narapela narapela. Dispela samting i mekim na bihain man i givim hevi planti taim em bai i no inap mekim nogut long man em i holim.’ ”
William Terrell, em i gat 53 krismas na em i wanpela Witnes Bilong Jehova, em i bin wok strong tru long bihainim ol dispela gutpela tok taim Palczynski i bin holim em inap 14 aua, na klostu long olgeta taim man hia i bin makim gan long em. Dispela samting i bin kamap bihain liklik long taim Palczynski i paitim dua bilong haus bilong Terrell long wanpela ples i stap longwe liklik long biktaun klostu long wanpela bikpela rot (Interstate Highway 95), em long dispela hap bensin i pinis long ka em Palczynski i bin stilim.
Bihain long Terrell i kisim save long hevi bilong Palczynski, em i tokaut olsem em bai helpim Palczynski. Palczynski i askim Terrell long givim wanpela kap wara long em na draivim em i go long Baltimo, Merilan, Amerika. Terrell i tok em bai i stretim rot na bai wanpela man i draivim Palczynski i go long taun Frederiksbek, Vejinia, na long dispela hap em i ken kisim bas i go long haus bilong em. Taim Terrell i kam bek bilong givim kap wara long dispela man em i no save long em, dispela man i makim gan long em. Palczynski i tok strong long Terrell olsem em i mas draivim em i go long hap em laik i go long en.
Bihainim Ol Gutpela Tok
Taim tupela i draiv long hap bilong dispela bikpela rot, Terrell i bihainim ol tok bilong Palczynski long spit long wankain mak na em i no ken draiv long pasin em inap long pulim ai bilong ol man. Terrell i stap isi, na em i kirapim Palczynski, em i gat 31 krismas, long toktok wantaim em, na em i kamapim olsem em i tingim Palczynski na em i sori tru long dispela hevi i kamap na nau Terrell i bungim em. Palczynski i stori olsem tripela de paslain em i bin i go long lukim gelpren bilong em Tracy, tasol Tracy i no laik pren moa wantaim em. Long dispela hap em i kilim i dai tupela pren bilong Tracy na wanpela man i laik pasim em long kisim Tracy i go wantaim em. Bihain Tracy i ranawe.
Long de bihain long apinun, taim Palczynski i laik stilim wanpela ka, wanpela katres long gan bilong em i kisim wanpela pikinini man i gat 2-pela krismas na i brukim wasket bilong em. Na tu, wanpela katres bilong em i sut long ka em Jennifer Lyn McDonel i draivim. Sori tru, katres i kilim em i dai na narapela katres i sutim sia bilong pikinini bilong em i gat wanpela krismas—sia i stap nating na pikinini i no sindaun long en. Jennifer wantaim man bilong em, Thomas, tupela i laik go long Haus Kingdom bilong ol Witnes Bilong Jehova, na tupela wantaim i gat ol tok samting bilong mekim long miting. Mama bilong Jennifer, em Sarah Francis, i tok: “Dispela nait tasol tupela i no bin kisim bebi i go long Haus Kingdom. Sapos tupela i bin kisim em tu i go, mipela bai krai long tupela wantaim.”
Taim Terrell i wok yet long toktok wantaim man i holim em, Palczynski i tok olsem em i no bin tingting long bagarapim wanpela man, na em i laikim tru Tracy na em i laik stap wantaim em. Terrell i tok: “Mi tokim em olsem em bai i no inap long senisim ol samting i kamap pinis, tasol em inap long senisim ol samting bai i kamap bihain, na mi strongim em long em i mas givim em yet long han bilong polis. Mi tokim em olsem mi bai go lukim em long haus kalabus na stadi long Baibel wantaim em.” Bihain ol i stori olsem kirap long taim Palczynski i pinisim haiskul long 1987 na i kam inap long dispela taim, em i bin stap long kalabus o long ol haus sik bilong ol man i gat sik longlong, o ol i larim em long stap long haus bilong em yet tasol ol i putim sampela tambu long em—inap 10-pela mun tasol em i bin i stap fri.
Terrell i mekim wok elda inap planti yia pinis, na em i mekim wok long gutpela save bilong em olsem elda bilong helpim dispela yangpela man i gat sik long tingting—em i kamapim sampela stori bilong Baibel long ol samting i bin kamap tru. Olsem: Em i kamapim stori bilong wanpela gutpela man, em King Devit bilong Israel, olsem Devit i bin kisim tingting nogut long meri bilong Uria, em i wanpela soldia long ami bilong em. Taim meri bilong Uria i kisim bel long Devit, Devit i stretim rot na bai Uria i dai long pait. Taim ol i kamapim dispela rong long em, em i tanim bel tru na God i orait gen long em.—2 Samuel 11:2–12:14.
Terrell i mekim gutpela pasin pren long dispela ranawe man, na em i kolim em long nem giaman bilong em, Joby. Taim tupela i pasim ka long wanpela stua na Palczynski i salim Terrell long baim kaikai na wanpela liklik televisen em ol inap karim raun, Palczynski i tok em bai kilim i dai planti manmeri moa sapos Terrell i traim long toksave long ol man. Terrell i luksave olsem tingting na bel bilong dispela ranawe man i no i stap isi, olsem na em i bihainim ol tok bilong em. Bihain, taim tupela i lukim pinis nius long 11 klok, em ol i stori long ol samting nogut Palczynski i bin mekim, Palczynski i holimpas Terrell na em i lusim em na i go insait long wanpela hap bilong taun long Baltimo.
Wanpela wik bihain, ol i banisim Palczynski long wanpela haus em i bin holim sampela man long en. Ol i singautim Terrell, em dispela ranawe man i stori long em, bilong kam na helpim ol long stretim sampela tok. Tasol sori tru, ol i no inap stretim ol samting, na long Mas 22, ol polis i sutim Palczynski long gan na em i dai, em long taim ol i laik go insait long dispela haus. I no gat narapela man moa i kisim bagarap.
Bihain Terrell i kisim 600 nius Kirap!, em dispela nius i bin helpim em long abrusim bagarap. Em i lusim pinis sampela handet bilong dispela nius long ol narapela man. Terrell i amamas tru olsem long olgeta taim em i save kaunim ol gutpela stori bilong nius Kirap!, na mipela i ting olsem yu tu bai amamas sapos long olgeta taim yu kaunim dispela nius.
[Piksa long pes 26]
William Terrell