Pas Bilong Ol Man

Amamas Long Kaunim Kirap!  Maski mi bilong misin AOG (Assembly of God), mi save kaunim nius Kirap! Mi no bin kaunim wanpela narapela nius i nambawan tru na i gat planti kain kain stori long en olsem Kirap! Mi no gat televisen long haus, tasol planti taim mi inap toktok wantaim ol pren bilong mi long ol samting i kamap long nau, long wanem mi bin kisim save long en long nius bilong yupela.

A. B. A., long Brasil

Rausim Gut Mausgras  Stori “Rausim Gut Mausgras” (Februeri 8, 2000) i kamap long taim stret long mi. Nau man bilong mi i no inap long lukautim em yet, olsem na em i no inap long rausim mausgras bilong em. Tasol fopela gutpela tingting bilong bihainim long taim bilong sev em yupela i kamapim, i bin helpim mi tru. Nau em i laik bai mi rausim mausgras bilong em long olgeta de!

L. D., long Jemani

Tok Giaman  Stori “Baibel i Tok Wanem? I Stret Sampela Taim Yumi Ken Mekim Tok Giaman?” (Februeri 8, 2000) i bin kirapim tru tingting bilong mi. Tasol Baibel i save tambuim olgeta kain tok giaman, a?

D. S., long Amerika

Long Baibel, tok giaman i makim olsem yu mekim wanpela tok i no tru long wanpela man i stret long em i mas save long tok tru, na yu mekim olsem bilong giamanim em, o bilong givim hevi long em o long narapela man. Ol man i pret long God olsem Abraham, Aisak, Rahap, na Devit, ol i bin insait long sampela kain pasin giaman, tasol Baibel i no tok olsem ol i lain bilong mekim tok giaman. Ol i bin mekim tok giaman taim narapela kain samting i bin kamap. Olsem na pasin bilong ol i no makim olsem ol Kristen i ken mekim nating ol tok giaman. Olsem: Sapos wanpela Kristen i tok tru antap long em bai i mekim tok tru tasol long kot, orait em bai mekim tok tru o em i no mekim wanpela tok.​​—⁠Edita.

Ol Famili i No Gat Papa  Kirap! bilong Februeri 8, 2000, i bin stori long ol famili i no gat papa. (“Ol Famili i No Gat Papa​​—⁠Rot Bilong Pinisim Dispela Hevi”) Mi bel hevi na kros tru taim mi kaunim pinis dispela stori. Yupela i orait long pasin bilong ol papa i lusim famili taim yupela i kamapim sampela hevi bilong ol, olsem kot i orait long ol i ken go lukim pikinini o nogat na ol hevi bilong ol long mani. Olsem wanem? Yupela i mekim sampela strongpela tok bilong stretim ol? Yupela i mekim sampela tok bilong kirapim ol long stretim pasin kranki bilong ol?

S. L., long Amerika

Mipela i pilim tru hevi bilong sampela taim ol i kaunim dispela stori, na ating ol i bel hevi tru sapos papa i bin lusim ol. Tasol mipela i no raitim dispela stori bilong givim strongpela tok long ol man i mekim dispela pasin. Nogat, mipela i laik kirapim ol papa na mama long save gut long tingting na hevi bilong narapela narapela. Na tu, mipela i kamapim ol gutpela tok bilong helpim ol lain em papa i bin lusim ol. Laspela stori bilong ol dispela stori, “Ol Famili i No Gat Papa​​—⁠Rot Bilong Pinisim Dispela Hevi,” i kamapim wanpela tok olsem: “Sapos ol manmeri i redi long senisim tru tingting na pasin bilong ol, ol famili i no gat papa o mama i no ken kamap planti.”​​—⁠Edita.

Aiwara i pulap long ai bilong mi, taim mi lukim karamap bilong nius i soim piksa bilong wanpela liklik pikinini meri wantaim papa bilong em. Long olgeta taim mi bin laik tru long pas gut olsem wantaim papa bilong mi. Dispela stori i helpim mi long traim long save gut long as na ol samting i bin kamap insait long famili bilong mi. Em i kain olsem lait bilong san i kamapim klia ol samting i bin kamap bipo, na i bekim ol askim mi bin tingting long ol inap planti yia.

M. M., long Amerika