Ol Yangpela i Laik Save . . .

Bilong Wanem Papa i Lusim Mipela?

“Mi no bin save gut long as na papa i lusim mipela. Mi bin save long ol samting mama i kamapim na em tasol.”​—⁠Jems.a

TAIM papa i kisim olgeta samting bilong em na lusim famili, planti taim dispela i mekim na famili i bagarap long pasin bilong stap bel hevi na bel nogut. Jems, em i gat 14 krismas, em i kamapim dispela tok antap wantaim sampela tok moa, olsem: “Bel bilong mi i bagarap stret taim papamama i katim marit bilong ol.” Na taim wanpela papa i lusim famili na em i no kamapim as bilong dispela samting na em i no tingim ol moa, ol pikinini bilong em inap karim hevi inap planti yia long pasin bilong bel nogut, na long tingting olsem em i asua bilong ol yet na papa i lusim ol, na papa i no laikim ol.b

Sapos papa bilong yu yet i bin lusim famili, ating as bilong dispela samting i stap ples klia. Wanpela yangpela nem bilong em Maikel, em i tok: “Papa i lusim mipela bilong stap wantaim narapela meri. Wanpela taim mi lukim papa i raun wantaim dispela meri, na dispela i mekim na mi belhat. Mi pilim olsem papa i givim baksait long mipela.” Tasol sampela taim i olsem famili i kisim malolo taim papa i lusim ol. Papa bilong Melisa i save dring planti tumas, na Melisa i tok: “Sapos em i no bin lusim mipela, mipela bai karim bikpela hevi moa.”

Tasol planti taim ol pikinini i no save liklik long as na papa i lusim ol, na dispela inap mekim na ol pikinini i bel hevi moa yet taim ol i no lukim em long haus. Ating yu save pinis olsem papamama i no sindaun gut wantaim, tasol yu no bin tingting liklik olsem marit bilong ol bai bruk. Robert i tok: “Taim papa i lusim mipela, mi no bin save long olgeta hevi bilong papamama. Mi save em ol samting nogut, long wanem, tupela i wok long tok pait long olgeta taim.”

Bilong wanem sampela papa i save lusim famili? Sapos papa i lusim yupela pinis, yu ting i stret long pilim olsem em i givim baksait long yu? Na ating i gat wanem as na papamama i no gat laik long kamapim planti stori tumas long dispela samting? Ating i stret ol i stori gut long yu long as bilong dispela samting, a?

Bilong Wanem Ol i No Tokaut?

Maski i gat wanem as na papa i lusim famili, dispela i no samting bilong amamas. Planti taim pasin pamuk i as bilong en​—⁠em i pasin nogut ating papa i bin wok strong tru long haitim. Taim meri i painimaut olsem man bilong em i bin mekim olsem, em inap katim marit sapos em i laik. Ating em bai askim man bilong em long lusim famili taim ol pepa bilong katim marit i no redi yet. Na ating ol pikinini i no save liklik long as bilong ol dispela samting.

Tasol i gutpela long tingim as na mama i no laik tokaut long olgeta samting i bin kamap. Ating wanpela as i olsem em i ting pasin bilong tokaut long rong bilong papa bai kamapim bikpela bel hevi moa. Na tu, yu mas save, meri i save kisim bikpela bel hevi taim em i painimaut olsem man i no bin stap gut long em. (Malakai 2:​13, 14) Olsem na sapos pasin pamuk i as na papamama bilong yu i katim marit, no ken kirap nogut taim mama i bel hevi tumas na i no laik toktok long dispela samting.

Olsem wanem long papa? Sapos em i no bin stap gut long mama, ating em bai i no inap toktok wantaim yu long dispela samting. Bel bilong sampela man i kotim ol nogut tru long rong ol i mekim na ol i pilim olsem ol i no inap lukim pikinini bilong ol! Tasol maski ol i bihainim sampela pasin bilong sem long en, planti papa i laikim yet ol pikinini bilong ol na ating ol bai stretim rot bilong lukim ol gen.

Sampela taim papa i lusim famili, long wanem, meri i mekim sampela pasin i no stret. Taim samting olsem i kamap man i save wok strong long pas gut yet wantaim ol pikinini bilong em. I no olgeta taim pasin pamuk i as na marit i bruk, nogat. Sampela taim pasin bilong tok pait inap planti yia i kirapim tupela long katim marit.c (Sindaun 18:24) Planti taim ol tok pait i save kamap taim papamama tasol i stap, na ating yu no save liklik long samting tupela i tok pait long en.

Long Sindaun 25:9 Baibel i tok: “Sapos yu gat tok long wantok bilong yu long wanpela samting, orait yu mas i go na stretim tok wantaim dispela wantok yet. Tasol . . . yu no ken autim dispela tok.” Sampela taim kros namel long tupela marit i samting bilong tupela tasol long save long en. Na maski yu gat narapela tingting, i gutpela sapos yu no harim stori bilong ol kain samting olsem. Na tu, planti taim pasin bilong kamapim sampela tok hait bilong narapela i save mekim hevi i go bikpela moa. Sapos yu save long as bilong hevi bilong papamama, dispela inap mekim na bai yu gat tingting long helpim tok bilong papa o helpim tok bilong mama​—⁠dispela bai brukim famili moa yet. Olsem na ating em bai i helpim yu sapos papamama i no kamapim as bilong kros i stap namel long tupela yet.

Gutpela Tingting i Daunim Bel Nogut

Tru, i hatwok long daunim belhat na pasin bilong bel nogut taim papa i lusim famili pinis na yu no inap bekim dispela askim, Bilong wanem em i go? Tasol Sindaun 19:11 i tok: “Man i gat gutpela tingting, em i no inap kros kwik [dispela i no makim olsem em i no inap kros].” Na i no olsem yu mas save long olgeta samting bilong papamama na bai yu inap bihainim gutpela tingting.

Tok i stap long Baibel i helpim yumi long save olsem papamama bilong yumi i no gutpela olgeta. Baibel i tok: “Olgeta man i bin mekim sin, na olgeta i no inap i stap olsem piksa i soim biknem na strong bilong God.” (Rom 3:​23, NW ) Taim yu bilipim dispela tok, dispela i ken helpim yu long kisim stretpela tingting long ol popaia bilong papamama. Olsem na sapos papa bilong yu i brukim tok promis bilong em long stap gut long marit, dispela em i wanpela bikpela rong​—⁠em wanpela rong God i gat tok long en. (Hibru 13:⁠4) Tasol dispela i no makim olsem em i givim baksait long yu o em i no laikim yu.

Olgeta “manmeri i marit bai i painim planti hevi long laip bilong ol.” (1 Korin 7:28) Tru, i no gat gutpela as long mekim olsem, tasol ol hevi bilong dispela graun i ken mekim na sampela man na meri i save pundaun long sampela pasin i no stret. Robert i tok: “Papa i laik bai mipela i gat olgeta gutpela samting. Em i kisim famili i go stap long narapela hap em i ting olsem em bai inap kisim gutpela wok mani moa na bai mipela inap kisim gutpela haus na stap amamas.” Tasol i no longtaim na dispela gutpela laik bilong papa long helpim sindaun bilong famili long kamap gutpela moa i paul. Robert i tok: “Papa i no wok strong long go long ol miting olsem em i bin mekim bipo. Bihain ol i pinisim em long wok mani bilong em. Na bihain liklik em i kirap na givim hevi long mama na susa bilong mi.” I no longtaim na ol samting i go nogut moa na papamama bilong em i katim marit.

Bel bilong Robert inap bagarap stret long ol popaia bilong papa. Tasol pasin bilong bihainim gutpela tingting long ol samting i bin kamap long papa i helpim Robert long daunim pasin bilong bel nogut. Tru, i no gutpela liklik long papamama i katim marit, tasol dispela i skulim Robert long wanpela bikpela samting. Robert i tok: “Taim mi kamapim wanpela famili, ol samting bilong spirit i mas i stap nambawan samting long mipela.”

Maikel, em pastaim yumi bin stori long em, em tu i bin wok long daunim pasin bilong bel nogut. Em i tok: “Pasin papa i wokim long mipela, dispela i mekim na pastaim mi laik mekim samting bilong givim bikpela bel hevi long em.” Tasol Maikel i wok long pas yet long papa bilong em. Na isi isi em i lusim pasin bilong bel nogut long papa, na em i tingim ol samting bilong em yet long mekim.

Sapos rot i op, em bai i gutpela long traim bihainim yet pasin bilong i stap gut long papa bilong yu. Tru, ating em i givim hevi long yu na mama bilong yu. Tasol nogut yu no save long olgeta samting i bin kamap. Na maski yu save em i gat asua long sampela rong, em i stap yet olsem papa bilong yu. Yu gat wok long stap daun long em. (Efesus 6:​1-3) Abrusim pasin bilong “bel nogut na kros na belhat na bikmaus na tok bilas” taim yu bung wantaim em. (Efesus 4:31) Sapos yu inap, no ken insait long kros bilong papamama long samting bilong tupela marit tasol. Sapos yu wok long mekim gut bel bilong papamama olsem yu laikim ol tru, dispela inap helpim yu long pas gut long tupela wantaim.

I No Asua Bilong Yu

Long i stap bilong yu ating bai i no gat narapela bikpela hevi i winim dispela hevi yu karim taim papa i lusim famili. Tasol maski yu no painimaut olgeta samting i olsem as na papa i lusim yupela, yu no ken ting yu yet yu gat asua long dispela samting. Yu inap ting olsem papa i no laikim yu na em i lusim yupela. Tasol ol marit i no save bruk long ol samting ol pikinini i mekim. Papamama bilong yu i bin tok promis long ai bilong God olsem tupela bai stap wantaim. Na em wok bilong tupela long truim tok promis bilong ol​—⁠i no wok bilong yu.​—⁠Saveman 5:​4-6.

Sapos yu bel hevi yet na pilim olsem tingting bilong yu i paul, o em asua bilong yu na ol samting i kamap, mobeta yu tokim papamama, a? Ating tupela bai kamapim bel bilong ol na mekim ol tok i strongim bel bilong yu, em yu no save. Jems, em yumi kisim sampela tok bilong em long kirap bilong dispela stori, em i tok: “Bipo mi bin ting olsem mi yet mi gat asua, tasol dispela tingting i pinis taim papamama i bin toktok gut wantaim mi.” Na tu, bel i kotim yangpela meri Nansi taim marit bilong papamama bilong em i bruk. Orait taim em i toktok wantaim mama bilong em planti taim, Nansi i kisim tingting olsem: “Ol pikinini i no ken ting ol yet i gat asua long ol samting papamama i mekim.” Tru tumas, taim yu larim papamama i mekim ol samting em i wok bilong tupela long mekim, dispela inap helpim yu na bai yu no kisim bikpela bel hevi tumas. (Galesia 6:⁠5) Tasol yu ken mekim wanem bilong karim hevi bilong famili i no gat papa? Wanpela stori bihain bai kamapim sampela bekim bilong dispela askim.

[Ol Futnot]

[Piksa long pes 15]

No ken ting yu gat asua long ol hevi bilong marit bilong papamama