Ol Yangpela i Laik Save . . .

Papa i Lusim Mipela Pinis na Olsem Wanem Mi Inap Karim Dispela Hevi?

“Mi go bikpela taim papa i lusim mipela pinis na dispela i hatwok tru. Mi laik bai papa i tingim mi.”​​—⁠Henry.a

JOAN i gat 13 krismas taim papa i lusim famili. Papa i kalabus long dring, olsem na taim em i lusim ol pinis em i no tingting tumas long save long i stap bilong ol pikinini bilong em. Sori tru, i no Joan tasol i karim dispela hevi, nogat; i gat planti yangpela long nau em papa i bin lusim ol.

Sapos kain hevi olsem i bin kamap long yu, ating yu pilim olsem i hatwok tru long karim dispela hevi. Sampela taim tingting bilong belhat na kros bai kamap long yu. Na ating sampela taim bai yu pilim bel hevi tru. Na tu, yu inap tingting long bikhet. Olsem man bilong raitim Baibel, em Solomon, i tok: “Taim ol i mekim nogut long wanpela man na daunim em, maski em i gat gutpela tingting, em bai kirap mekim pasin kranki.”​​—⁠Saveman 7:⁠7, NW.

“Mekim Pasin Kranki”

James i “mekim pasin kranki” bihain long taim papa bilong em i lusim ol. James i tok: “Mi no harim tok bilong ol man i mekim wok bos, na mi no harim tok bilong mama bilong mi. Mi insait long planti pait. Olgeta taim mi save tok giaman na mi save hait na lusim haus long nait, long wanem, i no gat man bilong stretim mi. Mama i traim long pasim mi long mekim ol dispela pasin, tasol em i no inap.” Yu ting pasin bikhet i helpim i stap bilong James? Nogat tru! James i tok, bihain liklik em i kirap long “kisim ol drak, na em i lusim skul sampela taim, na em i no winim ol tes long skul.” I no longtaim na em i mekim ol bikpela rong. Em i tokaut olsem: “Mi stilim ol samting long ol stua na mi hansapim ol man. Tupela taim polis i holim mi na inap sotpela taim ol i putim mi long kalabus, tasol dispela i no pasim mi.”

Taim mipela i askim em long wanem samting i mekim na em i bikhet, James i tok: “Papa i lusim mipela, olsem na i no gat man bilong stretim mi. Mi no tingim ol hevi mi putim long mama na liklik brata na susa bilong mi, na mi yet. Mi laik bai papa i tingim mi na stretim pasin bilong mi.”

Tasol pasin bikhet bai kamapim planti hevi moa. (Jop 36:​18, 21) Olsem: Pasin bikhet James i mekim i no kamapim tasol hevi long em yet, nogat; mama na liklik brata na susa bilong em tu ol i karim hevi long pasin em i mekim. Na samting i nogut moa em olsem, pasin bikhet inap mekim na man i no stap wanbel wantaim God. Long wanem, Jehova i tokim ol yangpela long bihainim tok bilong mama bilong ol.​​—⁠Sindaun 1:8; 30:⁠17.

Daunim Belhat

Olsem wanem yu inap daunim tingting bilong belhat na kros yu holim long papa bilong yu? Namba wan samting em olsem: Yu mas ting olsem em i no asua bilong yu na papa i lusim yupela. Na tu, dispela i no makim olsem em i no laikim yu o tingim yu moa. Tru, bai yu bel hevi taim papa i no ringim yupela o kam lukim yupela. Tasol olsem yumi lukim pinis long stori i kamap long nius paslain long dispela,b planti papa ol i no save lukim moa ol pikinini bilong ol, long wanem, ol i pilim olsem ol i gat bikpela asua na ol i sem long pasin ol i bin mekim, na i no olsem ol i no laikim moa ol pikinini bilong ol. Sampela narapela, olsem papa bilong Joan, ol i kalabus long ol drak o dring samting, na dispela i pasim ol long bihainim stretpela pasin.

Maski wanem wanem samting i kamap, yu mas save olsem papamama bilong yu ol i no gutpela olgeta. Baibel i tok: “Yumi olgeta man yumi bin mekim sin, na yumi no inap i stap wantaim God long heven.” (Rom 3:​23; 5:​12) Tru, dispela i no givim rot long yumi long mekim ol pasin i bagarapim bel bilong narapela o pasin bilong mekim nabaut long ol samting. Tasol taim yu luksave olsem yumi olgeta i gat sin, dispela inap helpim yu long daunim ol tingting bilong kros na belhat.

Tok bilong Saveman 7:​10 inap helpim yu long daunim ol tingting bilong kros na belhat em yu holim long papamama bilong yu. Tingim tok lukaut dispela skripsa i kamapim long pasin bilong tingim bek i stap bilong yu long bipo, olsem: “Yu no ken tok, ‘Olsem wanem na taim bipo i winim dispela taim nau?’ Sapos yu mekim kain tok olsem, yu no gat gutpela save.” Olsem na i gutpela moa yu no tingting tumas long i stap bilong yu long bipo, tasol yu tingting long mekim ol samting na yu ken stap amamas long nau.

Kirap Mekim Ol Samting

Olsem: Ating yu ken tingting long mekim ol samting bilong bungim papa bilong yu. Tru, papa yet i bin lusim yu, olsem na i stret yu ting em yet i mas mekim ol samting bilong kam lukim yu. Tasol sapos em i no mekim olsem na yu bel hevi long wanem yu no lukim em, orait yu ting yu inap mekim ol samting bilong daunim dispela hevi ? Tingim ol samting Jisas Krais i bin mekim taim sampela pren i bagarapim bel bilong em. Long laspela nait bilong em long i stap olsem man long graun, ol aposel bilong em i lusim em. Pastaim Pita i hambak na tok, maski wanem samting i kamap em bai stap yet wantaim Jisas. Tasol bihain Pita i tokaut olsem em i no save long Jisas​​—⁠na em i no mekim wanpela taim tasol, nogat; em i mekim tripela taim!​​—⁠Matyu 26:​31-​35; Luk 22:​54-​62.

Tasol Jisas i laikim yet Pita, maski Pita i mekim pasin kranki. Taim Jisas i kirap bek pinis, Jisas i go pas long mekim ol samting bilong kamapim gen pasin pren wantaim Pita, na em i kamap long Pita. (1 Korin 15:⁠5) Taim Jisas i askim Pita olsem: “Yu laikim mi?” Pita i bekim tok olsem: “Yes, Bikpela, yu save, mi laikim yu.” Maski em i mekim dispela samting nogut tru, Pita i laikim yet Jisas.​​—⁠Jon 21:⁠15.

Olsem dispela stori bilong Pita na Jisas i kamapim, ating i gat rot bilong stretim hevi i stap namel long papa na yu. Ating em bai mekim sampela samting sapos yu ringim em, o salim pas long em, o yu go lukim em. Henry, em yumi toktok long em long kirap bilong dispela stori, em i tok: “Mi salim wanpela pas long papa bilong mi, na em i salim pas i kam long mi na em i tok olsem em i amamas long mi. Mi hangamapim dispela pas long banis bilong haus inap planti yia. Na dispela pas i stap yet wantaim mi inap long nau.”

Joan na ol brata susa bilong em ol tu i mekim ol samting bilong lukim papa bilong ol, em man bilong dring oltaim. Joan i tok: “Em i no stap gutpela tumas, tasol mipela i amamas long lukim em.” Ating sapos yu kirap mekim ol samting, dispela inap kamapim gutpela samting. Sapos pastaim i no gat gutpela samting i kamap, orait yu ken larim sampela hap taim i lus na bihain yu ken traim gen.

Karim Hevi

Solomon i kirapim yumi long tingim olsem i gat “taim bilong painim samting i lus na taim bilong lusim samting.” (Saveman 3:⁠6) Sampela taim wanpela yangpela i mas save olsem papa bilong em i no laik pas moa wantaim ol pikinini bilong em. Sapos papa bilong yu i kain man olsem, ating wanpela taim bihain em bai luksave olsem em i bin lusim planti gutpela samting taim em i no laik pas moa wantaim yu.

Tasol yu mas save olsem maski papa i lusim yu, dispela i no makim olsem yu no gutpela moa. Man bilong raitim Song long Baibel, em Devit, i tok: “Maski papa na mama i givim baksait long mi, Bikpela bai i lukautim mi.” (Song 27:10) Tru tumas, yu olsem gutpela samting tru long ai bilong God.​​—⁠Luk 12:​6, 7.

Olsem na sapos yu bel hevi, yu mas go klostu long God long rot bilong beten. (Song 62:⁠8) Tokim em long olgeta samting yu pilim long bel. Yu inap bilip tru olsem em bai harim beten bilong yu na mekim gut bel bilong yu. Narapela man bilong raitim Song long Baibel em i tok: “Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.”​​—⁠Song 94:⁠19.

Na tu, pasin bilong pas gut wantaim ol wanbilip Kristen inap helpim yu long karim kain hevi olsem. Sindaun 17:17 i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.” Yu inap painim kain gutpela poroman olsem insait long kongrigesen Kristen bilong ol Witnes Bilong Jehova. Yu inap kisim helpim tu sapos yu wok long save long sampela elda insait long kongrigesen. Brata bilong Joan, em Peter, em i tok olsem: “Toktok wantaim ol brata sista long kongrigesen em ol i gat bikpela krismas liklik na ol bai helpim yu gut. Sapos papa bilong yu i bin lusim yu, yu mas tokim ol long ol tingting bilong yu.” Ol elda long kongrigesen inap givim sampela gutpela tok bilong helpim yu long mekim sampela wok em papa bilong yu i bin mekim bipo, olsem ol wok bilong stretim haus samting.

Mama bilong yu tu inap long helpim yu. Tru, ating em yet i gat bikpela bel hevi tru. Tasol sapos long gutpela pasin yu kamapim ol tingting bilong yu, em tu bai mekim olgeta samting em inap long mekim bilong helpim yu.

Helpim Famili Bilong Yu!

Taim papa i lusim yupela, dispela inap mekim sampela samting long i stap bilong famili bilong yu. Ating mama bilong yu i mas kisim wanpela wok mani​​—⁠o sampela taim em i mas mekim tupela wok mani​​—⁠bambai em inap long lukautim famili. Yu na ol brata susa bilong yu i mas mekim sampela wok moa bilong haus. Tasol yu inap karim dispela hevi sapos yu kamapim pasin Kristen bilong givim bel bilong yu long ol narapela. (Kolosi 3:​14) Dispela inap helpim yu long bihainim stretpela tingting oltaim na daunim pasin bilong belhat. (1 Korin 13:​4-7) Peter i tok: “Mekim ol samting bilong helpim famili bilong mi em i stretpela samting bilong mekim, na mi amamas long save olsem mi wok long helpim mama na ol susa bilong mi.”

Tru, taim wanpela papa i lusim famili bilong em, dispela i save kamapim bikpela hevi tru. Tasol yu mas save olsem God na ol gutpela poroman na famili Kristen ol inap helpim yu na famili bilong yu long karim dispela hevi.c

[Ol Futnot]

[Ol Piksa long pes 20]

Sampela yangpela i bin mekim ol samting bilong lukim papa bilong ol