Yu Inap Kisim Nambawan Gutpela Skul Long We?
“Wok bilong sapim wanpela ston na wokim wanpela naispela samting long en i wankain olsem wok bilong skulim man.”—Josep Adison, 1711.
YU BIN skul bipo? Planti manmeri inap tok yes long dispela askim—tasol olgeta i no inap tok olsem. Long nau i gat planti milion pikinini ol i no insait long skul. Dispela em i wanpela hevi bilong bipo yet, olsem na long nau i gat klostu wan bilion manmeri i bikpela pinis em ol i no save rit rait.
Tasol skul em i samting yumi mas kisim. Skul i no olsem wanpela samting i dia tumas na ol man i no inap kisim, nogat; planti man long nau i ting i stret olgeta pikinini na manmeri i bikpela pinis i ken skul. Tasol olsem wanem olgeta i ken kisim gutpela skul sapos i nogat ol samting bilong kamapim wanpela skul? Olsem wanem sapos ol buk i sot, o i no gat planti man i winim mak bilong holim wok tisa, o namba bilong ol skul i sot?
Ol manmeri i ken painim we wanpela skul i kirapim ol wan wan sumatin long insait long ol wok bilong skul, na skul i helpim ol sumatin long kisim bikpela save moa long ol samting bilong dispela graun, na i helpim ol long save long ol gutpela tok bilong God i ken stretim wokabaut bilong ol? Wanem skul bai strongim ol sumatin long bihainim ol stretpela pasin, na soim ol olsem wanem ol i ken helpim sindaun bilong ol i kamap gutpela moa, na helpim ol long bilip tru olsem ol gutpela samting bai kamap long bihain? I gat rot bilong olgeta man i ken kisim kain skul olsem?
As Bilong Nambawan Gutpela Skul
Ating man bai kirap nogut long bekim bilong mipela, tasol mipela i ken tok yes, rot i op long olgeta man i ken kisim gutpela skul. Mipela i ken tok olsem, long wanem, i gat wanpela gutpela tul i olsem as bilong dispela skul. Dispela tul em wanpela “buk bilong skul” i bilong bipo yet, na ol i tanim tok bilong buk olgeta o hap bilong en i go long 2,200 tok ples bilong graun. Klostu olgeta man i stap long graun i gat rot bilong kisim dispela buk long wanpela tok ples ol i save long en. Em wanem buk?
Em buk Baibel, em wanpela buk ol man i tok em i nambawan buk, winim olgeta narapela buk. Wanpela saveman bilong taim bilong yumi, em William Lyon Phelps, em i tok: “Ol man i save gut long ol tok bilong Baibel, yumi ken tok ol i olsem man i bin go long skul. I no gat narapela skul o wok bilong kisim planti save, maski em i bikpela save o gutpela save tru, dispela i no . . . gutpela wankain olsem skul yumi kisim long Baibel.”
Baibel em ol liklik buk ol i bungim wantaim, na ol man i bin raitim ol dispela buk insait long 1,600 yia. Phelps i stori moa long ol dispela buk bilong Baibel olsem: “Ol tingting na save bilong yumi, ol buk na ol gutpela bilas samting yumi wokim, ol mak yumi laik winim; Baibel em i as bilong planti bilong ol dispela samting, winim olgeta narapela buk. . . . Mi bilip olsem man i no skul long yunivesiti tasol em i save long Baibel, dispela man i winim man i kisim skul long yunivesiti tasol em i no gat save long Baibel.”
Long nau ol Witnes Bilong Jehova i mekim bikpela wok tru bilong givim skul long ol man em Baibel i as bilong en. Kain skul olsem i no bilong lain long rit na rait tasol. Dispela skul i save helpim tingting na pasin bilong man long kamap gutpela. Em i helpim man long kisim gutpela tingting long ol samting i laik kamap long bihain, em i kamapim as na man i ken bilip tru olsem ol samting i laik kamap i winim tru ol samting i bin kamap pinis.
Plis, ritim stori i kamap bihain na kisim save moa long dispela kain skul bilong helpim i stap bilong yumi.