Bikpela Wok Bilong Ol Papa

WANPELA niuspepa (Toronto Star) bilong Kanada i stori long wanpela ripot em Yunivesiti Harvard i bin mekim long nau na i tok: “Ol yangpela man em ol i laik mekim tru wok bilong ol long mekim bikpela long ol pikinini, namba bilong ol i go antap. Inap 82 pesen bilong ol man krismas bilong ol i olsem 21 i go 39, ol i laik kisim wanpela wok em bai givim sampela taim moa long ol bilong i stap wantaim famili bilong ol.” Ripot i tok, ol i bin skelim 1,008 man na meri bilong Amerika em krismas bilong ol i olsem 21 i go 65 samting, na 71 pesen bilong ol yangpela man i tok ol ‘i orait long kisim liklik pe tasol long wok mani bilong ol bambai ol i gat hap taim moa bilong i stap wantaim famili bilong ol.’

Bilong wanem planti papa i laik lusim bikpela hap taim moa wantaim ol pikinini? David Blankenhorn, em wanpela man i bin kamapim lain National Fatherhood Initiative, em lain i gat wok long litimapim wok ol papa i mas mekim, em i tok, long 1994 ol i skelim 1,600 man bilong Amerika, na 50 pesen ol i tok taim ol i liklik yet papa bilong ol i no save mekim gut bel bilong ol long taim ol gat bel hevi. Planti ol papa bilong nau i no laik lukim dispela kain pasin i kamap gen.

Ol papa i save mekim ol samting wantaim ol pikinini ol i stap olsem gutpela poroman bilong ol. Nius The Toronto Star i stori long ripot em wanpela lain (U.S. Department of Health and Human Services) i kamapim na i tok, taim ol papa i kaikai wantaim ol pikinini, na raun kisim amamas wantaim ol, na helpim ol long homwok bilong ol, “i no gat planti pasin bikhet i kamap, na ol i no hatwok long bung wantaim ol narapela na toktok wantaim ol, na ol i mekim gut ol wok bilong skul.”

Ol dispela ripot i kamapim klia wanpela gutpela pasin bilong mekim bikpela long ol pikinini long nau, na i stret wantaim tok ol i bin raitim inap 3,000 yia samting i go pinis. Man i As bilong famili em i givim stret tok long ol papa long ol i mas insait tru long wok bilong mekim bikpela long ol pikinini. (Efesus 3:​14, 15; 6:⁠4) Papa i mas putim pasin bilong laikim God long bel bilong ol pikinini na toktok wantaim ol long ol lo na tok bilong Em. God i tokim ol papa long mekim olsem ‘taim ol i stap long haus, na taim ol i wokabaut long rot, na taim ol i malolo, na taim ol i wok.’​—⁠Lo 6:⁠7.

Papa na mama wantaim i mas insait long wok bilong mekim bikpela long ol pikinini. Baibel i tokim ol pikinini: “Yu mas harim tok bilong papamama bilong yu na yu no ken sakim tok bilong tupela.” (Sindaun 1:⁠8) Wok bilong papa i bikpela samting. Sampela wok i olsem, helpim na tingim gut mama, na helpim mama long ol wok bilong mekim bikpela long ol pikinini. Na tu, ol i mas lusim sampela taim bilong ritim buk samting long ol pikinini na toktok wantaim ol. Dispela i bikpela samting long mekim bel bilong ol pikinini i stap gut.

Baibel tasol i gat ol gutpela tok na lo bilong stiaim tingting bilong famili na bai ol i kamap wanpela gutpela famili. Taim papa i mekim gut wok bilong em long lukautim ol pikinini long ol samting bilong spirit, na mekim gut bel bilong ol, na lukautim ol long ol samting bilong skin, em inapim wok God i givim long em.