Husat i Mas Skulim Ol Pikinini Long God?
“Sumatin i no winim tisa bilong en, tasol sumatin i kisim skul i nambawan olgeta, em bai kamap wankain olsem tisa bilong en.”—LUK 6:40.
SAMPELA papamama i pilim olsem ol i no gat inap save long skulim ol pikinini bilong ol long God. Ol i ting olsem ol i no bin skul gut o ol i no save tumas long ol samting bilong lotu na bai ol i ken skulim gut ol pikinini. Dispela i mekim na ating ol i lusim dispela bikpela wok long han bilong wanpela wanblut o wanpela tisa bilong lotu.
Tasol husat inap tru long skulim ol pikinini long ol samting bilong lotu na ol stretpela stiatok? Tingim tok Baibel i mekim long dispela samting, na skelim wantaim ol samting em ol saveman i painimaut.
Papa i Gat Wanem Wok?
Tok Baibel i mekim: “Yupela ol papa, yupela i no ken sikirapim bel bilong ol pikinini bilong yupela, nogat. Oltaim yupela i mas mekim bikpela long ol na trenim ol olsem Jehova i makim, na putim tingting bilong em long bel bilong ol.”—Efesus 6:4.
Samting ol saveman i painimaut: Sapos ol papa i kisim strongpela bilip, dispela bai helpim ol olsem wanem? Atikol Fathers’ Religious Involvement and Early Childhood Behavior, em ol i bin wokim long 2009, i tok: “Taim ol papa i mekim sampela wok bilong lotu, dispela inap helpim ol long kamap gutpela papa moa. Lotu i givim helpim na sapot long ol man, na tu, em i givim ol tok bilong skulim na stiaim ol samting ol man i mekim long laip bilong ol.”
Baibel i tok ol papa i gat bikpela wok tru bilong mekim bikpela long ol pikinini na skulim ol. (Sindaun 4:1; Kolosi 3:21; Hibru 12:9) Tasol olsem wanem? Dispela tok i stret yet long nau? Long 2009, University of Florida i kamapim wanpela atikol i stori olsem wok bilong papa i save mekim bikpela samting long ol pikinini bilong ol. Ol saveman i painimaut olsem ol pikinini em papa bilong ol i save mekim planti samting wantaim ol taim ol i wok long i go bikpela, ol dispela pikinini i gat pasin bilong tingim tru narapela na ol i amamas long ol yet. Ol pikinini man i no bikhet tumas, na ol pikinini meri i gat stretpela tingting moa. Yumi ken save olsem tok bilong Baibel i stret yet long nau.
Wok Bilong Mama i Bikpela Samting Olsem Wanem?
Tok Baibel i mekim: “No ken sakim lo bilong mama bilong yu.”—Sindaun 1:8, NW.
Samting ol saveman i painimaut: Long 2006, buk Handbook of Child Psychology i tok: “Ol mama i save lusim inap 65 pesen i go 80 pesen moa taim wantaim ol liklik pikinini bilong ol, winim taim ol papa i save lusim, na dispela i wankain long planti kantri.” Dispela i mekim na toktok, pasin, na tingting bilong mama i mekim bikpela samting long pikinini taim em i wok long i go bikpela.
Taim mama na papa i wok wantaim bilong skulim ol pikinini long tok i tru bilong God, ol i givim tupela gutpela presen long ol. Namba wan, ol pikinini i gat rot bilong kamap pren bilong Papa bilong ol long heven, na dispela pasin pren inap helpim ol long laip olgeta bilong ol. Namba tu, ol pikinini i lukim pasin bilong papamama long wok gut wantaim bilong winim ol mak na dispela i givim skul long ol. (Kolosi 3:18-20) Ating ol narapela inap helpim papa na mama, tasol em wok bilong papamama long skulim ol pikinini bilong ol long God na long olsem wanem God i laik famili i mas wok wantaim.
Tasol ol papamama i mas skulim ol pikinini olsem wanem? Wanem nambawan gutpela rot bilong mekim olsem?