Pilai Laki—Ol Man i Laikim Tru

JOHN, em i bin kamap bikpela long Skotlan, oltaim em i save tingting long winim loto. Em i tok: “Mi bin baim loto tiket long olgeta wik. Mi tromoi liklik mani tasol, tasol mi bilip olsem dispela tiket em i rot bilong kisim olgeta samting mi laik kisim.”

Kazushige, em i stap long Japan na em i save laikim tru ol hosres. Em i tok: “Mi save amamas tru long betim mani long ol hosres wantaim ol pren bilong mi, na sampela taim mi save winim bikpela mani.”

Linda, em i sindaun long Australia, em i tok: “Mi bin laikim tru bingo. Long olgeta wik mi bin tromoi 30 dola long dispela pilai, tasol mi bin laikim tru amamas mi kisim taim mi win.”

John, Kazushige, na Linda, ol i bin ting olsem pilai laki em samting bilong kisim amamas tasol. Planti milion manmeri long olgeta hap ol i gat wankain tingting. Long 1999, wanpela lain (Gallup) i askim ol man long kamapim tingting bilong ol na ol i painimaut olsem 66 pesen bilong ol man long Amerika ol i orait long pilai laki. Long 1998, ol man bilong pilai laki long Amerika ol i tromoi 50 bilion dola long ol pilai laki em gavman i orait long en​​—⁠dispela mani i winim olgeta mani ol i tromoi long baim ol tiket bilong lukim ol muvi, ol spot, ol pak bilong pilai na amamas, ol kaset, na ol video-gem.

I no longtaim i go pinis, ol i givim askim long planti man bilong Australia na ol i kisim save olsem winim 80 pesen bilong ol man bilong Australia ol i save pilai laki wanpela taim long yia, na inap 40 pesen ol i save pilai laki long olgeta wik. Ol man long dispela kantri ol i save tromoi 400 dola long olgeta yia long pilai laki, dispela i klostu dabol long ol mani ol man long Yurop na Amerika i save tromoi long pilai laki. Dispela i makim olsem ol man bilong Australia ol i givim bel moa yet long pilai laki, winim ol man bilong ol narapela kantri.

Planti man bilong Japan ol i kalabus long pilai laki ol i kolim pasinko, na long olgeta yia ol i save tromoi planti bilion bilion dola long dispela. Long Brasil, ol man i save tromoi inap 4 bilion dola long olgeta yia long pilai laki, na bikpela hap bilong dispela mani ol i save tromoi long baim ol loto tiket. Tasol i no ol lain Brasil tasol i laikim ol loto. I no longtaim i go pinis, magasin Public Gaming International i tok i gat “306 pilai loto long 102 kantri.” Tru tumas, pilai laki em wanpela samting ol man long olgeta hap i laikim tru​​—⁠sampela i tok em i gutpela samting bilong helpim tru ol man.

Mausmeri bilong lain Public Gaming Research Institute, em Sharon Sharp, i tok long Amerika kirap long 1964 i go inap 1999, “gavman i kisim 500 bilion kina win mani long ol pilai loto, na bikpela hap bilong dispela mani ol i kisim bihain long 1993.” Ol i bin putim bikpela hap bilong dispela mani i go bilong helpim ol program bilong ediukesen, ol pak, na wokim ol stediam samting. Planti man i save kisim wok mani long ol bisnis bilong pilai laki na long Australia, winim 7,000 bisnis bilong pilai laki i stap na i gat 100,000 manmeri i kisim wok mani long ol dispela bisnis.

Olsem na ol man i sapotim pilai laki ol i strong olsem ol pilai laki em gavman i orait long en, ol i helpim ol man long kisim amamas, na tu, ol i kamapim ol nupela wok mani, na baim takis, na i strongim ol wok bisnis long ol hap we ol wok bisnis i no strong tumas.

Olsem na planti man bai askim olsem, ‘Bilong wanem i no stret long pilai laki?’ Bekim bilong dispela askim i stap long ol stori i kamap bihain long dispela na ating em bai senisim tingting bilong yu long pilai laki.

[Piksa long pes 3]

John

[Piksa long pes 3]

Kazushige

[Piksa long pes 3]

Linda