Baibel i Tok Wanem?

Yu Ting Bai God i No Tingim Ol Rong Bilong Yumi?

‘Mi no man nogut! Mi bin traim strong tru long lusim ol pasin nogut bilong mi, tasol mi no gat strong!’

OLSEM WANEM? Yu o wanpela yu save long en i gat wankain tingting olsem? Planti i tok olsem yumi no inap long lusim ol pasin i pas strong pinis long skin. Sampela i save kisim planti dring, o tabak, o drak. Na planti narapela ol i gat pasin bilong mangal. Na sampela ol i orait long mekim pasin pamuk; ol i tok ol i kalabus tru long mekim pasin pamuk.

Olsem Matyu 26:41 i makim, Jisas i kamapim olsem em i save ol man i no gat strong.a Baibel olgeta i tokaut klia olsem God Jehova na Jisas i save marimari long ol man. (Song 103:​8, 9) Tasol yumi ken ting olsem bai God i no tingim ol rong bilong yumi?

Moses na Devit

Tingim stori bilong Moses. Baibel i tok, “em i man bilong daunim em yet, na i no gat wanpela man long dispela graun i save daunim em yet inap olsem Moses,” na em i wok strong long holimpas dispela pasin. (Namba 12:⁠3) Taim ol Israel i wokabaut long ples drai nating, planti taim ol i no bihainim stretpela pasin na ol i no daun long God na ol man em i makim. Taim ol dispela hevi i kamap, long pasin daun Moses i larim Jehova i stiaim em.​​—⁠Namba 16:​12-​14, 28-​30.

Tasol klostu long taim ol i go insait long graun bilong promis, em i belhat long ol Israel na em i no bihainim tok bilong God. God i lusim rong bilong em, tasol yu ting Em i no tingim dispela rong? Nogat. Em i tokim Moses: ‘Long dispela taim yu no bilip long mi. Olsem na bai yu yet i no inap bringim ol Israel i go long dispela kantri mi promis long givim ol.’ Moses i no inap go insait long Graun Bilong Promis. Inap olsem 40 yia em i bin wok strong long kisim dispela gutpela samting, tasol wanpela popaia bilong em i mekim na em i no inap kisim dispela samting.​​—⁠Namba 20:​7-​12.

King Devit em i narapela man i save daun long God tasol em i gat wanpela pasin inap pundaunim em. Wanpela taim em i larim pasin mangal i pulim em na em i mekim pasin pamuk wantaim meri bilong narapela man. Em i traim long haitim rong bilong em na em i larim ol i kilim man bilong dispela meri. (2 Samuel 11:​2-​27) Bihain em i bel hevi stret long ol rong em i bin mekim, na God i lusim rong bilong em. Tasol Devit i bin bagarapim wanpela famili, na Jehova i no lukautim em long ol hevi i kamap bihain. Pikinini man bilong Devit i kisim sik na Jehova i no mekim wanpela samting bilong pinisim sik bilong em, maski Devit i beten long God bai em i mekim pikinini i orait. Dispela pikinini man i dai, na bihain ol narapela hevi i painim famili bilong Devit. (2 Samuel 12:​13-​18; 18:33) Devit i kisim bikpela hevi tru long rong em i bin mekim.

Ol dispela stori i soim olsem God i save skelim ol man long pasin ol i mekim. Ol man i laik lotuim em ol i mas wok strong long ol samting ol i no strong long en long ol samting bilong spirit na kamap gutpela Kristen. Long taim bilong ol aposel, planti i bin mekim olsem.

Strong Long Rausim Ol Pasin Bilong Sin

Aposel Pol i stap gutpela piksa stret bilong yumi ol Kristen. Tasol olsem wanem? Yu save em i mas wok strong oltaim long daunim ol pasin kranki bilong em? Rom 7:​18-​25 i stori gut long dispela hevi o olsem ves 23 i tok, dispela “pait.” Pol i pait strong, long wanem, em i save olsem sin i stap yet.​​—⁠1 Korin 9:​26, 27.

Sampela Kristen long kongrigesen Korin, bipo ol i man bilong mekim rong. Baibel i tok ol i bin ‘mekim pasin pamuk, trabel long maritmeri, mekim kain kain pasin i gat sem wantaim ol arapela man, stil, mangal long ol samting bilong ol arapela, spak.’ Tasol em i tok tu olsem God i bin ‘wasim ol pinis.’ (1 Korin 6:​9-​11) Olsem wanem ol i kamap klin? Long rot bilong stretpela save ol i kisim na bung wantaim ol narapela Kristen, na long rot bilong spirit bilong God, dispela i strongim ol long lusim ol dispela pasin nogut. Na God i mekim ol i kamap stretpela manmeri long nem bilong Krais. Yes, God i lusim rong bilong ol, na givim ol klinpela bel.​​—⁠Aposel 2:​38; 3:​19.

Pol na ol Kristen long Korin i no sakim tasol ol laik nogut bilong skin. Ol i pait wantaim ol dispela pasin bilong sin, na God i helpim ol long winim ol dispela hevi bilong ol. Ol dispela Kristen long taim bilong ol aposel i bin kamap gutpela, maski i gat kain kain pasin i stap long hap bilong ol na ol i gat sin. Olsem wanem long yumi?

God i Laik Yumi Mas Wok Strong Long Daunim Ol Laik Nogut Bilong Skin

Sapos yumi wok strong long daunim wanpela laik nogut bilong skin ating bai yumi no inap long pinisim olgeta. Tru, yumi no inap larim sin i daunim yumi, tasol yumi no inap long pinisim olgeta. Sin i save kirapim ol laik nogut i stap long skin longpela taim. Tasol yumi no ken larim ol dispela pasin i daunim yumi. (Song 119:11) Bilong wanem em i bikpela samting?

Long wanem, God i no laik bai olgeta taim sin i ken i stap olsem eskius bilong ol pasin nogut, nogat. (Jut 4) Jehova i laik bai ol man i mas rausim olgeta pasin nogut na bihainim stretpela pasin. Baibel i tok: “Yupela i mas givim baksait tru long pasin nogut.” (Rom 12:⁠9) Bilong wanem God i mekim strongpela tok olsem?

Wanpela as em sapos yumi larim ol pasin nogut i stap, em bai bagarapim yumi. Baibel i tok long Galesia 6:7: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.” Ol man i orait long ol pasin nogut i kalabusim ol, na ol i mangal na mekim pasin pamuk nabaut, planti taim ol i save kisim samting nogut tasol long i stap bilong ol. Tasol i gat wanpela bikpela as.

God i no amamas long sin. Em i stap olsem “banis” namel long yumi na Jehova. (Aisaia 59:⁠2) God i no orait long ol man i mekim sin, olsem na em i tok: “Yupela go waswas, na klinim yupela yet . . . Na no ken mekim sin gen.”​​—⁠Aisaia 1:​16.

Man bilong wokim yumi em i man bilong sori na marimari. “Em i no laik bai wanpela man i lus. Em i laik bai olgeta man i mas tanim bel.” (2 Pita 3:⁠9) Sapos olgeta taim yumi orait long mekim pasin nogut, dispela bai pasim God long orait long yumi. God i no save givim baksait long ol rong bilong yumi, olsem na yumi tu i no ken mekim olsem.

[Futnot]