Yu Mas Kisim Gutpela Slip!

Yu ting wanpela man inap sakim dispela tok olsem pasin bilong kisim gutpela slip long nait em i bikpela samting long helpim skin long i stap gut? Ating nogat, a? Tasol long planti man, slip i no bikpela samting. Shawn Currie, wanpela dokta bilong stretim tingting bilong ol man na nambatu profesa long Yunivesiti bilong Calgary, Kanada, em i tok: “Tasol long de bihain, yu pilim hevi, long wanem, yu no slip inap long skel bilong yu.” Taim yu no kisim slip inap long skel bilong yu, em i isi tru long ol samting i skrapim bel bilong yu na sampela taim bai yu bel hevi.

Nius Calgary Herald i tok: “Ol saientis i tok slip i save helpim wok bilong kru long kamap nupela gen, na taim man i slip em i wok yet long kisim save.” Profesa Currie i tok: “Long nait, ol tingting bilong yu i kamap strong na kru i stretim na putim gut ol samting yu bin lainim long san. Dispela samting i no inap kamap sapos man i no kisim malolo.” Na tu, em i tok olsem “taim yu kisim slip inap long skel bilong yu, dispela inap strongim bel bilong yu.”

Olsem na man i mas slip inap hamas aua? Planti saveman i tok 8-pela aua em inap, tasol Currie i tok: “Sampela man i mas slip planti aua, na sampela man i no mas slip planti aua tumas.” Em i tok, long dispela as ol man i mas slip indai tru. Tasol olsem wanem ol man inap mekim olsem, na moa yet ol man i gat hevi long slip? Em hia sampela samting ol i ken mekim:

◼ Paslain long slip, waswas long wara i hat liklik.

◼ Mekim ol liklik eksasais sampela taim long wik; tasol no ken mekim ol strongpela eksasais paslain long slip.

◼ Ples slip i no ken i gat nois, stap tudak, na kol liklik.

◼ Long olgeta moning, traim long kirap long wankain taim na bai bodi i lain long wankain taim bilong slip na kirap.

Slip i save helpim gut skin bilong ol man, olsem na bihainim gutpela tingting na tingim slip olsem wanpela bikpela samting yu mas mekim.