Slip Bilong Wanem i Bikpela Samting?
● Sampela wok painimaut ol i mekim long nau i kamapim olsem ol manmeri long Not Amerika i save slip inap 7-pela aua o 7 na hap aua long olgeta nait. Bilong wanem slip i bikpela samting? Slip i gat ol narapela narapela hap bilong en. Long nait taim yu slip, ol dispela haptaim bilong slip em inap olsem 60 i go inap 90 minit. Insait long ol dispela haptaim bilong slip, kru i save wok yet, na ol saveman i ting olsem long dispela taim kru yet i wok long stretim stretim em yet. Sampela saveman i tok olsem taim sampela samting i kamap na i bagarapim slip bilong yumi, dispela inap kamapim sampela hevi long bodi. Olsem: Kru i no inap wok gut na dispela inap mekim na man i no inap mekim gut ol wok bilong em na sik tu inap painim em.
Inap sotpela taim ol samting kain olsem kafin i stap long kofi inap pasim marasin insait long bodi we i save mekim man i slip. Tasol maski i olsem, bai yumi slip yet sapos yumi no bin inapim gut slip bilong yumi, long wanem, i gat wanpela samting insait long kru i save mekim yumi slip. Wanpela niuspepa (The Toronto Star) i tok, “maski yu mekim wanem samting i stap, sapos yu no bin inapim gut slip bilong yu, kru bilong yu bai tokim bodi bilong yu long slip, sampela taim bai yu slip inap 10-pela seken, na sampela taim winim 1-pela minit.” Tingim olsem yu wok long draivim kar inap 48 kilomita insait long wanpela aua, na inap 10-pela seken yu slip. Insait long dispela hap taim, yu abrusim mak bilong wanpela ragbi fil. Na tu, sapos yumi no slip inap long skel, bodi bai no gat strong long daunim ol sik. Long taim yumi slip, bodi i save kamapim wanpela kain sel i save sakim vairas we i save kamapim sik. Na tu, long taim yumi slip, bodi i save kamapim homon leptin, dispela homon i save kirapim laik bilong kisim kaikai. Tru tumas, yumi mas kisim gutpela slip, wankain olsem yumi mas eksasais na kisim gutpela kaikai.
Olsem wanem? Ol ekstra wok yu mekim i pasim yu na yu no inap slip gut? O, yu no slip gut, long wanem, yu tingting planti long ol samting long laip bilong yu na yu wari tumas long ol samting yu laik bungim bilong bihain? Saveman King Solomon i bin tok: “Ol wokman i save slip gut long nait, maski ol i gat planti kaikai o kaikai bilong ol i sot. Tasol maniman i no olsem. Em i save wari long ol planti samting bilong en, olsem na em i no inap slip gut.”—Saveman 5:12.