Ol Yangpela i Laik Save . . .

Olsem Wanem Mi Inap Karim Hevi Bilong Stap Olsem Pikinini Ol i Bin Adoptim?

“Mi no save liklik long papamama tru bilong mi, na dispela i save mekim mi bel hevi tru.”​​—⁠Barbara, 16 krismas.

“Mi no save liklik long wanem hap mama i bin karim mi long en, na husat ol i papamama tru bilong mi. Sampela taim long nait mi save tingting long dispela samting.”​​—⁠Matt, 9 krismas.

“Taim mi tok pait wantaim ol papamama i bin adoptim mi, mi save tingting olsem ating ol papamama tru bilong mi ol bai pilim gut moa tingting bilong mi. I no stret long mi gat kain tingting olsem, na mi no bin kamapim dispela long papamama i bin adoptim mi.”​​—⁠Quintana, 16 krismas.

TRU TUMAS, i gat ol hevi i save kamap long i stap bilong pikinini ol i bin adoptim. Planti yangpela i pilim wankain olsem ol dispela yangpela em tok bilong ol i stap antap. Planti ol i tingting olsem gutpela sapos ol i painimaut long husat em papamama tru bilong ol o nogat, o ol i ting bai ol i stap amamas moa sapos ol i stap wantaim papamama tru bilong ol o nogat. Na i gat sampela samting moa ol i save tingting planti long en.

Long wanpela stori bilong Awake!, mipela i bin kamapim sampela tingting kranki em sampela yangpela ol i bin adoptim i gat long ol yet.a Bilong i stap amamas olsem pikinini ol i bin adoptim, em i bikpela samting long daunim ol dispela tingting kranki. Tasol wanem sampela narapela hevi inap kamap, na yu inap mekim wanem bilong karim ol dispela hevi?

Ol i Papamama “Tru” Bilong Mi?

Jake i gat 13 krismas, em i tok, pastaim em i save tingting oltaim long mama i bin karim em. Dispela i kamapim sampela hevi namel long em na papamama i bin adoptim em. Em i tok: “Taim mi kros, mi save tok, ‘A, yu no mama tru bilong mi​—⁠yu no inap givim dispela strafe long mi!’ ”

Jake i mas klia gut long wanpela bikpela askim: Husat i mama “tru” bilong em? Sapos ol i bin adoptim yu, ating yu tu i tingting planti long dispela askim, na moa yet sapos yu save tingting olsem papamama tru bai mekim gut moa long yu winim papamama i bin adoptim yu o nogat. Tasol yu ting man na meri husat i bin kamapim yu, dispela samting tasol i mekim na ol man i kamap olsem papamama “tru”?

Mama i adoptim Jake em i no ting olsem. Jake i tok: “Mama bilong mi i save tok, ‘Yes, mi mama tru bilong yu. Maski narapela meri i bin karim yu, nau mi mama tru bilong yu.’ ” Taim ol man i kisim wanpela pikinini na ol i orait long givim ples slip, kaikai, na mekim bikpela long em, na lukautim em long ol samting em i mas kisim, ol i kamap papamama “tru.” (1 Timoti 5:⁠8) Na ating long ai bilong gavman long ples yu stap long en, ol i papamama tru. Yu ting God i ting ol i papamama tru bilong yu?

Tingim wanpela stori planti man i save long en, em stori bilong wanpela pikinini ol i bin adoptim​—⁠em Jisas Krais. Jisas i no pikinini tru bilong Josep, tasol Josep i bin adoptim em na kisim em olsem pikinini bilong em yet. (Matyu 1:​24, 25) Taim Jisas i wok long kamap bikpela, yu ting em i bin bikhet long wok bos bilong Josep? Nogat. Jisas i save olsem God i laik bai em i mas bihainim tok bilong papa i bin adoptim em. Jisas i save gut long wanpela lo em Jehova i bin givim long ol pikinini Israel. Em wanem lo?

Aninit Long Papa na Mama Bilong Yu

Baibel i tokim ol yangpela: “Yupela i mas aninit long papamama bilong yupela na bihainim tok bilong ol.” (Lo 5:16) Planti taim Baibel i mekim wok long dispela tok “aninit” bilong makim rispek, pasin bilong tingim tru, na pilim tingting bilong narapela. Yu inap soim papamama i adoptim yu olsem yu aninit long ol. Yu ken mekim olsem long rot bilong mekim gutpela pasin long ol, daun long wok bos bilong ol, putim yau long tingting bilong ol, na redi long mekim wanem wanem samting ol i askim yu long mekim.

Tasol olsem wanem taim papamama i adoptim yu ol i mekim samting i luk olsem i no stret? Dispela samting bai kamap. Olgeta papamama i gat sin, maski ol i bin adoptim yu o ol i papamama tru bilong yu. Ol popaia bilong ol inap mekim na i hatwok tru long bihainim tok bilong ol. Na long dispela kain taim, yu inap tingting tumas long ol i bin adoptim yu, na ting olsem ating yu no gat wok tumas long bihainim tok bilong ol. Tasol yu ting tru tru yu no gat wok long bihainim tok bilong ol?

Yu inap kisim helpim taim yu tingim i stap bilong Jisas. Tingim, em i gutpela olgeta. (Hibru 4:15; 1 Pita 2:22) Tasol papa i adoptim em, em i gat sin; na mama i karim em, em tu i gat sin. Olsem na sampela taim, Jisas inap lukim olsem papamama bilong em ol i popaia. Yu ting em i bin sakim wok bos bilong Josep o wok Maria i mekim bilong stiaim em? Nogat. Baibel i tokim yumi olsem taim Jisas i wok long kamap bikpela, “oltaim em i save bihainim tok” bilong papamama bilong em.​—⁠Luk 2:⁠51.

Taim yu na papamama i adoptim yu yupela i gat narapela narapela tingting long wanpela samting, ating yu tingting strong olsem ol i popaia. Tasol yu tu i mas save olsem yu gat sin. Olsem na nogut yu yet i popaia. Tasol maski husat i mekim pasin i stret na husat i popaia, i gutpela long bihainim pasin bilong Jisas, a? (1 Pita 2:21) Taim yu mekim olsem, dispela bai helpim yu long bihainim tok. Tasol i gat wanpela bikpela as moa na yu mas bihainim tok bilong papamama.

Baibel i tok: “Yupela pikinini, yupela i mas bihainim tok bilong papamama bilong yupela long olgeta samting. Bikpela i save laikim dispela kain pasin.” (Kolosi 3:20) Yes, pasin bilong yu long bihainim tok i mekim Papa bilong yu long heven i amamas. (Sindaun 27:11) Na em i laik yu mas lainim pasin bilong bihainim tok, long wanem, em i laik bai yu tu i amamas. Baibel i kirapim ol yangpela long bihainim tok, na i tok moa olsem: “Sapos yu mekim olsem, orait olgeta wok samting yu mekim i ken kamap gutpela, na bai yu stap longpela taim long dispela graun.”​—⁠Efesus 6:⁠3.

Strongim Pasin Bilong Pas Gut Wantaim Papamama i Adoptim Yu

Bilong pas gut wantaim papamama i adoptim yu, yu mas aninit long ol na bihainim tok bilong ol, tasol i gat sampela samting moa yu mas mekim. Ating yu laik bai insait long famili bilong yu i gat gutpela pasin bilong laikim tru narapela narapela. Papamama i adoptim yu ol i gat wok long kamapim dispela pasin. Tasol yu tu inap mekim bikpela wok bilong dispela samting i ken kamap. Yu inap mekim wanem?

Namba wan samting, yu mas painim rot bilong pas gut moa wantaim papamama bilong yu. Askim ol long stori long ol samting bilong ol na famili bilong ol, i stap bilong ol, na ol samting ol i save laikim. Askim ol long givim gutpela tok bilong helpim yu long taim yu gat hevi, na yu ken mekim olsem taim yu lukim ol i stap isi na ol i amamas long putim yau. (Sindaun 20:⁠5) Namba tu samting, painim rot bilong lukautim gut ol samting bilong haus, olsem yu yet i ken go pas long mekim ol wok bilong haus na no ken wet long ol i tokim yu long mekim.

Tasol olsem wanem long papamama tru bilong yu? Sapos yu laik painim ol, o sapos ol i laik painim yu, dispela bai bagarapim pasin bilong yu long pas gut wantaim papamama i bin adoptim yu o olsem wanem? Long bipo, ol ofis bilong stretim rot bilong adoptim pikinini, ol i no save tokaut long ol samting bilong helpim papamama long painim pikinini ol i bin givim bilong ol narapela i ken adoptim. Na ol dispela ofis i mekim wankain pasin tu long ol pikinini husat i laik painim papamama tru bilong ol. Long nau, long sampela hap ol i no gat strongpela tambu tumas, na planti pikinini i bin bungim papamama tru bilong ol em ol i no inap tingim ol liklik. Tasol ating long hap yu stap long en, ol lo bilong adoptim pikinini i narapela kain.

Tasol maski yu laik painim papamama tru bilong yu o nogat, em samting yu yet i mas makim, na ating dispela samting i hatwok long mekim. Ol pikinini ol i bin adoptim i gat kain kain tingting long dispela samting. Sampela i gat laik tru long painim papamama tru bilong ol; sampela ol i no laik tru long mekim olsem. Tasol planti pikinini i bin bungim papamama tru bilong ol, na dispela i no bin bagarapim pasin bilong ol long pas gut wantaim papamama i adoptim ol.

Askim papamama i adoptim yu o ol pren insait long kongrigesen Kristen em ol i strong long ol samting bilong spirit, long givim gutpela tingting bilong helpim yu. (Sindaun 15:22) Skelim gut ol samting yu laik mekim, na lusim sampela taim long tingim tingim gut paslain long yu mekim wanpela samting. Olsem Sindaun 14:15 i tok, “man i gat gutpela tingting, em i save was gut long ol pasin em i mekim.”

Sapos yu wokim tingting pinis long painim papamama tru bilong yu, wok strong long kamapim klia long papamama i adoptim yu olsem yu laikim yet ol na yu daun long ol. Long dispela rot, taim yu wok long kisim save long papamama i bin karim yu na i bin givim long ol narapela i adoptim yu, pasin bilong yu long pas gut wantaim papamama i bin mekim bikpela long yu na skulim yu bai stap strong yet.

Strongim Pasin Bilong Yu Long Pas Gut Wantaim Papa Bilong Yu Long Heven

Planti yangpela ol narapela i bin adoptim ol i pret long ol man bai lusim ol. Ol i tingting planti olsem nogut famili i adoptim ol bai lusim ol olsem famili tru bilong ol i bin mekim. Yumi inap pilim kain tingting olsem. Tasol tingim dispela gutpela tok: “Man i save laikim ol arapela, em i no save pret. Sapos pasin bilong laikim ol arapela i kamap strong pinis insait long laip bilong wanpela man, orait dispela i save rausim pasin bilong pret.” (1 Jon 4:​18) No ken larim pasin bilong pret i bosim yu, olsem yu pret ol man yu laikim ol tru ol bai lusim yu. Kamapim moa yet pasin bilong yu long laikim ol narapela, na olgeta insait long famili bilong yu. Tasol bikpela samting moa, strongim pasin bilong yu long laikim tru Papa bilong yu long heven, em God Jehova. Em man yu inap bilip tru long em, na i no gat wanpela taim em i save lusim ol gutpela pikinini bilong em. Em inap pinisim pret bilong yu.​​—⁠Filipai 4:​6, 7.

Catrina, ol i bin adoptim em taim em i stap pikinini yet, em i tok pasin bilong ritim Baibel i bin helpim em tru long go klostu long God na long i stap amamas. Em i tok pasin bilong pas gut wantaim Jehova “em i bikpela samting, long wanem, Papa bilong yumi long heven i save long bel na tingting bilong yumi.” Wanpela skripsa em Catrina i save laikim tru em Song 27:​10, em i tok: “Maski papa na mama i givim baksait long mi, Bikpela bai i lukautim mi.”

[Futnot]

[Piksa long pes 24]

Painim rot bilong pas gut moa wantaim papamama i bin adoptim yu