Ponografi—Tupela Tingting i Pait

“Em i kamapim laik long samting i no stret long man i laikim, em i kirapim strongpela laik i no gutpela long inapim.”​—⁠Tony Parsons, niusman.

JON i no ting pasin bilong insait long ol samting bilong pasin sem long rot bilong Intenet bai kamap olsem sik bilong em.a Planti manmeri i yusim Intenet na ol i popaia na painim hap bilong en we i gat ol piksa bilong pasin sem, ol i kolim ponografi, o hap bilong toktok wantaim ol narapela long ol samting bilong pasin sem. Dispela i painim Jon. Wanpela de em i popaia na painim hap bilong Intenet we ol man i toktok long ol samting bilong pasin sem. I no longtaim na em i givim bel olgeta long lukim na insait long ol pasin sem long rot bilong Intenet. Em i tok: “Mi wetim meri i go wok pastaim, bihain bai mi lusim bet wantu na go long kompiuta na stap planti aua.” Taim em i stap planti aua olsem, em i save lusim kaikai na dring tu. Em i tok: “Mi no tingim hangre.” Em i kirap giamanim meri bilong em long samting em i hait na mekim. Em i hatwok long givim bel long wok, na em i wok long pret nating na em i no trastim ol narapela. Marit bilong em i stat long bagarap, na taim em i pasim tok long bungim wanpela em i save tok pilai nogut wantaim long rot bilong Intenet, meri bilong em i kisim save long dispela. Long nau Jon i kisim helpim long dispela samting i kamap olsem sik bilong em.

Ol man i laik stopim ponografi i mekim wok long ol kain stori olsem bilong kamapim klia olsem wanem ponografi i bagarapim man. Ol i tok dispela samting i save bagarapim pasin bilong poroman gut wantaim, i daunim ol meri, nogutim ol pikinini, na i kamapim tingting kranki long maritpasin. Tasol ol man bilong sapotim ponografi, ol i tok em i makim pasin bilong man long stap fri long mekim samting long laik bilong em, na husat i no laikim, ol i save sem tumas long maritpasin. Wanpela sapota i tok: “Man i no ken sem long laik bilong skin o laik long mekim maritpasin o pasin sodom. Ol man i ken yusim ponografi bilong kirapim stori bilong ol samting bilong maritpasin na no ken sem.” Sampela i tok olsem taim i gat planti ponografi i stap, dispela i mak tru bilong lain i bihainim pasin wanbel na i gat gutpela tingting. Wanpela man bilong raitim ol buk, Brian McNair, em i tok: “Lain man husat i bikpela pinis ol i no gat tok long ol piksa i soim klia man na meri i bikpela pinis na i wanbel long mekim maritpasin, ating ol bai orait long pasin sodom o meri i pilai wantaim narapela meri, na long raits bilong ol meri.”

Tupela tingting i stap, olsem na yu ting dispela i makim olsem i no gat rong long ponografi? Bilong wanem em i wok long kamap long olgeta hap? Tru tru ponografi inap bagarapim man? Ol stori i kamap bihain bai bekim ol dispela askim.

[Futnot]