Baibel i Tok Wanem?
Yu Ting i Stret Long Birua Long Ol Narapela Lain?
BAI yu pilim olsem wanem sapos ol narapela i ting yu man bilong giaman, pait, i no gat gutpela tingting, o pamuk, long wanem, yu bilong wanpela lain? Yu no inap amamas long dispela, a? Sori tru, dispela hevi i save painim planti milion manmeri. Na tu, long bipo yet na i kam inap long nau, planti manmeri i no gat asua ol man i bin mekim nogut long ol na kilim sampela i dai, long wanem, ol i bilong narapela kantri o skin. Tru tumas, as bilong planti pait long nau em pasin bilong birua long ol man bilong narapela lain. Tasol planti man i orait long dispela pasin i tok ol i bilip long God na Baibel. Na i gat sampela man i tok pasin bilong birua long narapela lain bai stap oltaim—em pasin bilong ol man.
Olsem wanem? Baibel i orait long kain pasin olsem? I gat sampela samting i mekim na i stret long bel nogut long ol man bilong narapela skin na sindaun? I gat wanpela taim bihain bai i no gat dispela pasin? Baibel i tok wanem?
Kisim Kot Long Ol Pasin Ol i Mekim
Taim ol man i hariap long skelim ol samting God i bin mekim long ol man long bipo—olsem God i orait long pasin bilong birua long ol man bilong narapela lain na skin, dispela inap givim tingting kranki long ol. Olsem wanem? Baibel i mekim sampela stori long God i pinisim sampela lain olgeta? Yes Baibel i mekim, tasol taim yumi skelim gut dispela ol stori, ol i soim olsem God i kotim ol dispela manmeri, long wanem, pasin bilong ol i nogut tru na ol i no daun long ol lo bilong God—God i no kotim ol, long wanem, ol i bilong wanpela lain na skin, nogat.
Olsem: God Jehova i sakim lain Kenan, long wanem, ol i mekim planti pasin sem i nogut tru na wok bilong ol spirit nogut. Ol i kukim ol pikinini bilong ol long paia olsem ofa ol i mekim long ol god giaman! (Lo 7:5; 18:9-12) Tasol long sampela taim, wan wan Kenan i kamapim olsem ol i bilip long God na ol i tanim bel. Jehova i no givim strafe long ol na em i blesim ol. (Josua 9:3, 25-27; Hibru 11:31) Wanpela meri Kenan, Rahap, i kamap tumbuna bilong Mesaia em God i tok promis long en, Jisas Krais.—Matyu 1:5.
Lo God i bin givim long lain Israel i kamapim olsem em i man bilong laikim olgeta lain. Em i save wari tru long i stap bilong olgeta man maski ol i bilong wanem lain. Long Wok Pris 19:33, 34, yumi kisim save long wanpela lo bilong pasin sori God i givim long ol Israel: “Yupela i no ken mekim nogut long ol manmeri bilong narapela lain ol i stap long graun bilong yupela. Yupela i mas mekim gutpela pasin long ol, olsem yupela i save mekim long ol wanlain bilong yupela, ol Israel. Na yupela i mas laikim ol tru, olsem yupela i save laikim yupela yet. Yupela i bin i stap long Isip bipo, olsem na yupela i save long pasin bilong man i lusim as ples na i stap long narapela kantri. Olsem na yupela i mas mekim gut long ol dispela arapela lain i stap wantaim yupela. Mi Bikpela, mi God bilong yupela, mi tok pinis.” Ol kain lo olsem i stap long Buk Kisim Bek na Buk Lo. Olsem na Jehova i no orait long pasin bilong birua long ol man bilong narapela lain. Em strong long i mas i gat pasin bilong stap wanbel wantaim ol man bilong ol narapela lain.
Jisas i Strongim Pasin Bilong Laikim Ol Man Bilong Narapela Lain
Taim Jisas i stap long graun, pasin birua i stap namel long ol Juda na Samaria. Wanpela taim ol man bilong wanpela ples long Samaria i rausim Jisas, long wanem, em i wanpela Juda i laik go long Jerusalem. Yu bai mekim wanem sapos ol i rausim yu olsem? Pasin bilong birua long ol Samaria i bin stap long dispela taim na ating ol disaipel bilong Jisas i kamapim dispela pasin taim ol i askim Jisas: “Bikpela, yu laik bai mipela i singautim paia i kam daun long heven na i kukim ol dispela man?” (Luk 9:51-56) Yu ting Jisas i larim pasin bilong ol disaipel long birua i stiaim em? Nogat, em i krosim ol na bihainim pasin isi na painim ples slip long narapela hap. Bihain liklik, Jisas i mekim wanpela tok piksa long gutpela man Samaria. Dispela tok piksa i kamapim strong olsem sapos wanpela man i bilong narapela lain, dispela i no mekim em i stap wanpela birua. Ating dispela man inap kamap olsem pren bilong yu!
Ol Man Bilong Kain Kain Ples Insait Long Kongrigesen Kristen
Long taim Jisas i mekim wok bilong em hia long graun, nambawan samting em i strong long mekim, em bilong kamapim disaipel namel long ol lain bilong em. Tasol em i kamapim olsem long bihain bai i gat ol man bilong narapela ples bai bihainim em. (Matyu 28:19) Olsem wanem? Bai ol Kristen i orait long ol man bilong narapela lain? Yes! Aposel Pol i tok: “Tru tumas, nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Bihain aposel Pol i strongim gen dispela tingting taim em i tok olsem ples man i kam long en em i no bikpela samting insait long kongrigesen Kristen.—Kolosi 3:11.
Buk Kamapim Tok Hait bilong Baibel i kamapim klia narapela samting i soim olsem God i laikim ol manmeri bilong kain kain skin na tok ples. Long wanpela driman spirit bilong God i as bilong en, aposel Jon i lukim “planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples,” na God i bin kisim bek ol. (KTH 7:9, 10) Dispela “planti manmeri tru” bai i namba wan lain bilong stap long dispela nupela taim we ol man bilong kain kain skin na tok ples ol bai stap isi wantaim na pasin bilong laikim God bai mekim ol i stap wanbel wantaim.
Long nau, ol Kristen i mas sakim dispela pasin bilong birua long ol man bilong narapela lain o skin. Em i stretpela pasin na pasin bilong laikim narapela taim yu tingim ol wan wan man olsem Jehova i save tingim ol, na yu no tingim ol i bilong wanpela lain o skin tasol. Ating yu laik bai ol narapela i mekim wankain pasin olsem long yu, a? Jisas i tokim yumi: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12) Em i gutpela samting tru taim ol man i stap gut wantaim na ol i no bel nogut long ol man bilong narapela lain. Dispela i mekim bel na tingting bilong man i stap isi na i kamapim pasin bilong wanbel wantaim ol narapela. Bikpela samting tru em, dispela i mekim yumi i stap wanbel wantaim Man bilong wokim yumi, God Jehova, em i save laikim olgeta lain. Dispela em i wanpela gutpela as bilong sakim pasin bilong bel nogut long ol man bilong narapela lain!