Toktok Wantaim Em Inap Givim Laip Long Man
LONG olgeta samting i stap laip long graun, laik bilong ol man long toktok wantaim i no wankain olsem laik bilong ol narapela samting i stap laip, nogat. Ol man i no laik toktok tasol wantaim ol narapela man. Maski man i kam long wanem kantri, em i gat wanem sindaun, em man o meri, o em i gat bikpela skul o nogat, ol man i kamapim olsem ol i gat strongpela laik i stap long bel bilong ol long toktok wantaim nambawan bikpela Man, em God.
Olsem wanem? Dispela i wanpela bilip nating i no gat as bilong en? Nogat tru! Olsem yumi bin toktok pinis long stori i kamap paslain long dispela, God i bin wokim ol man na ol i ‘kamap olsem em yet.’ Em i putim long bel bilong yumi dispela laik long save long ol samting bilong spirit, na laik long toktok wantaim em olsem Papa bilong yumi long heven. (Stat 1:27; Matyu 5:3) Tru tumas, God i ting pasin bilong toktok wantaim em i bikpela samting, olsem na Baibel i kolim em olsem Man i “save harim beten” bilong yumi.—Song 65:2.
Em wanpela gutpela blesing tru long yumi inap beten long God i Gat Olgeta Strong! Planti man bai ting em i wanpela gutpela samting tru long toktok wantaim wanpela bikman, olsem presiden o praim-minista. Tasol God Jehova em i nambawan bikpela Man bilong heven na graun! Na yumi no mas makim taim bilong toktok wantaim em. Yumi inap beten long olgeta taim, na long olgeta hap. Na tu, yumi inap toktok long God long tingting bilong yumi. (1 Samuel 1:12-15) Tasol Jehova i laik yumi mas pilim tru long bel ol tok bilong yumi na yumi mas putim gut yau long tok bilong em na bihainim. (Maika 6:8; Matyu 6:5-13) Pasin bilong toktok wantaim i gat tupela hap bilong en, a?
Yu Save Putim Yau Long Tok Bilong God?
Olsem wanem yumi inap putim gut yau long tok bilong God? Nambawan bikpela rot em long taim yumi ritim na bihainim ol tok i stap long Baibel. (2 Timoti 3:16; 2 Pita 1:20, 21) Jisas i tok: “Ol manmeri i . . . mas bihainim olgeta tok bilong God.” (Matyu 4:4) Olsem wanem? Yu save putim gut yau long tok bilong God taim yu ritim Baibel na bihainim ol tok bilong en?
Jehova i amamas long ol man i save toktok oltaim wantaim em na ‘em i save givim bel isi long ol.’ (Filipai 4:6, 7; Sindaun 1:33) Na tu, ol bai kisim laip i stap gut oltaim long Paradais long graun, we i no gat bel hevi na pen olsem nau yumi save kisim. (Song 37:29; Jon 17:3) Man! Em i nambawan gutpela samting tru yumi inap kisim sapos yumi mekim gut tru wok long pasin bilong toktok wantaim!
[Piksa long pes 10]
Long rot bilong ritim Baibel na beten yumi inap toktok wantaim God