Kaikai i Kam Long Gaden Bilong Yu Yet

WANPELA MAN LONG RIPABLIK BILONG SENTRAL AFRIKA I RAITIM DISPELA STORI BILONG KIRAP!

LONG planti kantri ol man i save tingting planti long olsem wanem ol bai givim kaikai long famili bilong ol long olgeta de. Pe bilong kaikai bilong gaden i antap, olsem na planti taim em i hatwok tru long lukautim famili. Tasol sampela i painim wanpela gutpela rot long mekim olsem​—⁠ol i planim sampela kaikai bilong ol yet!

Ating yu laik wokim wanpela liklik gaden bilong yu yet. Tru, planti taim i no gat bikpela hap graun long arere bilong haus bilong yu yet, tasol nogut i gat wanpela hap graun i stap klostu na yu ken stretim rot bilong planim kaikai long dispela hap. Tingim mani yu inap holim sapos yu planim gutpela kaikai i save strongim skin! Pasin bilong wokim gaden em i gutpela rot bilong kisim eksasais bilong skin. Na tu, wanpela gaden inap i stap olsem wanpela projek bilong famili na ol pikinini bilong yu bai i laikim. Tru tumas, pasin bilong planim na kamapim kaikai long gaden inap skulim gut yumi. Em inap skulim yumi long pasin bilong stap isi. (Jems 5:⁠7) Na tu, pasin bilong lukim ol samting i kamap inap helpim yumi long go klostu moa long Man Bilong Wokim ol gutpela samting.​​—⁠Song 104:⁠14.

No ken ting pasin bilong kamapim kaikai bilong yu yet i no gat hatwok bilong en o kaikai bai kamap wantu tasol. Tasol sapos yu tingting strong na yu gat liklik save, bai yu inap mekim gut wok!

Famili i Mekim Gut Wok

Tingim Timothée na Lucie​—⁠tupela marit Kristen i gat tupela pikinini, na ol i sindaun long Bangui, em nambawan biktaun bilong Ripablik Bilong Sentral Afrika. Ol i ting pasin bilong wokim wanpela gaden bilong ol yet em i gutpela rot bilong helpim liklik mani ol i save kisim long wok mani na i givim amamas long ol.

Taim Lucie i gat 13 krismas, em i bin wokim liklik gaden long arere bilong haus bilong em, na em i bin wok long en long ol apinun bihain long skul na long ol wiken. Em i bin amamas long lukim ol kaikai i kamap. Inap sampela yia bihain, em i kisim tingting long wokim wanpela gaden bilong famili bilong em. Em i stretim rot bilong yusim wanpela hap graun i stap klostu long em na ol man i bin yusim olsem ples pipia. Lucie i lukim olsem em inap mekim gut wok long dispela hap graun. Pipia i no mekim na graun i bagarap, nogat; insait long planti yia pipia i sting na dispela i mekim na graun i gat gutpela gris bilong kamapim kaikai. Lucie na Timothée i tingting long senisim dispela hap graun i kamap wanpela gutpela gaden.

Kirap Long Wok

Tasol pastaim ol i mas kisim sampela save. Ol i toktok long sampela man i save long kamapim ol kaikai bilong gaden, na ol i putim gut yau. Hap graun i drai na i mas i gat wara, olsem na ol i lain long digim hulwara bilong ol yet. Ol i ritim ol buk long ol samting bilong wokim gaden na dispela tu i helpim ol.

Ol i ritim ol buk i stori long samting sampela kaikai bilong gaden i save mekim long narapela kaikai bilong gaden, na ol i lain olsem sampela kaikai i save helpim ol narapela kaikai long kamap gut. Tasol sampela kaikai i mekim na narapela kaikai i no save kamap gut. Sampela i tok ol karot na ol tomato i save kamap gut wantaim long gaden. Na tu, pasin bilong planim seleri na koliplaua wantaim i gutpela, narapela i save helpim narapela. Na liklik sayor ol i kolim dil i “pren” wantaim ol bin, kukamba, letis, na anian. Tasol grinpela letis na pasli i no save kamap gut wantaim. Ol anian i save mekim nogut long ol grinpela bin samting. Sapos sampela kaikai i mekim nogut long narapela kaikai, ol i no save kamap strong tumas na long dispela rot em i isi long ol binatang i bagarapim ol.

Na tu, Timothée na Lucie i lain olsem i no gutpela long planim wanpela kain kaikai tasol long wanpela hap graun. Sapos ol binatang na sik i bagarapim kaikai, ol inap lus long olgeta dispela kaikai. Ol i bin skelim gut na planim kain kain kaikai na bai dispela hevi i no ken kamap. Ol liklik sayor na plaua i mekim na gaden i gat kala kala, na i luk naispela tru, na i pulim ol binen na ol narapela binatang i save helpim gaden long i stap gutpela.

Dispela tupela marit i painim tu rot na ol i no spreim marasin nogut long ol kaikai bilong gaden. Ol i lain olsem pasin bilong planim galik i helpim ol kaikai bilong gaden long sakim sampela binatang nogut.a

Timothée na Lucie i bin mekim bikpela hatwok na ol i no les, tasol long nau ol i gat gutpela gaden tru. Ol i kamapim kabis, pasli, tomato, karot, kukamba, na egplan​—⁠sampela taim ol i kamapim planti kaikai tru na famili i no inap pinisim!

Wokim Gaden Bilong Yu Yet!

Tasol i no long Afrika tasol ol man i luksave olsem i gutpela long ol i gat gaden bilong ol yet. Olsem: Long Jemani, i gat inap olsem wan milion liklik gaden ol man i wokim klostu long ol taun. Sampela taim ol i kolim Schrebergaerten (em nem bilong wanpela saveman bilong ol diwai na plaua samting, em Daniel Schreber). Ol dispela gaden i stap long ol hap graun (namel long 200 na 400 skwe mita) na ol manmeri bilong taun i ken rentim. Wanpela saveman i tok, ol dispela liklik gaden “ol i bikpela samting bilong kamapim ol prut na kaikai.” Na ol i stap olsem ol liklik “paradais” long ol man bilong wokim gaden​—⁠em ples bilong wok na malolo.

Baibel i tok promis olsem i no longtaim na dispela graun olgeta bai kamap wanpela gaden​—⁠wanpela Paradais tru. (Luk 23:​43, NW ) Tasol inap long dispela taim, ating yu inap painim wanpela hap graun na yu inap kisim kaikai long liklik gaden bilong yu yet.

[Futnot]

[Piksa long pes 26]

Timothée na Lucie i kisim wara bilong gaden bilong famili bilong ol

[Piksa long pes 26]

Wanpela liklik gaden long Munich, Jemani