Baibel i Tok Wanem?
I Gat Rot Bilong Daunim Ol Pasin Nogut?
MAN bilong raitim buk, Mark Twain i tok: “Em i isi tru long lusim smok. Mi save long dispela, long wanem, mi bin mekim olsem planti tausen taim.” Planti man inap pilim tru tok bilong Twain. Tru, ol i save olsem sampela pasin ol i mekim i no stret na inap bagarapim man, tasol ol i save tu olsem i hatwok long sakim na daunim ol dispela pasin. Ol pasin nogut ol man i save mekim inap planti yia inap pas strong tru long ol, na maski ol i wok strong tru long senisim, em i hatwok tru. Taim man i traim long daunim ol laik nogut, dispela inap pinisim strong na givim pen long man.
Dokta Anthony Daniels, wanpela dokta i mekim wok long kalabus, em i tok planti taim ol kalabusman i tok ol i kalabus tru long ol samting ol i tingting oltaim long en na ol laik nogut. Ol i tok, taim man i kalabus pinis long wanpela samting, “laik bilong mekim pasin nogut i holim em strong na em i no gat strong long sakim.” Sapos dispela tingting em i stret, ating yumi no gat asua sapos yumi inapim ol laik bilong yumi. Tasol olsem wanem? I stret long tok olsem yumi no gat strong long bosim ol tingting na laik i stap long bel bilong yumi? O yumi inap daunim ol pasin nogut? Bilong kisim stretpela bekim bilong ol dispela askim, yumi ken skelim tok Baibel i mekim.
Laik Bilong Skin—Mekim Ol Samting
Baibel i tokaut klia olsem yumi mas tokim God long ol pasin yumi mekim. (Rom 14:12) Na tu, em i laik bai yumi mas bihainim ol stretpela lo bilong em. (1 Pita 1:15) Em Man Bilong Wokim yumi, olsem na em i save wanem samting i gutpela bilong helpim yumi, na ol stiatok bilong em i no orait long planti pasin em planti man i save mekim. (1 Korin 6:9, 10; Galesia 5:19-21) Tasol em i man bilong sori na em i gat stretpela tingting long skel bilong ol samting ol man bilong graun inap mekim.—Song 78:38; 103:13, 14.
Man bilong raitim song i tok: “Sapos yu kaunim olgeta sin bilong mipela bai husat inap long winim kot bilong yu?” (Song 130:3) Yes, Jehova i save tru olsem “stat long taim ol manmeri i yangpela yet ol i save tingting long mekim ol pasin nogut.” (Stat 8:21) Ol pasin yumi kisim taim mama i karim yumi, ol pasin kranki bilong yumi, na ol samting i bin painim yumi bipo i mekim na yumi no inap sakim olgeta tingting na laik nogut. Jehova i gat gutpela pasin olsem na em i no strong long yumi mas mekim ol samting i stret olgeta na i no popaia liklik.—Lo 10:12; 1 Jon 5:3.
Tasol dispela gutpela pasin bilong Jehova i no mekim na yumi no gat wok long bosim ol laik nogut, nogat. Aposel Pol i tokaut olsem em i bin pait strong long daunim ol laik nogut, tasol em i no givap. (Rom 7:21-24) Em i tok: “Mi save paitim tru bodi bilong mi na mekim em i bihainim laik bilong mi.” Wanem as bilong mekim olsem? “Nogut . . . mi yet mi no kisim prais.” (1 Korin 9:27) Yes, pasin bilong bosim gut skin i bikpela samting bilong yumi inap winim na daunim ol laik na pasin nogut bilong yumi.
Man Inap Senisim Pasin
Ol saientis i save skelim pasin bilong ol man, ol i tok ol pasin nogut na ol gutpela pasin, em ol samting man i lain long en na kamapim insait long sampela yia samting. Sapos dispela tok i stret, orait man inap lusim tu ol pasin nogut! Em inap mekim olsem wanem? Ol man bilong raitim buk long pasin bilong bosim bel hevi, ol i tok, “tingting long ol gutpela samting i kamap taim yu lusim ol pasin bipo yu bin mekim.” Na “mekim wanpela lista long olsem wanem wok bilong senisim pasin bilong yu inap helpim laip bilong yu i kamap gutpela moa.” Yes, taim yumi tingting long ol gutpela samting inap kamap taim yumi senisim ol pasin nogut bilong yumi, dispela inap kirapim yumi long mekim olsem.
Tingim tok bilong aposel Pol long yumi mas mekim ‘tingting bilong yumi i kamap nupela.’ (Efesus 4:22, 23) Tingting bilong yumi i save kirapim yumi long mekim ol samting. Yu inap senisim dispela tingting taim yu go klostu long God na wok long kisim pasin bilong laikim ol lo bilong em. Taim yu save olsem yu wok long amamasim Jehova, dispela bai kirapim yu long senisim pasin.—Song 69:30-33; Sindaun 27:11; Kolosi 1:9, 10.
Tru, i hatwok long rausim ol pasin nogut i bin bosim yumi inap planti yia. Yumi no ken ting dispela pait bilong daunim ol pasin nogut em bai isi. Sampela taim bai yu pundaun na mekim gen ol dispela pasin. Tasol yu no ken tingting planti, bihain bai i no hatwok tumas long daunim pasin nogut. Taim yu wok strong, nupela pasin yu wok long kisim bai kamap pasin tru bilong yu.
Man i laikim God i ken save olsem God bai helpim na blesim em. Pol i tok promis olsem: “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. . . . God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” (1 Korin 10:13) Klostu nau, God Jehova bai bagarapim pasin nogut bilong nau wantaim olgeta traim, laik nogut, na mangal bilong en. (2 Pita 3:9-13; 1 Jon 2:16, 17) Olgeta man i gat sin na i abrusim bagarap long dispela taim, bihain olgeta kain bagarap bilong skin, tingting na bel bai pinis olgeta. God i tok promis: “Ol man bai i no inap tingim moa ol samting i bin kamap bipo.” (Aisaia 65:17) Wanpela bilong dispela “ol samting i bin kamap bipo” em ol laik nogut. Ating dispela em wanpela bikpela as long yumi mas wok strong nau long sakim na pait long daunim ol pasin nogut, laka?
[Blok/Ol Piksa long pes 15]
DAUNIM OL PASIN NOGUT
1. Luksave na tokaut long ol pasin nogut bilong yu. Askim yu yet, ‘Dispela pasin i helpim mi tru? Em i skrapim bel bilong ol arapela? Dispela pasin i bagarapim helt, mani, sindaun, famili, o bel isi bilong mi? Sapos mi no mekim dispela pasin, laip bilong mi bai gutpela moa olsem wanem?’
2. Senisim dispela pasin nogut wantaim gutpela samting. Olsem: Yu save lusim bikpela haptaim long Intenet, olsem lukluk long ol piksa nogut? Orait, makim dispela haptaim bilong ritim ol gutpela tok, stadi, o eksasais.
3. Skelim wok bilong yu. Long wan wan de lusim sampela minit long tingting long wok bilong yu i kamap gutpela olsem wanem. Sapos yu pundaun na mekim pasin nogut, skelim wanem samting i bin kirapim yu long mekim olsem.
4. Askim ol arapela long helpim yu. Tokim ol pren na famili olsem yu laik daunim dispela pasin, na askim ol long kirapim tingting bilong yu taim ol i lukim olsem yu laik mekim gen dispela pasin. Toktok wantaim ol arapela husat i bin winim pinis wankain hevi.—Sindaun 11:14.
5. Holim stretpela tingting. No ken ting bai yu daunim dispela pasin wantu. Sampela pasin em yu mekim inap planti yia i hatwok long senisim.
6. Beten long God. Long helpim yu kisim long God yu inap daunim olgeta kain pasin nogut.—Song 55:22; Luk 18:27.