Yu Save Draivim Ka Long Wanem Sait Bilong Rot?

Wanpela man long Briten i raitim dispela stori bilong Kirap!

Long ples balus mi bungim pren bilong mi i kam long Amerika na kisim em i go long ka. Mi tokim em: “Sindaun long fran,” na kwiktaim em i go sindaun long sait bilong draiva. Em i tok: “Aiyo, mi lus tingting ya. Long hia yupela i save draivim ka long rong sait.”

Tru, ating mi tu bai mekim wankain tok long em sapos mi go long Amerika. Taim mipela i draiv i go long haus, mi wokim tingting long painimaut as na ol man long sampela kantri i save draiv long han kais bilong rot na planti arapela i save draiv long han sut.

Pasin Bilong Draiv Long Bipo

Yumi ken skelim ol samting i bin kamap bipo, inap olsem 2,000 yia i go pinis, taim ol Rom i bosim Briten. Ol saveman bilong painim ol samting bilong bipo, ol i painim samting i soim pasin bilong ol man bilong dispela taim long draiv. Long 1998 ol i painim wanpela rot i go long wanpela ples bilong ol Rom long katim ston, klostu long Swindon, Inglan. Ol mak bilong wil long wanpela sait bilong rot i daun moa winim ol mak long hapsait bilong rot, na dispela i makim olsem ol karis i go long dispela hap, na taim ol i lusim dispela hap, ol i save karim planti ston wantaim ol. Ol dispela mak bilong wil i soim olsem long dispela hap, ol Rom i save draiv long han kais bilong rot.

Sampela man i ting ol man bilong raun long ol hos long bipo, ol i save raun long han kais. Planti man i mekim wok long han sut bilong ol, olsem na ol man bilong raun long hos ol i yusim han kais bilong ol long holim tupela rop bilong stiaim hos, na ol i larim han sut bilong ol i stap fri​—ol i mekim olsem na bai ol inap sekan long narapela man i kam long hos o yusim bainat bilong lukautim ol yet, sapos i gat wok long mekim olsem.

Senis i Go Long Han Sut

Long yia 1790 samting, long ol kantri olsem Amerika, ol man i senisim pasin bilong draiv long han kais bilong rot na ol i kirap draiv long han sut. Dispela senis i kamap taim ol man i kirap long yusim ol bikpela karis bilong karim kago​—ol i pasim karis i go long ol hos na bai ol hos i ken pulim i go. Ol dispela karis i no gat sia bilong draiva, olsem na draiva i save sindaun long hos i stap long han kais na em i save holim wip long han sut bilong em. Taim draiva i sindaun long han kais, em i laik bai ol narapela karis i abrusim em long han kais na bai em inap lukim gut na abrusim ol wil bilong ol dispela karis. Bilong mekim olsem, em i draiv long han sut bilong rot.

Tasol ol man long Inglan ol i bihainim yet pasin bilong draiv long han kais bilong rot. Ol karis bilong ol i liklik, na draiva i save sindaun long karis, long sia i stap long fran long han sut. Em inap yusim han sut bilong em long mekim wok long longpela wip na wip i no pas long ol kago samting i stap baksait. Taim draiva i stap olsem long han sut bilong karis, em inap skelim gut spes i stap namel long karis bilong em na karis i kam long hapsait bilong rot na em i ken stiaim gut karis bilong em long han kais bilong rot. Ol kantri i kam insait long Gavman Bilong Inglan ol i kirap bihainim dispela pasin bilong draiv long han kais, tasol i no olgeta i mekim olsem. Kanada i senis na kisim pasin bilong draiv long han sut na bai i isi long ol taim ol i brukim boda i go i kam long Amerika.

Ol samting bilong wok politik long Frans i mekim bikpela samting long pasin bilong draiv. Paslain long Bikpela Pait bilong 1789, ol lain i gat nem na namba ol i save draivim karis bilong ol long han kais bilong rot, na ol i fosim ol man nating long draiv long han sut. Tasol taim pait i kirap, ol dispela lain i traim hat long haitim olsem ol i bikman na ol i kirap draiv wantaim ol man nating long han sut bilong rot. Long 1794, gavman bilong Frans i kamapim pasin bilong draiv long han sut long Paris, na bihain dispela pasin i go long ol narapela hap tu taim ami bilong Napoléon Namba 1 i daunim planti kantri long Yurop. I gat as na Napoléon i laikim dispela pasin bilong draiv long han sut. Wanpela buk i tok Napoléon i save mekim wok long han kais bilong em, olsem na “ol soldia bilong em i mas mats long han sut na bai han bilong em long holim bainat i ken stap namel long em na ol birua.”

Long Yurop, ol kantri i sakim Napoléon ol i bihainim yet pasin bilong draiv long han kais bilong rot. Long Rasia na Potugal ol man i senis na kirap draiv long han sut long 1900 samting. Long Ostria na Sekoslovakia ol man i senis na draiv long han sut taim ol Natsi long Jemani i kirap bosim ol long 1939 samting, na bihain Hangari tu i senis na kirap draiv long han sut. Long nau i gat 4-pela kantri tasol bilong Yurop em ol man i draiv yet long han kais: Briten, Aialan, Saiprus, na Malta. Maski Japan i no bin stap aninit long Briten long wanpela taim, ol man long Japan i save draiv long han kais.

Sip, Balus, Tren, na Yu

Olsem wanem long ol sip na balus? Ol sip i save raun long han sut. Ol balus tu i save raun long han sut. Na ol tren? Long sampela kantri, long ol rot em tupela tren inap ron long en, ol masin insait long tren bai makim wanem sait bilong rot em tren i mas ron long en. Ol rot bilong tren long nau em inap long ol tren i ron i go o i kam long wanem sait bilong rot ol i laik ron long en, tasol i no olsem long ol masin bilong stiaim ron bilong ol tren long bipo. Ating wanem kantri i bin wokim rot bilong tren em i save makim wanem sait bilong rot em tren bai ron long en.

Na olsem wanem long man i wokabaut long lek? Ol i tok sapos i no gat rot bilong ol man tasol long wokabaut long en, orait i gutpela moa long wokabaut long sait bilong rot we man inap lukim ol ka i ron i kam. Sapos ol man i save draivim ka long han sut bilong rot, orait ol man i mas wokabaut long han kais bilong rot na bai ol inap lukim ol ka i kam. Long Briten mipela i save draivim ka long han kais, olsem na mipela i save wokabaut long han sut bilong rot. Olsem wanem long pren bilong yumi long Amerika? Em i save wokabaut long han kais bilong rot!