Stap Wantaim Pret

ROXANAa i pret long tokim man bilong em olsem em i laik mekim pat-taim wok. Taim Roxana i laik go lukim mama bilong em na em i askim man bilong em long basfea, man i paitim em nogut tru na ol i mas bringim em i go long haus sik. Nau em i save pret oltaim.

Pastaim Rolando i save larim meri bilong em i kisim PMV na i go long haus long nait, tasol nau em i save kisim meri long ka. Long hap ol i sindaun long en, planti taim ol man i save pait na bagarapim narapela, olsem na em i tingting planti, nogut meri bilong em i kisim bagarap.

Haidé i save wok long wanpela biktaun. Wanpela taim em i laik i go long haus na long rot em i bungim wanpela lain em ol i mats bilong kamapim tingting bilong ol, na pait i kirap. Long nau em i save pret taim em i harim ol lain i mats. Em i tok: “Mi no pilim seif. Mi no laik wok moa long dispela hap. Tasol i no gat wanpela samting mi inap mekim.”

Roxana, Rolando, na Haidé, ol i save pret long olgeta taim​—⁠ol i no pret tasol long taim hevi i kamap, nogat. Dispela pret i save stap wantaim ol long olgeta taim. Taim ol manmeri i pret oltaim, dispela inap pinisim strong bilong ol. Pret inap pasim ol long mekim ol samting ol i laik mekim na dispela i mekim na ol i no stap amamas. Pret inap bosim tingting bilong man na pasim ol long tingim ol narapela samting.

Sapos oltaim man i pret, dispela inap bagarapim helt bilong em na mekim em i bel hevi. Wanpela magasin bilong helt i tok: “Dispela i save daunim strong bilong bodi long sakim sik na em inap kamapim ol sik bilong klok, sik bilong kidni, ol sua long bel, het i pen, man i no inap slip, na wari na tingting planti. Sapos oltaim man i stap olsem, dispela inap pinisim strong bilong em.”

Long nau, planti man i stap wantaim pret. Olsem wanem? Wanpela taim bai kamap na ol man i no ken pret moa?

[Futnot]