Baibel i Tok Wanem?

I Stret Yumi Beten Long Virgo Maria?

OL MAN i save long lotu Kristen, ol i save Maria em i husat. Baibel i stori olsem God i Gat Olgeta Strong i bin mekim gut tru long dispela meri long rot bilong makim em long kamap mama bilong Jisas. Rot Jisas i bin kamap long en i narapela kain tru​—⁠Maria i kisim bel, tasol em i no bin slip wantaim wanpela man. Inap longtaim pinis sampela lotu bilong Kristendom i bin adorim Maria long rot bilong beten. Long 431 C.E., Bung Bilong Efesus i tokaut olsem Maria em i “Mama Bilong God.” Planti manmeri long nau i lain long beten long em.a

Ol man i lotu long God na ol i gat gutpela bel, ol i save pinis olsem taim ol i beten, ol i mas beten long man husat i gat wok long harim beten. Baibel i tok wanem long dispela samting? I stret ol Kristen i beten long Virgo Maria?

“Skulim Mipela Long Mekim Prea”

Gutnius Luk i raitim i tok wanpela disaipel bilong Jisas i bin tokim em: “Bikpela, yu skulim mipela long mekim prea.” Orait Jisas i tok: “Taim yupela i beten, yupela i ken tok olsem, ‘Papa, nem bilong yu i mas i stap holi.’ ” Na long tok Jisas i autim antap long maunten, em i tokim ol disaipel long beten olsem: “Papa bilong mipela, yu stap long heven, nem bilong yu i mas i stap holi.”​​—⁠Luk 11:​1, 2; Matyu 6:⁠9.

Namba wan samting dispela i lainim yumi long en, i olsem: Taim yumi beten, yumi mas beten long Papa bilong Jisas, em Jehova. I no gat wanpela tok long Baibel i tokim yumi long beten long narapela man. Dispela i stret long ol tok Moses i bin givim ol Israel, em i tok: “Yupela i mas aninit long God, Bikpela bilong yumi. Na yupela i mas lotu long em wanpela tasol.”​​—⁠Lo 6:⁠13.

Olsem Wanem Long Korona?

Planti man husat i save beten long Maria ol i bin lain olsem ol inap kisim ol gutpela blesing long rot bilong kolim kolim wankain tok long beten​​—⁠ol beten olsem Ave Maria, Papa Bilong Mipela, na sampela beten moa. Buk Symbols of Catholicism i tok: “Nambawan bikpela samting ol Katolik i save mekim wok long en bilong onaim Maria, em korona.” Korona i makim wanpela pasin bilong lotu bilong tingim Virgo Maria. Em i makim tu rop bis bilong kaunim ol beten. Buk i tok: “Korona i gat 5-pela hap bilong en. Ol wan wan hap i gat 10-pela bis, na 5-pela bikpela bis i brukim ol dispela 5-pela hap. Long rot bilong dispela bis, man i save kolim beten bilong ‘Ave Maria’ 50 taim, ‘Papa Bilong Mipela’ 5-pela taim, na ‘Hosana’ 5-pela taim.” Olsem wanem? God i save harim ol beten ol man i save kolim kolim gen long korona?

Ol tok Jisas i bin givim ol disaipel bilong em i bekim dispela askim tu. Em i tok: “Taim yupela i mekim prea, maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.” (Matyu 6:⁠7) Em nau, Jisas i no orait long ol disaipel i kolim kolim wankain tok long beten bilong ol.

Tasol ating sampela bai tok, ‘Jisas i bin lainim ol disaipel long kolim Papa Bilong Mipela, em wanpela beten bilong korona.’ Tru, Jisas i bin lainim ol disaipel long wanpela pasin bilong beten, em yumi kolim Papa Bilong Mipela. Tasol yumi mas tingim dispela samting: Jisas i bin kolim dispela beten bihain stret long em i tok no ken “mekim planti toktok nating.” Narapela samting i kamapim klia olsem Jisas i no laik bai yumi kolim kolim nating dispela beten, i olsem: I gat tupela taim em Baibel i stori long en we Jisas i lainim ol disaipel long pasin bilong beten, tasol long namba 2 beten, em i no kolim gen olgeta wan wan tok em i bin mekim long namba wan beten. (Matyu 6:​9-​15; Luk 11:​2-4) Ol tingting Jisas i kamapim long dispela tupela beten i wankain, tasol olgeta wan wan tok em i mekim i no wankain. Dispela i givim tingting long yumi olsem ol dispela beten ol i bilong helpim ol disaipel long save long pasin bilong mekim beten na long ol samting ol i ken beten long en, na em tasol. Tasol samting i bikpela samting moa, ol tok bilong Jisas i makim husat em yumi mas beten long en.

Tingim Maria

Maski Baibel i no tokim ol Kristen long beten long Maria, dispela i no daunim Maria na bikpela wok bilong em insait long ol samting God i tingting pinis long mekim. Ol blesing Pikinini bilong em bai givim long ol man i bihainim tok, dispela bai helpim ol inap oltaim oltaim. Maria yet i bin tok: “Bai olgeta lain manmeri i tok long God i bin givim bikpela amamas long mi.” Na kasen bilong em, Elisabet, i tokim Maria: “God i bin mekim gut tru long yu na givim yu blesing i winim blesing em i givim long ol arapela meri.” Tru tumas, God i bin mekim gut tru long Maria taim em i makim em long karim Mesaia.​​—⁠Luk 1:​42, 48, 49.

Tasol i no Maria tasol em Baibel i tok God i bin amamas long em, nogat. Baibel i stori long Jael, em wanpela meri i bin mekim wok bilong helpim lain Israel bilong bipo, olsem: “Amamas bilong en i ken winim amamas bilong ol arapela meri.” (Hetman 5:​24) Gutpela meri Jael, na Maria, na planti meri moa em Baibel i stori long ol, ol inap tru long yumi bihainim pasin bilong ol​​—⁠tasol adorim ol, nogat.

Maria i wanpela gutpela disaipel bilong Jisas. Sampela taim em i bin stap wantaim Jisas taim em i mekim wok bilong em long graun, na taim em i dai tu. Taim Jisas i kirap bek pinis na ol brata bilong em i “bung na beten,” Maria tu i save kam na beten wantaim ol. Dispela i givim tingting long yumi olsem taim holi spirit i kam long ol brata bilong Jisas long Pentikos 33 C.E., em i bin kam long Maria tu, olsem na Maria i insait long dispela lain i olsem meri bilong Krais ol bai mekim wok king wantaim Em long heven.​​—⁠Matyu 19:28; Aposel 1:​14; 2:​1-4; KTH 21:​2, 9.

Tasol ol dispela samting i no makim olsem yumi ken beten long Maria, nogat. Tru, beten em i hap wok lotu bilong yumi, na Baibel i kirapim ol Kristen long “beten long olgeta taim.” (Rom 12:12) Tasol taim yumi beten, yumi mas beten long Jehova wanpela tasol, na long nem bilong Jisas Krais.​​—⁠Matyu 4:​10; 1 Timoti 2:⁠5.

[Futnot]