Baibel i Tok Wanem?

I Stret Ol Kristen i Mekim Wok Long Korona o Olsem Wanem?

^“TAIM yumi beten, Maria na Korona i nambawan rot bilong i go klostu long God I Gat Olgeta Strong.”​—Jin i tok olsem.

“Sapos yu laik bai Maria i helpim yu, orait em bai helpim yu long rot bilong Korona. Long olgeta hap mi go long en mi kisim Korona i go wantaim mi.”​—Kevin i tok olsem.

“Ol i lainim mipela olsem, mipela i mas beten long God long rot bilong Maria.”​—Jinin, bipo em i wanpela sister Katolik i tok olsem.

Olsem wanem? I gat wanpela as tru na yumi ken bilip long Korona? Yu ting God na Krais na Maria i tokim yumi long mekim wok long en? Ol buk i kamapim stori bilong bipo, na buk Baibel, i tok wanem long Korona?

Planti man i mekim wok long Korona i bilip olsem, ol Kristen i as bilong en. Tasol ol buk i kamapim stori bilong bipo i tokaut olsem, pasin bilong kolim na kaunim ol beten long wanpela rop bis i kirap paslain long taim bilong ol Kristen. Wanpela buk (The World Book Encyclopedia) i kamapim as bilong Korona olsem: “Pasin bilong mekim wok long rop bis taim ol i beten i kirap long bipo tru, na ating ol Buda i paslain long mekim. Ol Buda na Muslim i save mekim wok long rop bis taim ol i beten.” Narapela buk (The Catholic Encyclopedia) i tok, taim lotu Katolik i no kisim yet Korona, ol haiden long olgeta hap ol i bin mekim wok long rop bis taim ol i beten; ol i mekim wok long en inap planti handet handet yia pinis.

Maria na Korona

Ol i kolim Maria, “Kwin bilong Korona Holi.” Ol i tok Maria i kirapim ol Katolik long “Kaunim Korona long Taim Bilong Beten.” Wanpela Korona ol Katolik i kaunim planti taim em “Korona bilong Virgo Maria,” na dispela Korona i bin kamap pastaim long yia 1150 samting, na ol i wok long senisim liklik i kam inap long yia 1450 samting. Korona na Maria i poroman wantaim, long wanem, misin i tok Maria yet i kirapim ol man long kaunim Korona, na taim ol i beten na kaunim Korona ol i litimapim nem bilong Maria.

Tasol bilong wanem ol man i givim bel long Maria na Korona? Ol bikman bilong lotu Katolik i tok, as bilong en em tok ensel Gebriel i mekim long Maria, olsem: “Gude, meri. Bikpela i stap wantaim yu, na em i bin blesim yu na mekim gut long yu.” (Luk 1:28) Maria i save em i bikpela samting tru long em i kisim bel na karim Jisas; tasol em i save dispela i liklik samting taim em i skelim wantaim biknem na namba Pikinini bilong em bai kisim bihain. Ensel Gebriel i stori long Jisas olsem: “Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. . . . wok king bilong en bai i no inap pinis.”​—Luk 1:​32, 33.

Tingim dispela tok ensel i mekim; em i no tok ol man i mas givim biknem long Maria, nogat; ol i mas givim biknem long dispela Pikinini Maria bai karim​—em Jisas. Em bai kamap bikman na mekim wok king. (Filipai 2:​9, 10) Ensel i no tok God bai makim Maria i kamap “Kwin bilong Korona Holi.” Tasol God i mekim gut long Maria; em i kamap mama bilong Jisas.​—Luk 1:42.

Maria i no laik kisim biknem. Em i amamas long daunim em yet na lotu long God Antap Tru. Maria i bekim tok long ensel Gebriel olsem: “Mi wokmeri bilong Bikpela. Em i ken mekim long mi olsem yu tok.” Em nau, em i kamapim klia olsem em i meri bilong bihainim tok na em i mekim long pasin daun. Inap long taim em i dai, Maria i kamapim bel bilong em, olsem em i meri bilong bilip tru, na laikim tumas stretpela pasin, na stap gut long Krais Jisas olsem wanpela disaipel bilong em, na em i save bung wantaim ol man i lotu long God I Gat Olgeta Strong na beten wantaim ol long pasin daun. Ol Kristen bilong pastaim ol i beten wantaim Maria​—ol i no beten long em.​—Aposel 1:​13, 14.

Beten na Korona

Ol Kristen i tingim beten i olsem wanpela gutpela presen ol i kisim long God na ol i mas laikim tru. Beten i olsem yumi toktok gut wantaim God I Gat Olgeta Strong. Beten i mas kamapim tru ol tingting i stap long bel bilong yumi. Buk New Catholic Encyclopedia i tok olsem: “Beten i mas makim olsem yumi pas gut long God olsem wanpela pren.” Taim yumi beten, nogut oltaim yumi mekim nating wankain beten, na no ken kolim nating long maus wanpela beten em yumi laikim tumas na yumi lainim pinis na holim long tingting.​—Matyu 6:7, 8.

Yu ting Korona i helpim yumi na bai beten i gat as bilong en? Jinin i tok, taim em i kaunim Korona na planti taim em i kolim beten olsem “Litimapim Nem Bilong Maria,” em i kolim nating tasol long maus. Kolim kolim tok planti taim long Korona i no bin helpim em long kam klostu long God, nogat. Wanpela meri bipo em i sister Katolik, em Lidia, em i tok: “Taim mi kaunim Korona mi save em i no skulim mi liklik long wanpela samting. Mobeta sapos mi bin kaunim ol buk i kamapim tok bilong lotu.” Pasin bilong kolim wanpela beten planti taim i no helpim ol man, long wanem, God i tok promis olsem: “Taim ol i no beten yet long mi na askim mi long ol samting ol i gat laik long en, bai mi bekim askim bilong ol.” (Aisaia 65:24; Matyu 6:​6, 8, 32) God I Gat Olgeta Strong i save tingim na harim beten bilong ol man i gat stretpela bel na ol i givim bel tru long beten. Pasin bilong kaunim Korona i no helpim man long kamapim bel tru bilong em long God. Nogat.​—Buk Song 119:145; Hibru 10:22.

Rot Bilong Beten long God

Krais Jisas tasol i rot bilong toktok long Man bilong “harim beten.” (Buk Song 65:2) Jisas i lainim ol man olsem: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jon 14:6) God i no tokim Maria long mekim dispela wok wantaim Jisas olsem wanpela namelmeri, nogat. Sapos Maria i bin kisim dispela wok, ating Jehova bai tokim yumi olsem, a?​—Hibru 4:​14-16; 1 Jon 2:​1, 2.

Pasin bilong kaunim Korona na kolim nating ol beten, dispela i kirap pastaim long ol lain haiden. Man i beten long Maria em i sakim tok bilong Jisas olsem, “I nogat wanpela man inap i kam long Papa long narapela rot. Nogat. Long mi tasol.” Olsem na Korona na Maria i no rot God i makim bilong yumi beten long Em. Nogat tru.