“Skulim Mipela Long Mekim Prea”

“BIKPELA, yu skulim mipela long mekim prea.” Wanpela disaipel bilong Krais Jisas i bin mekim dispela tok. (Luk 11:⁠1) Baibel i no kolim nem bilong dispela disaipel, tasol ating em i wanpela man i save tingim tru olsem beten em i wanpela bikpela samting. Long nau, ol man i lotu long God long pasin i stret, ol tu i save olsem beten em i bikpela samting, long wanem, beten em i rot bilong toktok long Nambawan Bikpela Man bilong heven na graun na em bai harim beten bilong ol! Na Man bilong “harim beten” em i save tingim gut ol hevi bilong yumi na ol samting yumi save tingting planti long en. (Song 65:⁠2) Na bikpela samting moa, long rot bilong beten yumi ken tenkyu long God na litimapim nem bilong em.​—⁠Filipai 4:⁠6.

Tasol dispela tok “skulim mipela long mekim prea,” em i save kamapim sampela bikpela askim. Ol lotu bilong olgeta hap i gat kain kain pasin bilong beten long God. Olsem wanem? I gat sampela pasin bilong beten i stret long mekim na sampela pasin i no stret long mekim? Bilong bekim dispela askim, pastaim bai yumi kisim save long sampela pasin bilong beten em planti lotu i save mekim. Bai yumi stori long ol pasin bilong beten ol man i mekim long Latin-Amerika.

Ol Imis na “Ol Santu”

Planti man long ol kantri bilong Latin-Amerika i save tingim tru lotu bilong ol. Olsem: Long olgeta hap bilong Meksiko yumi ken lukim planti man i save beten long “ol santu.” Tru tumas, planti taun bilong Meksiko i gat “ol santu,” na ol i save makim ol bikpela de bilong litimapim ol dispela santu. Na ol Katolik tu long Meksiko ol i save beten long planti imis. Tasol samting man i laik beten long en, dispela i makim em bai i beten long wanem “santu.” Olsem: Sapos wanpela man i laik painim wanpela poroman bilong marit long em, em bai laitim wanpela kandel bilong “Santu” Antoni. Na sapos wanpela man i laik raun long ka, em bai beten long “Santu” Kristofa, em santu bilong ol man i save raun long ka, na ol narapela man i save raun.

Tasol ol dispela pasin i kamap long wanem hap pastaim? Ol stori bilong bipo i kamapim klia olsem taim ol Spen i kam long Meksiko, ol i painim ol man i strong long lotuim ol god haiden. Long buk bilong em (Los Aztecas, Hombre y Tribu [Lain Astek, Man na Lain]), Victor Wolfgang von Hagen i tok: “Ol man i gat ol god bilong ol yet, na olgeta liklik diwai i gat god, na olgeta wan wan wok i gat wanpela god o god meri, na man i laik kilim i dai em yet em tu i gat wanpela god. Yakatekutli em i god bilong ol bisnisman. Ol i gat planti god, na olgeta god i gat pasin na wok bilong ol yet.”

Ol dispela god i klostu wankain long “ol santu” bilong ol Katolik, olsem na taim ol Spen i kam na ol i laik mekim ol asples i kamap “Kristen,” ol asples i lusim tasol ol god bilong ol na lotu long “ol santu” bilong misin. Wanpela stori long nius The Wall Street Journal i tokaut olsem long sampela hap bilong Meksiko, as bilong ol pasin lotu ol Katolik i mekim em ol pasin haiden. Na nius i tok, long wanpela hap klostu olgeta 64 “santu” em ol asples i save lotu long ol i wankain olsem “ol god bilong ol Maya.”

Buk New Catholic Encyclopedia i tok “ol man i beten long ol santu ol i save bilip strong long ol na ol i pas gut wantaim ol, . . . na dispela pasin i no pasim ol liklik long stap wanbel wantaim Krais na God, nogat; em i save helpim ol long stap wanbel moa wantaim tupela.” Tasol dispela pasin bilong pas gut wantaim ol santu, yumi save em i hap pasin bilong lotu haiden; orait, olsem wanem dispela pasin inap helpim ol man long pas gut moa long God tru? Yu ting God i amamas long ol beten ol man i save mekim long ol dispela “santu”?

As Bilong Korona

Narapela pasin bilong lotu planti man i save bihainim, em ol i save kaunim bis, olsem korona. Wanpela bikpela buk (Diccionario Enciclopédico Hispano-Americano) i tok, korona em i wanpela “rop i gat 50 o 150 bis long en na i gat sampela bikpela bis namel i brukim ol bis i go 10-pela 10-pela. Ol i pasim tupela arere bilong rop wantaim na ol i ropim 3-pela bis na pasim long en na wanpela kruse i hangamap long en.”

Wanpela liklik buk Katolik i stori long rot bilong mekim wok long korona olsem: “Dispela beten bilong Korona Santu em i wanpela pasin bilong beten long maus na long tingting long ol samting hait bilong pe bilong baim bek ol man. Dispela beten i gat 15 hap i gat 10-pela 10-pela bis. Long olgeta 10-pela 10-pela bis ol man i mekim wanpela Beten Bilong Bikpela, na 10-pela Beten Bilong Maria, na wanpela Litimapim Nem Bilong Papa. Na long olgeta wan wan hap i gat 10-pela bis, ol man i mas tingim long bel wanpela samting long laip bilong Jisas olsem taim mama i karim em o em i dai long diwai.” Ol dispela samting i olsem ol bilip em ol Katolik i mas save long en, em ol samting long i stap bilong Krais Jisas, na ol hevi na pen na indai bilong em.

Buk The World Book Encyclopedia i tok: “Ol Kristen i kirap mekim sampela kain beten wantaim korona long yia 500 samting, tasol dispela pasin bilong beten i kamap long planti hap long yia 1400 i go inap 1600 samting.” Olsem wanem? Ol Katolik tasol i save mekim wok long korona? Nogat. Wanpela buk (Diccionario Enciclopédico Hispano-Americano) i tok: “Lotu Islam, na ol man i lotu long Dalai Lama, na ol Budis, ol i save mekim wok long ol kain bis olsem.” Wanpela buk (Encyclopedia of Religion and Religions) i tok: “Sampela man i ting ol Muslim i kisim Korona long ol Budis, na long taim bilong Ol Pait Bilong Lotu ol Kristen i kisim long ol Muslim.”

Sampela i tok korona em i wanpela samting bilong helpim ol long tingim ol beten taim ol i mas mekim ol narapela narapela kain beten. Tasol olsem wanem? God i amamas ol man i mekim wok long korona?

I stret ol man i mekim wok long korona o nogat, ating yumi no ken tingting planti o tok pait long dispela samting. Taim wanpela disaipel i bin askim Jisas long skulim ol long mekim prea, Jisas i bekim stret dispela askim. Tok em i mekim bai givim save long ol man i kaunim dispela nius na ating sampela bai kirap nogut long tok bilong Jisas.

[Ol Piksa long pes 3]

Ol Katolik i save mekim wok long ol bis korona. Wanem as bilong korona?