Baibel i Tok Wanem?
Yu Ting God i Save Laikim Sampela Lain Tasol?
PLANTI man i ting God i laikim lain bilong ol, winim ol narapela. Tasol sapos ol i mas kamapim samting bilong truim tok bilong ol, ol bai tok wanem? Sampela inap stori long ol bikpela samting lain bilong ol i bin mekim long bipo—olsem winim ol pait o wok bisnis samting bilong ol i go bikpela hariap. Ol inap stori tu long gutpela wok bilong ol long givim kaikai long ol lain i stap hangre, o lukautim ol man i sot long ol samting, o long ol i mekim stretpela pasin long olgeta man. Sampela i ting God i laikim kantri bilong ol, long wanem, ol i gat ol naispela maunten na wara samting.
Kain pasin olsem bilong litimapim kantri i stap long olgeta hap. Tasol olsem wanem? Baibel i tok God i laikim wanpela lain, winim ol narapela?
Wanpela Bikpela Pasin Bilong God
Bekim bilong dispela askim i klia sapos yumi save gut long wanpela bikpela pasin bilong God i Gat Olgeta Strong, em wanpela pasin Baibel i stori gut long en. Aposel 10:34 i tok: “God i save mekim wankain pasin long olgeta manmeri.” Baibel i tok tu olsem God Jehova “i no save bihainim wantok pasin” o “pasin bilong paulim kot na pasin bilong helpim ol wantok tasol.” (Lo 10:17; 2 Stori 19:7) God i no laikim tru wantok pasin, em i ting dispela pasin i wankain olsem pasin bilong paulim kot.
Tasol yu inap tingting: ‘God i bin laikim lain Israel bilong bipo, winim ol narapela lain, a? Ating dispela i soim olsem em i no save mekim wankain pasin long olgeta?’ Tru, God i bin makim lain Israel bilong bipo long kamap lain bilong em, na planti taim em i lukautim ol taim ol i gat kros wantaim sampela narapela lain. Na tu, Baibel i tok: “Em i givim tok bilong em long Jekop. Ol dispela tok na lo em i givim long ol Israel. Em i no save mekim olsem long ol arapela lain.” (Song 147:19, 20) Tasol olsem wanem? Pasin God i mekim long lain Israel i soim olsem em i save laikim sampela lain tasol? Nogat, i no olsem. Tingim tripela samting i kamapim klia dispela.
Namba wan samting, God i makim lain Israel long kamap lain bilong em bilong helpim olgeta lain man. Em i wokim kontrak wantaim tumbuna bilong dispela lain, em Abraham, na i tok: “Long rot bilong pikinini bilong yu olgeta lain bilong graun bai kisim blesing.” (Stat 22:17, 18, NW ) Em nau, God i makim lain Israel bilong kamapim “pikinini” em long rot bilong em ol blesing bai kamap. Ol dispela blesing i no bilong wanpela lain tasol, nogat, ol i bilong “olgeta lain bilong graun.”
Namba tu samting, God i no mekim gut long ol manmeri bilong lain Israel tasol. Nogat. Em i opim rot na ol manmeri bilong ol narapela lain i ken joinim lain bilong em long lotuim em. (2 Stori 6:32, 33) Planti man i laik mekim olsem na ol i kisim blesing. Wanpela meri husat i bin mekim olsem na planti ol i save long stori bilong em, em meri Moap, Rut.—Rut 1:3, 16.
Namba tri samting, lain Israel i bin stap olsem lain bilong God inap sampela haptaim tasol. Long 29 C.E., lain Israel i kamapim dispela “pikinini” em Baibel i bin tok profet long en, em Mesaia, Jisas Krais. (Galesia 3:16) Tasol ol wanples bilong Jisas i no bilip em i Mesaia. Em i tokim ol: “Harim. Nau ples bilong yupela bai i bagarap na i stap nating.” (Matyu 23:38) Bihain long dispela, God i no bin tingim sampela lain tasol na hevi bilong ol. Nogat. Em i opim rot long olgeta lain man i ken kisim ol gutpela samting. Tingim sampela samting i kamapim klia dispela.
Presen God i Givim Long Olgeta
Ofa bilong Jisas Krais long baim bek ol man em i nambawan gutpela presen God i givim long ol man. (Rom 6:23) Long rot bilong dispela ofa sin na dai bai pinis, na yumi olgeta inap kisim laip oltaim. Dispela presen i bilong wan wan man “bilong olgeta tok ples, na bilong olgeta kain skin, na bilong olgeta kantri.” (KTH 5:9) Yes, God i laik bai “olgeta manmeri i bilip” long Jisas ol bai “kisim laip i stap gut oltaim oltaim.”—Jon 3:16.
Gutnius bilong Kingdom Bilong God i givim planti blesing long ol man i putim yau long en. (KTH 14:6, 7) Gutnius i mekim na ol man inap wetim gutpela samting bai kamap bihain na gutnius i gat ol savetok i helpim ol man long stap amamas long nau. Jehova i bin stretim rot long “ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim.” (Matyu 24:14; 28:19, 20; Aposel 16:10) Dispela gutnius i stap long Baibel, em dispela buk olgeta o ol hap bilong en i stap long winim 2,300 tok ples. Jehova em i gutpela Papa na em i bin stretim rot bambai olgeta man long graun inap kisim ‘tok bilong givim laip i stap gut oltaim oltaim.’—Jon 6:68; Josua 1:8.
Ol dispela na ol narapela presen i kam long God i bilong olgeta man i ken kisim—em nau, ol man bilong olgeta lain, skin, na tok ples. Olsem na God inap blesim yumi na laikim yumi maski mama i karim yumi we o yumi bilong wanem lain.
God i Laikim Husat?
Orait yumi mas mekim wanem na bai God i ken laikim yumi? Aposel Pita i bekim dispela askim: “Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Em nau, i no inap long yumi laik save tasol long God na yumi no mekim wanpela samting. Nogat. Yumi mas laikim tru God, na pret long mekim ol samting em i no laikim. Na tu, yumi mas “mekim stretpela pasin,” olsem mekim ol samting i gutpela long ai bilong God.
Olsem: Long planti kantri i gat ol skul ol pikinini inap go long en, tasol skul bai helpim tasol ol sumatin i save givim bel long skul. Na olsem tasol, God i stap na i redi long laikim olgeta man, tasol yumi mas mekim sampela samting. Yumi mas ritim Baibel oltaim, kamapim klia olsem yumi bilip long ofa bilong Krais long baim bek ol man, na bihainim ol stiatok bilong Baibel long wokabaut bilong yumi. Sapos yumi “go klostu long Bikpela,” yumi wok long winim mak bilong stap gut long ai bilong em.—Song 105:3, 4; Sindaun 2:2-9.
[Piksa long pes 19]
God i opim rot na ol man bilong olgeta lain inap harim ‘tok bilong givim laip i stap gut oltaim oltaim’