Nius i Kam Long Olgeta Hap
◼ Planti saiklon i bin kamap long solwara Atlantik long 2005 na “yumi ken tok . . . ol i bin bagarapim tru planti samting, winim ol saiklon” ol man i save long en. Ol i raitim ripot bilong 14 saiklon, na spit bilong win bilong 7-pela bilong ol i winim 177 kilomita long wanpela aua.—U.S. NATIONAL OCEANIC AND ATMOSPHERIC ADMINISTRATION.
◼ Taim graun i guria long noten Pakistan na India long Oktoba 2005, winim 74,000 manmeri i dai.—BBC NEWS, BRITEN.
◼ Harriet i wanpela traipela trausel bilong Galápagos. Hevi bilong em inap 150 kilo. Em i dai long wanpela banis bilong ol animal long Brisbane, Australia, long Jun 2006, taim em i gat 175 krismas. Em i lapun tru, “winim olgeta animal i stap long graun.”—AUSTRALIAN BROADCASTING CORPORATION.
Hevi Bilong Lukautim Ol Samting i Dia Tumas
Ol bikman bilong Misin Katolik i no save ol bai mekim wanem bilong lukautim ol gutpela piksa samting bilong bipo i bilasim ol haus lotu bilong Peru. Insait long 6-pela yia i go pinis, ol raskol i bin tagetim 200 haus lotu. Insait long 15 yia i go pinis, long Cuzco ol raskol i bin stilim inap 5,000 gutpela samting, planti em ol piksa i gat bikpela pe. Ol man i no save hamas piksa samting i bin lus long kantri olgeta. Ol i no laik bai ol raskol i stilim ol gutpela samting bilong ol, olsem na sampela haus lotu i haitim ol dispela samting, tasol ples ol i haitim ol samting long en i no gutpela. Long wanpela haus lotu ol rat i kaikai sampela gutpela piksa bilong ol.
Finlan i Sot Long Ol Wokman
Ol faktori na bisnis samting long Finlan i sot tru long ol wokman husat i bin go long vokesenel skul na lain long mekim ol kain wok olsem, wok kapenta, plama, welda, mekenik, nes, wokim haus long brik, na yusim ol masin. Bilong wanem i olsem? Nius Helsingin Sanomat i tok, ol man i strong long go long ol bikpela skul. Heikki Ropponen (bilong lain Federation of Finnish Retailers) i tok: “I no gutpela long olgeta man i kamap ol bikpela saveman bilong atis na saiens. Yumi mas ting save ol man i kisim long ol vokesenel skul i gutpela samting.”
“Bikpela Grinpela Banis”
Ol animal i pinisim gras samting, ol man i katim na rausim bikbus, na pinisim wara bilong graun, ol dispela samting i mekim na sampela bikpela hap bilong Saina i wok long i go drai olgeta na das i pulap long en. Nius New Scientist i tok, long dispela as ol bikman bilong Saina i bin kirapim “nambawan bikpela wok bilong lukautim na stretim graun, kain bikpela wok olsem i no bin kamap bipo. Nem bilong dispela wok em ‘bikpela grinpela banis’ na ol i bin planim planti diwai tru bilong kamapim wanpela banis na bai das i no ken flai nabaut.” Ol i planim tu gras na ol liklik bus bilong strongim graun i gat planti das. Ol i kirapim dispela wok long 1978, na nau ol i mekim pinis bikpela hap bilong en. Ol i laik bai ol diwai na ol liklik bus em ol inap stap long ples drai i karamapim 35 milion hekta.
Kisim Poto Bilong Traipela Tauka
Klostu long Bonin Ailan long saut Japan, em namba wan taim ol saientis i bin kisim poto bilong traipela tauka i stap long solwara. Ol i putim ol liklik tauka na kindam long ol huk na pasim ol kamera antap long ol. Insait tru long wara, olsem 900 mita i go daun, wanpela traipela tauka i kam, longpela bilong en inap 8-pela mita.