Sampela Tok i Kam Long Olgeta Hap
Ol Nambawan Samting Bilong Kilim i Dai Man Long Amerika
Wanem ol samting i olsem nambawan samting bilong kilim i dai ol man long Amerika? Nau tasol wanpela nius (The Journal of the American Medical Association) i kamapim wanpela ripot long save ol i kisim long hamas man insait long wanpela yia, ol i dai long ol bikpela samting ol yet i save mekim na i no olsem sik ol i kisim long papamama. Ol man bilong skelim gut dispela samting i kisim save olsem: Long 1990, long Amerika, inap 2,148,000 man i bin i dai—400,000 long pasin bilong smok; 300,000 long pasin bilong tambuim kaikai bilong lusim skin na long sampela kain eksasais; 100,000 long dring; 90,000 long ol liklik binatang olsem jem; 60,000 long marasin nogut long win na wara samting, o kaikai o wara nogut; 35,000 long gan samting; 30,000 long pasin pamuk; 25,000 i kisim bagarap long ka; na pasin bilong kisim drak i kilim i dai 20,000. Dispela ripot i tok, insait long wanpela yia, 50 pesen bilong ol man i dai, ol i dai long ol dispela samting ol yet i save mekim.
Aidin Long Sol
Wanpela lain (United Nations Children’s Fund) i tok, skin bilong 600 milion man i no strong tumas, long wanem, kaikai bilong ol i sot long marasin aidin. Dispela lain i ting, long olgeta yia long dispela bikpela hap lain man, 100,000 pikinini i kisim bikpela sik taim mama i karim ol. Ol i kisim sik long glan tairoit, na dispela i mekim na skin i no go bikpela inap long mak tru bilong en, na ol i no inap wokim gut tingting bilong ol. Na skin na tingting bilong narapela 50 milion pikinini i save bagarap. Man i no save kisim marasin aidin inap long skin bilong em, em inap kisim sik goita, olsem glan tairoit bilong em i save solap. Tasol man i no ken hatwok o tromoi bikpela mani bilong helpim skin bilong em na skin i no ken sot long marasin aidin—em i mas kaikai sol i gat marasin aidin insait long en; em tasol. Long 1995, long olgeta hap, ol man i wok long putim marasin aidin long olgeta kain sol. Ol i ting, taim yia 2000 i kirap bai i no gat wanpela man i sik, long wanem, skin i sot long marasin aidin.
Ol Pikinini na Pait
Nau tasol wanpela lain long Inglan bilong helpim ol pikinini (Save the Children), i kamapim wanpela ripot. Ripot i tok, insait long 10-pela yia, bikpela hap lain ol i kisim nogut long ol pait, ol i no soldia, nogat; ol i man nating na planti bilong ol em ol pikinini. Lain Associated Press i kamapim tok bilong mausman bilong dispela lain long wanpela kantri, em i tok olsem: ‘Long olgeta 10-pela 10-pela man i kisim bagarap long taim bilong pait, 9-pela em ol man nating, na planti em ol pikinini.’ Dispela ripot i gat 25 pes bilong en, na em i kamapim ol bikpela hevi i bin painim ol pikinini insait long 10-pela yia i go pinis. Olsem: Long olgeta hap, winim 1.5 milion pikinini i bin i dai long ol pait; winim 4 milion i kisim sampela bagarap long skin, o kamap aipas, o kru bilong ol i bagarap, o han lek i tekewe; winim 12 milion i no gat haus moa; 10 milion i kamap refyuji; 5 milion i no gat rot, olsem na ol i mas sindaun long ol kem refyuji; na wan milion i bruk long famili bilong ol. Insait long 10-pela yia i go pinis, long olgeta 200 200 pikinini long olgeta hap, wanpela i bin kisim bikpela hevi em pait i as bilong en, na ol i mas kisim helpim bilong winim bikpela bel hevi bilong ol.
Stediam i “Kisim Gen Blesing”
Wanpela nius (La Repubblica) i tok, nau tasol wanpela tim bilong pilai soka long Peskara, Itali, i askim wanpela bisop Katolik long helpim ol. Inap planti taim ol i no win, na ol i ting as bilong dispela em stediam ol i pilai long en. Presiden bilong tim i les pinis long tim i no win planti taim, olsem na em i askim ol pris long kirap na mekim wanpela samting. Bipo wanpela pris i bin blesim stediam, na bihain taim tim i mekim wanpela pilai soka, ol i win. Ol wokman bilong tim, na ol man i givim bel long tim, na ol man i insait long tim—olgeta i bin go long stediam taim bisop i wokim Misa na ‘blesim gen’ dispela stediam—ol i laik tim i win. Bipo taim ol i opim dispela stediam, stediam i bin kisim blesing, tasol ‘ating dispela pasin bilong ol long tromoi liklik hap paura bilong kamapim gutpela smok smel, i no gat strong moa.’
Ol i Skelim Pasin Bilong Reip Long Ajentina
Long 1994, kirap long Janueri i go inap long Oktoba, 254 meri long wanpela provins, em Kodoba, long Ajentina, ol i bin tokaut long ol polis olsem man i bin reipim ol. Wanpela nius bilong Buenos Aires (Clarín) i tok, ripot bilong ol polis long Kodoba i ‘daunim tingting kranki bilong sampela man long pasin bilong reip.’ Ol polis i tok, yumi no ken ting olgeta man bilong reipim meri, ol i man nogut i save raun long taim bilong tudak na hait i stap. Nogat. Ripot i tok, long olgeta 10-pela 10-pela meri, 4-pela meri i painim dispela hevi long haus bilong ol yet—papa bilong ol, o waspapa, o wanpela wanblut i save reipim ol. Na ripot i tok, ‘long dispela yia, long ol dispela 254 meri em ol i bin toksave long polis olsem man i bin reipim ol, 36 pesen i bin painim dispela hevi long haus bilong ol yet; 23 pesen taim ol i lusim wanpela haus bilong danis; 13 pesen taim ol i wokabaut long rot; 10 pesen long wanpela hap graun i no gat haus; 6 pesen long wanpela hap ol i wokim haus; na 3 pesen long ples kikbal, toilet bilong bas-tesin, rum gat, na long bas taim ol i raun long wanpela longwe hap.’ Na bilong pinisim tok bilong ripot ol polis i tok, ol i painim pinis 66.54 pesen bilong ol man i bin mekim ol dispela rong.
Bikpela Grinpela Banis
Inap sampela handet yia i go pinis, Bikpela Banis Bilong Saina i no bin pasim olgeta lain ami bilong Mongol. Tasol ating nau wanpela samting i mekim na banis i kisim nem. Wanpela nius (Science News) i tok, kirap long 1950 samting i kam inap long nau, ol man i bin planim planti diwai klostu long ples wokabaut bilong dispela banis. Ol i bin planim olsem 300 milion diwai, olsem na ol man i givim hap nem long banis olsem Bikpela Grinpela Banis. I gat wanem as na ol i planim ol dispela diwai? Bilong pasim ol bikpela win. Win i save kirapim das long hap bilong ples wesan Gobi na sampela ples drai moa, na karim i kam long Saina. Wanem samting i kamap? Kirap long 1950 i go inap 1959 samting, bikpela win i bin kirapim das na karim i kam long biktaun Beijing. Dispela samting i bin kamap 10-pela i go inap 20 taim samting long olgeta yia. Olsem na 30 aua i go inap 90 aua samting long olgeta mun, ol man i no inap lukluk i go longwe—wanpela kilomita tasol. Tasol kirap long 1970 samting, bikpela win i no save kam planti taim; 3-pela o 4-pela taim tasol long olgeta yia. Na i no olsem bipo, nau long olgeta mun, inap 8-pela o 9-pela aua tasol ol man i hatwok long lukluk i go longwe. Dispela nius i kamapim tok bilong wanpela saveman olsem: Long taim bilong yumi, ating dispela ol planti planti diwai ‘i nambawan rot bilong pasim bikpela san, ren, na win.’
Pasin Bilong Lotuim Satan Long Kalabus
Ol man bilong bosim ples kalabus long Kolorado, Amerika, ol i tambuim wanpela kalabusman long mekim sampela pasin bilong lotuim Satan long rum gat bilong em. Lo bilong ples kalabus i tambuim man long lotuim Satan. Na ol man bilong bosim ples kalabus i tok, bilong lotuim Satan, kalabusman i laik kisim wanpela sotpela diwai, wanpela belo, sampela blakpela klos, ol kandel na han bilong holim ol, wanpela kain kap, na paura bilong kamapim smok smel. Tasol em inap mekim wok long ol dispela samting bilong paitim man. Tasol wanpela jas bilong kot long Denva i no wanbel long tok bilong ol. Em i tok, maski man i stap long kalabus, konstitusen bilong gavman i orait long man i lotu long laik bilong em. Na jas i tok, ol man bilong bosim ples kalabus, ol i no bihainim lo bilong konstitusen sapos ol i tambuim man long lotuim Satan. Ripot bilong wanpela lain (Associated Press) i kamapim tok bilong jas olsem: ‘Ol samting bilong Satan yumi mas givim long em.’ Dispela man i kalabus 10-pela yia, long wanem, em i bin holim na stilim wanpela man.
Ol Misin Long Hap Bilong Solwara Pasifik i Tingting Planti
Pasifik Konferens Bilong Ol Lotu long Fiji i kisim wanpela ripot i tok olsem: Ol bikman bilong ol bikpela misin i tingting planti, long wanem, ol narapela misin long hap bilong Saut Pasifik, ol i wok long i go bikpela. Ol dispela misin ol i save tingting planti long en, em misin Asembli Bilong God, Seven-De, ol Momon, ol Witnes Bilong Jehova, na lotu Bahai. Wanpela man, em Manfred Ernst, em i kamapim dispela ripot. Em i tok, inap 20 pesen bilong ol man long dispela hap bilong solwara Pasifik, ol i insait pinis long ol dispela misin. Ol bikpela misin i toktok planti na tok, ol dispela misin i pasim wok bilong gavman, long wanem, sampela bilong ol i no save insait long wok politik o insait long ol mats bilong kamapim kros. Na sampela i no laik insait long ol yunion. Wanpela nius (Mainichi Daily News) i tok: ‘Ernst i tok, nau planti man i laikim ol dispela misin; ol i les pinis long ol bikpela misin Kristen.’
Insait Long 40 Yia 80,000 Guria i Kamap
Wanpela nius (Frankfurter Allgemeine Zeitung) i tok: ‘Long ples bilong skelim strong bilong ol guria long Bensbek, klostu long Kolon [Jemani], ol saientis i save 80,000 guria i bin kamap long olgeta hap bilong graun.’ Profesa Ludwig Ahorner, bos bilong dispela ples, em i bin kamapim dispela toksave. Inap 40 yia nau ol i bin skelim ol guria. Tasol olsem wanem dispela ples bilong skelim strong bilong ol guria inap skelim ol guria i save kamap long ol narapela hap? Long wanem, ol i save mekim wok long sampela kain masin. Olsem na maski biksi long taim bilong kol i bruk long nambis long hap bilong solwara Not, em 200 kilomita longwe long Bensbek, na mekim graun i seksek liklik tru, dispela kain masin i toksave long ol saientis. Long Epril 1992, masin i bin makim wanpela strongpela guria long Jemani; i no gat narapela guria i bin kamap long Jemani i gat strong olsem dispela guria. Mak bilong strong bilong guria i olsem 5.9 long skel Rikta.