Wanpela Askim i Hatwok Long Bekim
“BILONG WANEM dispela samting i kamap?” Yumi pilim nogut tru taim wanpela i kamapim dispela askim taim bikpela pen na hevi i painim em. Planti taim ol man i kamapim dispela askim taim wanpela samting nogut i kamap, olsem: Wanpela saiklon i kilim i dai ol man na bagarapim ples. Wanpela guria i pundaunim olgeta haus long wanpela siti. Ol teroris i mekim na wanpela de nating i kamap de bilong pret na kisim bagarap. O wanpela eksiden i bagarapim o kilim i dai wanpela man yumi laikim tumas.
Sori tru, planti taim ol lain i kisim bagarap em ol lain i no gat asua na ol i no gat strong bilong lukautim ol yet. Long nau i gat planti samting nogut i bin kamap na dispela i kirapim ol man long singaut long God olsem, “Bilong wanem dispela samting i kamap?” Tingim ol dispela samting:
◼ “God, bilong wanem yu bin mekim olsem long mipela? Mipela i mekim wanem na yu no amamas long mipela?” Wanpela lain (Reuters) i kamapim nius i tok wanpela lapun meri bilong India i bin kamapim ol dispela askim taim sunami i bin bagarapim ples bilong em.
◼ “God i bin stap we? Na sapos God i save kontrolim olgeta samting, bilong wanem God i larim dispela samting i kamap?” Wanpela niuspepa long Texas, long Amerika, i kamapim ol dispela askim taim wanpela man i sut long gan long ol manmeri insait long wanpela haus lotu na kilim sampela i dai na sampela i kisim bagarapim.
◼ “Bilong wanem God i larim em i dai?” Wanpela meri i kamapim dispela askim taim pren bilong em i dai long sik kensa, na nau man bilong dispela pren i mas lukautim faipela pikinini bilong ol.
I no ol dispela manmeri tasol i gat tingting olsem God i as bilong ol hevi bilong ol. Olsem: Ol i givim askim long ol man long rot bilong Intenet na klostu 50 pesen i tok ol i bilip olsem God i as bilong ol bikpela bagarap kain olsem ol saiklon. Bilong wanem planti man i gat kain tingting olsem?
Lotu i Paul
Ol hetman bilong lotu i no kamapim ol gutpela bekim, nogat, ol i paulim ol man. Yumi skelim 3-pela bekim ol i save kamapim planti taim.
Namba wan, planti hetman bilong lotu i autim tok olsem God i salim ol bikpela bagarap bilong givim strafe long ol manmeri i bin lusim em. Olsem: Long Amerika, taim saiklon Katrina i bin bagarapim New Orleans, Louisiana, sampela pasto i tok God i mekim save long dispela siti. Ol i tok siti i pulap long korapsen, pilai laki, na pasin pamuk. Sampela i kamapim tok bilong Baibel, na stori long taim God i bin yusim bikpela tait o paia bilong bagarapim ol man nogut. Tasol kain tok olsem i paulim tru tok bilong Baibel.—Lukim blok “Yu Ting God i Kamapim?”
Namba tu, sampela pasto i tok i gat as na God i kamapim ol bikpela win na guria samting, tasol yumi man i no inap save long dispela. Planti man i no laikim dispela tingting. Ol i ting, ‘Olsem wanem God bilong pasin laikim inap kamapim ol samting nogut olsem? Na bihain em i no laik givim save long ol man em ol i laik mekim gut bel bilong ol yet na ol i laik save, “Bilong wanem dispela samting i kamap?” ’ Baibel i tok: “God yet em i as bilong dispela pasin bilong laikim ol arapela.”—1 Jon 4:8.
Namba tri, sampela hetman bilong lotu i ting God i no gat olgeta strong na em i no man bilong mekim pasin laikim. Kain tingting i save kamapim sampela bikpela askim. Olsem wanem? Man i bin “wokim olgeta samting”—olgeta sta na planet samting bilong ples antap—i no gat strong bilong pasim pen na hevi i kamap hia long dispela graun? (KTH 4:11) God em Man i bin wokim yumi bilong kamapim pasin laikim, na Baibel i kolim em olsem Man bilong pasin laikim. Olsem wanem em i no inap sori long pen na hevi i painim ol man?—Stat 1:27; 1 Jon 4:8.
Dispela 3-pela samting yumi bin stori long en em sampela tingting tasol bilong ol tingting em ol man i bin kamapim bilong bekim dispela askim “bilong wanem” God i larim pen na hevi i stap. Em wanpela askim ol man i laik save long bekim bilong en inap planti handet yia. Long stori i kamap bihain long dispela bai yumi skelim tok Baibel i mekim long dispela bikpela askim. Bai yu kisim save olsem ol gutpela tok bilong Baibel bai stretim ol dispela tok em ol man i no kliagut long en. Na tu, tok bilong Baibel i mekim gut tru bel bilong ol man em ol samting nogut i bin painim ol.
[Blok/Piksa long pes 4]
Yu Ting God i Kamapim?
Olsem wanem? Baibel i tok God em i as bilong ol bikpela win, guria, na sunami samting i kamap long nau? Nogat tru! Baibel i stori long ol samting God i bin mekim bilong givim strafe long ol man na i narapela kain long ol samting i kamap taim bikpela win o guria samting i kamap. Olsem: God i save makim stret husat bai kisim strafe; em i skelim bel bilong ol wan wan man na em i kilim i dai ol man nogut tasol. (Stat 18:23-32) Na tu, God i save salim tok lukaut pastaim, na dispela i opim rot bilong ol stretpela man long abrusim bagarap.
Tasol taim ol bikpela win na guria samting i kamap i no gat toksave o tok lukaut, na ol man nogut na ol gutpela man wantaim i kisim bagarap na i dai. Na tu, ol man yet i gat hap asua long planti bagarap i kamap, bikos ol i bagarapim graun, win na wara, na ol i sanapim ol haus long hap i gat planti guria, bikpela tait wara, na bikpela win na ren.
[Kredit Lain]
SENA VIDANAGAMA/AFP/Getty Images
[Piksa long pes 4]
Ol hetman bilong lotu i bin kamapim kain kain tok i paulim ol man