Bilong Wanem God i Larim Pen na Hevi i Stap?

SAMPELA taim man i kamapim askim​—⁠“Bilong wanem dispela samting i kamap?”​—⁠em i laik kisim bekim na sampela tok bilong mekim isi bel bilong em. Taim man i kisim pen na hevi em i gat bikpela laik long kisim sampela tok bilong mekim isi bel bilong em. Yu ting Baibel i kamapim tok i mekim isi bel bilong man? Yumi laik skelim 3-pela bikpela tok i tru bilong Baibel i stori long dispela samting.

Namba wan, i no gat rong long askim olsem bilong wanem God i larim pen na hevi i stap. Sampela i tingting planti long kamapim kain askim olsem. Ol i ting kain askim i makim olsem ol i no bilip long God o ol i no rispektim em. Tasol i no olsem. Planti gutpela man i gat gutpela bel i bin mekim wankain askim. Gutpela profet Habakuk i bin askim God olsem: “Bilong wanem yu mekim na mi mas lukim ol dispela pasin i no stret? Bilong wanem yu larim pasin pait, pasin bilong sakim lo, pasin raskol, na pasin bilong mekim nogut long narapela i kamap long olgeta hap?” (Habakuk 1:​3, Contemporary English Version) God Jehova i no bin krosim Habakuk. Nogat. Em i kirapim dispela gutpela man long raitim ol dispela askim bilong em long Baibel na bai yumi inap ritim.​—⁠Rom 15:⁠4.

Namba tu, em i bikpela samting long save olsem God i save tingim yu. Em i no stap longwe long yumi na i no olsem yumi no inap klia gut long em. Em i “laikim tumas stretpela pasin,” na em i nolaik tru long pasin nogut na ol pen na hevi dispela pasin i save kamapim. (Song 37:28; Sindaun 6:​16-​19) Long taim bilong Noa, God i pilim “bel hevi tru” bikos graun i pulap long pasin nogut. (Stat 6:​5, 6) God i no bin senis; em i gat wankain tingting long ol samting i wok long kamap long nau.​—⁠Malakai 3:⁠6.

Namba tri, God i no as bilong pasin nogut. Baibel i kamapim klia dispela poin. Ol man i nogutim nem bilong God taim ol i tok em i as bilong pasin bilong kilim man i dai na pasin teroris. Lukim tok bilong Jop 34:10: “God I Gat Olgeta Strong i no inap mekim pasin nogut. Nogat tru.” Na Jems 1:13 i tok: “Sapos samting i kirapim bel bilong wanpela man na i pulim em long mekim sin, em i no ken tok, ‘God i pulim mi long mekim dispela pasin.’ Nogat. Sin i no inap pulim God, na God i no save pulim man long mekim sin.” Olsem na sapos samting nogut i painim yu, yu ken save olsem God i no as bilong en.

Husat i Bosim Dispela Graun?

Tasol yumi gat wanpela askim yet: Sapos God em i man bilong laikim ol narapela, em i bihainim stretpela pasin tasol, na em i gat bikpela strong, bilong wanem pasin nogut i pulap tru long dispela graun? Pastaim yumi mas stretim wanpela tingting kranki planti man i gat. Planti man i ting God i Gat Olgeta Strong em i bos bilong dispela graun, na em i bosim olgeta samting. Presiden bilong wanpela semineri i tok, “God i save bosim olgeta liklik liklik samting long graun na long ples antap.” Olsem wanem? Baibel i save tok olsem?

Nogat. Planti man i kirap nogut long tok Baibel i mekim long husat i bosim dispela graun. Olsem, 1 Jon 5:19 i tok: “Dispela graun olgeta em i stap aninit long strong bilong Satan.” Jisas Krais i kolim em “hetman i save bosim dispela graun.” (Jon 14:30) Em nau, dispela i kamapim klia as na i gat planti pasin nogut i stap. Satan i mekim nogut tru long ol man na em i man bilong giaman​—⁠em ol dispela pasin i as bilong planti pen na hevi ol man i karim. Tasol bilong wanem God i larim Satan i bosim graun?

Bikpela Tok i Bin Kamap Long Gaden Iden

Gutpela papa o mama bai pilim olsem wanem sapos long ai bilong ol man wanpela man i sutim tok long em olsem em i save giamanim ol pikinini bilong em, mekim wok nogut long wok bos bilong em, na em i no givim ol gutpela samting long ol? Sapos em i paitim dispela man i mekim ol dispela tok giaman, yu ting dispela bai daunim tok bilong em? Nogat, a? Sapos em i mekim olsem ating ol man bai ting tok dispela man i sutim long em i tru.

Dispela tok piksa i helpim yumi long save long pasin bilong God Jehova long stretim dispela tok i bin kamap long gaden Iden. Long dispela hap God i bin tokaut long Adam na Iv long wanpela gutpela wok em i laik bai ol pikinini bilong Em hia long graun i mekim. Ol i mas kamap planti, go sindaun long olgeta hap na bosim olgeta samting bilong graun na mekim dispela graun olgeta i kamap wanpela paradais. (Stat 1:28) Na tu, i gat planti handet milion ensel i laik lukluk long ol samting bai kamap long dispela gutpela wok.​—⁠Jop 38:​4, 7; KTH 5:⁠11.

Jehova em i God bilong givim planti samting long man na em i bin givim Adam na Iv wanpela naispela gaden i gat ol gutpela prut i stap long en. I gat wanpela diwai tasol ol i no ken kisim prut bilong en​—⁠em “diwai bilong givim gutpela save long wanem samting i gutpela na wanem samting i nogut.” Taim Adam na Iv i no kisim prut bilong dispela diwai dispela i soim olsem ol i bilip tru long Papa bilong ol, na ol i luksave olsem i stret em yet i makim wanem samting i gutpela na wanem samting i nogut long ol pikinini bilong em.​—⁠Stat 2:​16, 17.

Tasol, sori tru, wanpela pikinini spirit bilong God i gat laik long ol man i mas lotuim em, olsem na em i tokim Iv sapos em i kaikai dispela prut tambu em i no inap i dai. (Stat 2:17; 3:​1-5) Long dispela rot, dispela ensel nogut, Satan, i tok God em i man bilong giaman! Na Satan i sutim tok long God olsem em i pasim Adam na Iv long kisim gutpela save em ol i mas kisim. Satan i laik tok olsem ol man bilong graun yet i gat rait long makim wanem samting i gutpela na wanem samting i nogut. Satan i sutim tok long God olsem em i no fit long mekim wok Bos na wok Papa, na Satan i laik tok em yet inap mekim gutpela wok moa, winim God.

Long rot bilong ol dispela tok giaman, dispela ensel i kisim nem Satan na Devil. Mining bilong dispela tupela nem i olsem “Birua” na “Man bilong bagarapim gutnem bilong narapela.” Adam na Iv i mekim wanem? Ol i go long sait bilong Satan, na ol i givim baksait long God.​—⁠Stat 3:⁠6.

Jehova inap bagarapim ol dispela bikhetman wantu tasol. Tasol, olsem tok piksa yumi kamapim, man i no inap stretim ol kain bikpela tok long rot bilong bagarapim narapela. Tingim, taim Satan i salensim God, i gat planti milion ensel i stap na harim. Bihain, bikpela namba bilong ol ensel, em yumi no inap save hamas, i bin joinim Satan long bikhet long God. Long dispela rot ol i kamap spirit nogut.​—⁠Mak 1:34; 2 Pita 2:4; Jut 6.

Bilong Wanem God i No Bin Stretim?

Satan i pulim Adam na Iv long makim olsem ol i laik kisim indipendens long Man Bilong Wokim ol. Taim em i mekim olsem, i olsem em i kamapim wanpela famili i no stap fri tru, nogat, em wanpela famili i stap aninit long wok bos bilong em. Maski ol i save long dispela samting o nogat, Satan, “papa” bilong ol, i kirapim dispela famili long makim ol samting ol yet i laik mekim na ol lo ol bai bihainim. (Jon 8:44) Tasol yu ting sapos ol i bihainim kain rot olsem ol bai stap fri tru na amamas oltaim? Jehova i save tru olsem dispela samting i no inap kamap. Tasol em i larim ol dispela bikhetlain i bihainim rot ol i makim, long wanem, long dispela rot tasol bai em i stretim ol bikpela tok i bin kamap long gaden Iden inap long olgeta taim bihain.

Inap 6,000 yia nau, ol man i bin traim kain kain gavman na ol lo bilong bosim wokabaut bilong ol yet. Olsem wanem? Yu amamas long ol samting dispela i kamapim? Ol man i stap amamas, bel isi, na wanbel? Bekim bilong dispela askim em nogat! Ol woa, bikpela hangre, bikpela win na guria samting, bikpela sik, na indai i bin mekim save long ol man. Dispela i mekim na olsem Baibel i tok, “olgeta samting i stap nogut na i save bagarap” na ol man i “pilim pen” na “krai nogut i stap.”​—⁠Rom 8:​19-​22; Saveman 8:⁠9.

Tasol sampela i kamapim askim olsem, ‘Bilong wanem God i no pasim ol samting nogut?’ Sapos em i mekim olsem dispela i no stret, na em bai paulim tingting bilong ol man, long wanem, em bai luk olsem maski ol man i bikhet long God i no gat samting nogut i painim ol. Olsem na Jehova i no pasim ol pasin raskol, pasin nogut, na ol bikpela hevi i bin kamap long ol man taim ol i bikhet long em.a Jehova i no inap helpim tok giaman bilong Satan, olsem dispela graun Satan i bosim inap stap gut na em i painim pinis rot bilong i stap amamas! Tasol i no olsem Jehova i no tingim tumas ol samting i wok long kamap. Nogat. Em i bin mekim planti samting, olsem yumi bai skelim nau.

‘Papa Bilong Mi i Save Wok Oltaim i Kam Inap Nau’

Dispela tok bilong Jisas i soim olsem God i no stap nating na lukluk tasol long ol samting i kamap. (Jon 5:17) Nogat. Kirap long taim pasin bikhet i kamap long gaden Iden na i kam inap nau em i bisi stret long mekim ol samting. Olsem: Em i kirapim ol man i raitim Baibel long kamapim promis bilong em olsem wanpela “lain” o pikinini bai kamap bihain na bagarapim Satan na ol sapota bilong em. (Stat 3:15) Na tu, long rot bilong dispela Pikinini, God bai kamapim wanpela gavman long heven, na em bai blesim ol man i save bihainim tok na pinisim olgeta samting i save kamapim pen na hevi, na pinisim dai tu.​—⁠Stat 22:​18, NW; Song 46:9; 72:16; Aisaia 25:8; 33:24; Daniel 7:​13, 14.

Bilong truim ol dispela gutpela promis, Jehova i salim i kam long graun dispela Man husat bai kamap King bilong dispela Kingdom. Dispela man em Jisas Krais, Pikinini Bilong God. (Galesia 3:16) Bilong bihainim samting God i tingting pinis long Jisas i mekim, Jisas i bin stori planti long Kingdom Bilong God. (Luk 4:43) Ol samting Krais i bin mekim long laip bilong em i olsem piksa bilong ol samting em bai mekim taim em i mekim wok King long Kingdom. Em i bin givim kaikai long planti tausen manmeri, oraitim ol sikman, kirapim bek man i dai pinis, na soim olsem em i gat pawa bilong bosim bikpela win na ren. (Matyu 14:​14-​21; Mak 4:​37-​39; Jon 11:​43, 44) Baibel i tok long Jisas olsem: “I gat planti promis bilong God i stap, na Krais i save tok ‘Yes’ long dispela olgeta promis.”​—⁠2 Korin 1:⁠20.

Ol man i harim tok bilong Jisas na ol i lusim “dispela graun”​—⁠em ol samting bilong dispela graun i stap longwe long God na Satan i bosim​—⁠Jehova i amamas long kisim ol i kam insait long famili bilong em. (Jon 15:19) Dispela famili bilong ol Kristen tru i stap long olgeta hap na pasin laikim i stiaim ol, ol i tingting strong long i stap bel isi, na ol i gat laik tru long rausim pasin bilong tingting nogut na bel nogut long wanpela lain.​—⁠Malakai 3:​17, 18; Jon 13:​34, 35.

Ol Kristen tru i no save sapotim ol samting bilong dispela graun, nogat. Ol i save bihainim tok Jisas i bin mekim long Matyu 24:​14, na ol i autim tok bilong Kingdom Bilong God. Tingim: Husat i save autim “gutnius bilong kingdom” long olgeta hap? Husat i stap olsem wanpela famili spirit long olgeta hap na ol i no insait long woa na ol hevi namel long ol kantri na ol lain? Na husat i larim Tok Bilong God i stiaim wokabaut bilong ol, maski ol man i laikim ol dispela gutpela lo o nogat? (1 Jon 5:⁠3) Planti manmeri i lukim ol Witnes Bilong Jehova i bihainim ol dispela gutpela pasin. Yu yet i ken lukim na skelim.

Makim Olsem Yu Laikim Wok Bos Bilong God!

Ol manmeri i stap longwe long God na Satan i giamanim ol, ol i kamapim pasin bilong dispela graun i save mekim ol man i stap bel hevi tru na ol i no bilip olsem gutpela samting bai kamap bihain. Ol i wok long bagarapim graun tru! Tasol Jehova i kamapim wanpela gavman long heven na dispela gavman i bin kamapim ol gutpela senis long laip bilong planti milion manmeri. Dispela i mekim na ol i gat gutpela samting tru ol i bilip na wet long en. (1 Timoti 4:10) Bai yu makim wok bos bilong husat?

Nau em i taim bilong makim, bikos God i no inap larim Satan na dispela graun bilong em long i stap oltaim. Laik bilong God long kamapim wanpela paradais hia long graun i no bin senis. Bilong inapim dispela laik, Kingdom bilong em na ol sapota bilong en bai kamap strong moa, na dispela graun Satan i bosim bai kisim planti “pen” moa i go inap God i bagarapim em. (Matyu 24:​3, 7, 8) Olsem na sapos yu bin singaut long God olsem “Bilong wanem ol dispela samting i olsem?,” orait harim tok bilong em long rot bilong bilip tru long tok Baibel i kamapim bilong mekim isi bel bilong man na long gutpela samting yumi bilip na wet long en. Long nau yet, krai sori yu mekim inap kamap olsem krai bilong amamas.​—⁠Matyu 5:4; KTH 21:​3, 4.

[Futnot]

[Ol Piksa long pes 7]

Olsem wanem? Yu amamas long ol samting wok bos bilong ol man i bin kamapim?

[Ol Kredit Lain]

Baby: © J. B. Russell/​Panos Pictures; crying woman: © Paul Lowe/​Panos Pictures

[Piksa long pes 8, 9]

Jisas bai kamapim bek Paradais​—⁠na em bai kirapim bek ol man i dai pinis