Kalipso—Narapela Kain Musik Bilong Trinidat

DISPELA STORI I KAM LONG TRINIDAT

TAIM yu harim sampela tok long Ripablik Bilong Trinidat na Tobago, yu tingim wanem samting? Planti bai tingim krai bilong ol bras ben na musik kalipso. Tru tumas, planti man tru i save long gutpela krai na narapela kain stail bilong musik kalipso, i no ol man bilong as ples tasol bilong dispela musik, em long hap saut bilong solwara Karibian.a

Buk Calypso Calaloo i tok, dispela nem kalipso inap makim “olgeta singsing ol i bin singim long ol bikpela de bilong amamas long Trinidat bihain long 1898, maski ol man i amamas na raun long rot long dispela taim ol i singim ol dispela singsing o ol man i mekim ol dispela singsing long ol ben.” Ating musik kalipso i kamap long pasin bilong sampela lain bilong Afrika long mekim ol stori na ol i bringim i kam long Trinidat long rot bilong ol slev bilong Afrika. Olsem na sampela gutpela singsing, danis, na pasin bilong paitim kundu bilong ol Afrika, na sampela samting bilong musik bilong ol Frans, Spen, Inglan, na sampela narapela lain i mekim na musik kalipso i kamap.

Yumi no save dispela nem kalipso i kamap olsem wanem. Sampela i ting em i kam long wanpela tok bilong Wes Afrika, em kaiso, na ol i mekim dispela tok long taim wanpela i mekim gutpela musik tru. Taim ol i no pinisim yet wok slev long Trinidat na Tobago long 1830 samting, ol bikpela lain manmeri i bin bung long ol bikpela bung bilong amamas bilong harim ol man i singim ol singsing bilong litimapim gutpela pasin bilong ol yet na long rot bilong singsing, narapela i tok bilas long narapela. Bilong ol man i ken save moa yet long ol, ol man bilong mekim musik kalipso, em ol i kolim ol kalipsian, ol i kisim nupela nem na stail bilong mekim musik bilong ol yet.

Stail na Strong Bilong En

Ol kalipsian ol i hapman stret long mekim ol tok bilas na tok pani insait long ol singsing bilong ol. Na tu, planti man bilong mekim ol singsing kalipso ol i save gut long kamapim ol tok bilong singsing i ron gut wantaim, na ol i putim ol tok piksa i go insait long en na ol i stret tru long ol samting ol i singsing long en. Bipo, ol man Trinidat em ol i kam long Afrika na ol i no gat gutpela sindaun tumas, ol tasol i save mekim dispela musik kalipso, tasol long nau ol man bilong olgeta kain lain, skin kala, na sindaun i mekim dispela musik.

Saveman Hollis Liverpool, bipo em i dairekta bilong kalsa bilong Trinidat na Tobago, em i man bilong raitim ol stori bilong ol samting i bin kamap bipo na man bilong mekim musik kalipso. Em i tokim nius Kirap! long pasin bilong ol kalipsian long bipo, olsem: “Bikpela samting bilong ol singsing bilong ol em ol tok pani, long wanem, ol man i kam long ol so kalipso bilong kisim amamas, harim ol tok win, na bilong save olsem ol samting ol i bin harim em i kamap tru o nogat. Ol maniman i kam bilong harim ol man nating i mekim wanem, na gavena na lain bilong em i kam bilong save ol man i gat wanem tingting long wok politik bilong ol.”

Planti taim ol kalipsian i save mekim ol singsing bilong tok bilas long ol bikman bilong gavman na ol maniman. Olsem na ol man nating i laikim tru ol kalipsian, tasol ol man i gat namba ol i ting ol i kamapim hevi tasol. Sampela taim ol kalipsian i bin kamapim ol strongpela tok bilong bagarapim ol man i gat namba, olsem na gavman kolonial i bin kamapim wanpela lo bilong kontrolim ol. Orait nau ol kalipsian i kirap singim ol singsing i gat ol tok i ken givim ol narapela narapela tingting long ol man, na ol i kamap hapman tru bilong dispela kain singsing. Ol kalipsian i save mekim yet dispela kain pasin bilong singsing.

Ol kalipsian i no save mekim wok tasol long ol tok i stap pinis, nogat, ol i save kamapim ol nupela nupela tok tu. Tru tumas, planti tok bilong ol i go insait long tok ples bilong Wes Indis. Olsem na planti manmeri, na sampela man politik tu, planti taim ol i save kamapim sampela tok bilong ol kalipsian bilong strongim tok bilong ol.

Kalipso Long Nau

Long nau planti stail kalipso i wok long kamap, em ol i bilong amamasim ol man i laikim kain kain musik. Olsem long ol narapela musik, sampela tok bilong musik kalipso i kamapim ol tok i no gutpela tumas. Olsem na i gutpela long skelim wanem kain tok yumi wok long harim. (Efesus 5:​3, 4) Yumi ken askim yumi yet, ‘Bai mi sem long kamapim mining bilong sampela tok i gat ol narapela narapela insait bilong en long ol pikinini bilong mi o long wanpela man i no save harim musik kalipso?’

Sapos yu kam long Trinidat na Tobago, bai yu amamas long ol gutpela nambis na rip, na bai yu laikim tru ol manmeri bilong dispela ailan ol i bilong kain kain lain na pasin. Na bai yu amamas long harim ol bras ben na musik kalipso​—⁠em gutpela musik ol yangpela na lapun bilong olgeta hap i save laikim.

[Futnot]

[Ol Piksa long pes 24, 25]

Ol kundu ain