Sip Bilong Noa na Pasin Bilong Wokim Ol Sip

WINIM 40 yia pinis, mi bin mekim wok olsem man bilong wokim plen bilong ol sip, na tu, mi wanpela ensinia bilong sip. Mi gat wok long wokim plen bilong ol sip em sais na stail bilong ol i narapela narapela, na mi wokim tu plen bilong ol narapela samting bilong sip olsem ensin na olgeta samting i save mekim sip i ran. Long 1963, taim mi stap long British Columbia long Kanada, wanpela Witnes Bilong Jehova i soim mi olsem Buk Stat long Baibel i tok long sip bilong Noa i olsem wanpela longpela bokis. Dispela i kirapim tru tingting bilong mi na mi ting mi mas kisim sampela save moa long en.

Stori bilong Buk Stat i soim olsem God i tingting pinis long salim bikpela tait wara i kam long graun bilong pinisim olgeta pasin nogut i stap long en. Em i tokim Noa long wokim wanpela sip, olsem traipela bokis, bilong lukautim em yet wantaim famili bilong em, na sampela bilong olgeta kain animal samting i stap long graun na bai ol i ken abrusim bagarap long taim bilong dispela Bikpela Tait. God i tokim Noa long wokim sip, longpela bilong en inap 130 mita, na braitpela bilong en inap 22 mita, na antap bilong en inap 13 mita. Olsem na em i bikpela olsem 40,000 kubik mita.

Plen Bilong Dispela Sip

Sip bilong Noa i gat 3-pela plua na dispela i strongim sip na i gat bikpela spes tru, inap olsem 8,900 skwe mita. Ol i wokim long diwai i gat wanpela kain blut i olsem glu, na wara i no inap i go insait​—⁠ating em diwai saipres​—⁠na ol i penim insait na ausait long kolta na bai wara i no ken i go insait. (Stat 6:​14-​16) Baibel i no stori long olsem wanem Noa i bin pasim ol plang wantaim. Tasol taim Baibel i no kamapim yet stori bilong Bikpela Tait, Baibel i stori long ol man bilong wokim olkain tul long bras na ain. (Stat 4:22) Tasol i kam inap long nau, taim ol i wokim sampela sip long plang, ol i save mekim wok long ol kain pin olsem nil ol i wokim long diwai.

Sip hia i gat ol rum insait, na wanpela dua long sait bilong en, na long fran na baksait rup i kain olsem ai bilong haus, na long raithan na lephan sait aninit stret long rup i gat ol windo bilong kisim win na lait. Tasol stori i stap long Buk Stat i no toktok long wanpela kil o poret, olsem nus bilong sip, o sel, o pul, o stia. Long tok Hibru ol i kolim sip bilong Noa olsem bokis, wankain olsem ol i kolim dispela basket em mama i bin haitim liklik pikinini Moses insait long en bambai em i ken trip antap long wara Nail.​—⁠Kisim Bek 2:​3, 10.

Em i Stap Gut Antap Long Wara

Longpela bilong sip i winim braitpela bilong en inap 6-pela taim, na i winim antap bilong en inap 10-pela taim. Planti sip bilong nau i wankain, olsem longpela bilong ol i winim braitpela bilong ol inap 10-pela taim, tasol taim ol i makim longpela na braitpela bilong sip, ol i tingim ensin i mas kamapim hamas pawa bilong sip i ken ran long solwara. Tasol sip bilong Noa i bilong trip tasol antap long wara. Orait em bai trip gut o olsem wanem?

Ol sip i mas i stap gut taim win na ol biksi i wok long sakim ol nabaut, na mak bilong sip, olsem longpela na braitpela na antap bilong en i mas stret wantaim bilong helpim sip long i stap gut. Baibel i stori long traipela ren i kam daun na i kamapim Bikpela Tait, na em i tok bihain God i mekim na win i ran antap long wara. (Stat 7:​11, 12, 17-​20; 8:⁠1) Baibel i no tok ol biksi i bikpela olsem wanem, o win i strong olsem wanem, tasol yumi ken ting sampela taim i gat bikpela si na strongpela win na sampela taim em i dai liklik, olsem em i save mekim long nau. Taim win i strong na i stap longpela taim, orait ol biksi bai i bikpela moa, na narapela bai stap longwe long narapela. Na tu, sapos i gat sampela guria i kamap, dispela inap mekim na ol biksi i bikpela tru na i ran strong.

Ol mak bilong sip i mekim na em i sindaun gut long wara na i no kapsait. Taim traipela biksi i kam, em inap long apim fran bilong sip i go antap na i kam daun gen na paitim strong wara, na ol manmeri na animal insait long sip bai kisim taim stret. Tasol ol i wokim sip bilong Noa na bai traipela biksi i no inap mekim olsem. Na sip i mas i gat strong tu taim traipela biksi i kam na i apim fran na stan bilong sip wantaim, na bai namel bilong sip i no ken bruk. Tasol taim traipela biksi i apim namel bilong sip na i no gat samting bilong strongim fran na stan bilong sip, ol inap krungut na i go daun. God i tokim Noa long mak bilong longpela bilong sip i mas winim mak bilong antap bilong sip inap 10-pela taim. Bihain, ol man bilong wokim sip ol i kisim save olsem dispela pasin bilong wokim sip inap mekim na taim bikpela biksi i apim sip, em bai stap gut na i no ken kisim hevi.

Ol i Stap Gut Insait Long Sip

Sip bilong Noa i kain olsem traipela bokis, olsem na em inap trip gut antap long wara. Na hevi bilong ol narapela narapela hap bilong sip i stret wantaim. Na Noa i was gut na putim olgeta kago long ples stret bilong en long sip​—⁠olsem ol animal na ol kaikai inap long skel bilong wanpela yia. Pasin bilong tingim hevi bilong en na putim stret long ol narapela narapela hap bilong sip, dispela i helpim sip long i stap gut. Olsem na i gat tupela samting i bin mekim na ol pasindia bilong sip ol i stap gut na winim Bikpela Tait​—⁠em Jehova yet i wokim plen bilong sip, na em i lukautim gut ol pasindia. Yumi ken save, God yet i mekim na bihain sip i go sindaun long wanpela gutpela hap we ol i ken i stap gut long en.

Mi bin wok long kisim save na skelim gut stori bilong dispela samting, na mi kisim tingting olsem ol tok Baibel i mekim long sip bilong Noa i stret wantaim pasin bilong nau long wokim ol sip. Tru, i gat planti samting bilong sip bilong Noa na Bikpela Tait em Buk Stat i no stori long en. Taim ol man i kirap bek pinis, mi gat laik long bungim Noa hia long graun, namel long ol manmeri na ol animal em ol i stap laip, long wanem, Noa i bin wok strong inap planti yia long wokim dispela sip bilong em. (Aposel 24:15; Hibru 11:⁠7) Pastaim bai mi tok tenkyu long em wantaim famili bilong em, na bihain bai mi givim planti askim long em.​—⁠Wanpela man i salim dispela stori i kam.

[Blok/Piksa long pes 22]

PIKSA I MAKIM SIP

Yu inap wokim na traim piksa i makim sip bilong Noa sapos yu mekim wok long piksa bilong sip ol i droim klostu. (Yu inap wokim sip i bikpela liklik sapos yu bihainim stret mak bilong en tasol mekim i go bikpela liklik.) Yu ken wokim long pepa sapos yu penim pepa olgeta long kreion o long gris bilong kandel bilong pasim wara na i no ken i go insait long pepa. Orait nau, foldim pepa long mak na pasim ol kona bilong en long glu o stikitep. Bilong sip i ken go daun liklik long wara na i no ken kapsait, pasim sampela koin long plua bilong liklik sip yu bin wokim, na larim wankain spes namel long ol, na hevi bilong ol koin i mas mekim na sip i go insait liklik long wara.

Bilong traim strong bilong sip, em inap sindaun gut long wara o nogat​—⁠pulimapim wara long wanpela bikpela dis bilong waswas na putim sip long namel bilong en. Orait bilong wokim sampela biksi, kisim wanpela katon susu o kain samting olsem, na putim long wara long arere bilong dis na wok long subim i go insait liklik long wara na mekim mekim inap long sampela liklik biksi i kamap.

[Sat]

(Bilong save ol dispela rait i stap we long pes, lukim buk o magasin)

FOLDIM FOLDIM

FOLDIM FOLDIM

[Piksa]

Longpela, braitpela, na antap bilong sip bilong Noa i wankain olsem bilong ol bikpela sip i save ron long biksolwara

[Sat/Ol Piksa long pes 20, 21]

(Bilong save ol dispela rait i stap we long pes, lukim buk o magasin)

Fran

Sait

Antap

Fran

Sait

Antap

[Ol Piksa]

Longpela bilong sip bilong Noa em 130 mita samting, klostu hap bilong longpela bilong sip “Titanic”

[Ol Kredit Lain]

Titanic plan: Courtesy Dr. Robert Hahn/www.titanic-plan.com; photo: Courtesy of The Mariners’ Museum, Newport News, VA