Rot Namba 6

Soim Olsem Yu Pilim Tingting Bilong Pikinini

Bilong wanem yu mas mekim olsem? Papamama i nambawan bikpela samting long laip bilong ol pikinini, na ol i laik bai papamama i save long ol tingting i stap long bel bilong ol. Taim ol pikinini i kamapim bel bilong ol, na sapos oltaim papamama i daunim tok bilong ol, ating bihain ol pikinini i no inap kamapim bel bilong ol long tupela, na ol bai ting ol yet i no gat save long skelim ol samting long tingting bilong ol.

Hatwok bilong en: Taim ol pikinini i kamapim bel bilong ol, sampela taim ol i save bilasim tru tok bilong ol. Tru, sampela tok pikinini i mekim, ating papamama i tingting planti long en. Olsem: Ating pikinini i bel hevi na i tok: “Mi les pinis long laip bilong mi.”a Ating wantu papamama i laik tok, “No ken tok olsem!” Sampela papamama i ting sapos ol i no traim long daunim dispela kain tingting bilong pikinini, i olsem ol i orait long en.

Wanem samting inap helpim yu? Bihainim tok bilong Baibel long “putim yau kwik long harim tok, tasol . . . no ken hariap long mekim toktok, na . . . no ken kros kwik.” (Jems 1:19) Planti gutpela wokman bilong God Jehova i bin kamapim bel hevi bilong ol, na yumi save Jehova i pilim hevi bilong ol, long wanem, em i bin putim tok bilong ol long Baibel. (Stat 27:46; Song 73:​12, 13) Tingim Jop, taim ol bikpela hevi moa yet i bin painim em, Jop i tok em i laik i dai.​—⁠Jop 14:⁠13.

Tru, sampela tingting bilong Jop i kranki na em i mas stretim. Tasol Jehova i no tok Jop i toktok nating tasol, na em i no pasim Jop long toktok. Em i mekim gutpela pasin long Jop na i larim em i kamapim ol tingting i stap long bel bilong em. Orait bihain Jehova i stretim em long gutpela pasin isi. Wanpela papa Kristen i tok: “Jehova i save larim mi kamapim olgeta tingting i stap long bel bilong mi taim mi beten, olsem na mi ting mi mas larim ol pikinini i kamapim ol gutpela tingting na ol bel hevi tu bilong ol long mi.”

Sapos bihain yu laik tokim pikinini, “Mi no ting yu bai i gat dispela kain tingting olsem yu les pinis long laip bilong yu,” tingim wanpela lo Jisas i bin autim: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Luk 6:31) Olsem: Sapos sampela i bin mekim hatpela tok long yu long ples wok o wanpela hevi i painim yu, na ating em asua bilong yu na dispela i bin kamap. Yu kamapim dispela bel hevi long wanpela gutpela pren na yu tokim em yu no inap karim hevi bilong dispela wok. Orait yu laik bai pren bilong yu i tok wanem long yu? Yu laik bai em i tok i no luk olsem yu bel hevi, na kwiktaim em i tok em asua bilong yu yet na hevi i kamap? Nogat, a? Yu laik bai em i tok: “Ating dispela i givim hevi tru long yu. Na long dispela de olgeta yu bel hevi, a?”

Ol pikinini tu i olsem. Ol inap bihainim ol tok kaunsel ol i kisim sapos ol i ting papamama i pilim tru ol tingting na bel hevi bilong ol na ol samting i givim hatwok long ol. Baibel i tok: “Man i gat gutpela tingting, em i save tingting gut pastaim na bihain em i mekim gutpela tok. Na dispela i save mekim ol man i laikim tumas long harim tok bilong en.”​—⁠Sindaun 16:⁠23.

Yu ken mekim wanem na bai pikinini i tingim gut ol tok kaunsel yu givim long em?

[Futnot]

[Rait long pes 8]

“Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin.”​—⁠Sindaun 18:⁠13