Nius i Kam Long Olgeta Hap
Bodi Inap Oraitim Em Yet
Profesa Gustav Dobos em wanpela bikpela dokta long Miners’ Hospital long Essen long Jemani, em i tok: “Inap 60 i go 70 pesen bilong ol sik i kamap long bodi bilong man, bodi yet inap long oraitim. Bilong oraitim ol sik, ol i tok bodi yet i save kamapim 30 i go 40 marasin, kain olsem kotison na ol marasin samting i pasim ol kidni ston long kamap. Ol man bilong skelim dispela samting i kliagut long sampela samting long wok bilong bodi long stretim em yet, tasol i gat planti samting ol i no save yet long en. Nius Vital i tok, ol saveman i kisim save olsem “ol homon na ol sel i save pait long ol sel i gat sik ol i wok wantaim, na tu, ol samting man i pilim long bel na tingting i helpim bodi long oraitim em yet.” Na dispela magasin i tok moa olsem sapos man i karim hevi inap longpela taim dispela inap mekim na “bodi i no gat strong long daunim sik.”
Mani Kago Ol Man i Gat i No Wankain
Nius Guardian bilong London i tok: “Inap 1 pesen bilong ol maniman i gat planti mani tru, winim ol narapela, inap 40 pesen bilong olgeta mani kago bilong graun i bilong ol. Bikpela lain bilong ol maniman tru em ol bikman bilong beng na ol bisnis i save salim ol samting bilong ol long rot bilong Intenet.” Long wanpela ripot lain Yunaitet Nesen i wokim, ol i kisim save olsem 37 pesen bilong ol maniman tru i stap long Amerika, 27 pesen i stap long Japan, na 6 pesen i stap long Inglan. Inap 50 pesen bilong ol man i stap rabis tru, na inap 1 pesen tasol bilong olgeta mani kago bilong graun i bilong ol. Duncan Green, em man i go pas long lain Oxfam long Briten, em i tok, “dispela pasin we sampela i gat planti samting tru na bikpela lain i stap rabis tru em samting nogut tru. . . . I no stret liklik long sampela man tasol i gat planti samting tru na 800 milion manmeri i stap hangre long olgeta de.”
Namba Bilong Ol Man Long Saina i Winim Ol Meri
Long 2005, long olgeta 100 pikinini meri i bon long Saina, i gat 118 pikinini man i bon. Nius China Daily i tok olsem long sampela hap bilong kantri, “long olgeta 100 pikinini meri i kamap, i gat 130 pikinini man i kamap.” Ol dokta i save skelim bebi i stap long bel bilong mama bilong save em man o meri, na sapos em pikinini meri planti mama bai rausim bel. Dispela i as na i gat planti pikinini man winim ol pikinini meri. Ol bikman i tok olsem dispela i kamap, long wanem, lo bilong Saina i tok olsem ol marit i stap long siti ol i ken kamapim wanpela pikinini tasol. Dispela nius i tok moa olsem, “long yia 2020 bai i gat 30 milion man moa winim ol meri,” na dispela samting bai “bagarapim sindaun bilong ol manmeri.”
[Blok long pes 30]
◼ Ol i wokim Baibel New World Translation of the Holy Scriptures olgeta long 43 tok ples na 3-pela long rait bilong ol aipas; Baibel New World Translation of the Christian Greek Scriptures i stap long 18 tok ples na 1-pela long rait bilong ol aipas. Long Julai 2007, ol i prinim pinis inap 143,458,577 Baibel.
◼ Long Disemba 31, 2006, namba bilong ol tok ples we ol i wokim wanpela o sampela buk bilong Baibel em 2,426—em 23 tok ples moa winim bilong las yia.—UNITED BIBLE SOCIETIES, BRITEN.
◼ Long olgeta yia ol i save wokim inap 10 i go 14 bilion katres, “em planti katres tru inap long kilim olgeta manmeri long graun inap tupela taim.”—ROYAL MELBOURNE INSTITUTE OF TECHNOLOGY, AUSTRALIA.