Yu Inap Bilip Long Tok Bilong Baibel?
‘Mi inap bilip long samting dispela man i tokim mi long en?’ Ating yu bin mekim dispela askim long yu yet taim wanpela man i laik salim wanpela olpela ka long yu o taim wanpela man bilong politik i sanap long ileksen na em i mekim ol tok promis. Yu no laik westim mani o taim bilong yu long ol tok na ol samting i no inap helpim yu.
OLSEM na ating yu laik save: ‘Baibel i gat ol gutpela tok inap tru long helpim mi? Sapos mi ritim na stadi long dispela buk, mi inap bilip tru olsem taim na hatwok bilong mi bai i no lus nating?’ Tok i stap long wanpela ves bilong Baibel i bekim ol dispela askim, olsem: “Ol samting savetingting i kamapim i soim em i gutpela o nogat.” (Matyu 11:19, Phillips) Yes, ol samting i kamap taim man i bihainim wanpela tok bilong stretim o givim “savetingting” long em, dispela i kamapim klia olsem tok i helpim tru man o nogat. Ol tok nau mipela i kamapim, em tok bilong sampela husat i bin givim taim bilong ol long lainim ol tok bilong Baibel. Tok bilong ol bai helpim yu long skelim olsem i gutpela long yu ritim na stadi long dispela narapela kain gutpela buk o nogat.
Ol Askim Long Dai na Ol Samting i Kamap Bihain Long En
Sampela taim i go pinis, mama bilong Karen i dai. Karen i save stap long Amerika, na kirap long taim em i liklik yet, em i bin bilip olsem taim ol gutpela man i dai ol i go long heven. Dispela bilip i mekim gut bel bilong em inap liklik tasol. Em i save tingting: ‘Mama bilong mi i luk olsem wanem nau taim em i stap long heven? Bai mi painim em olsem wanem taim mi go long hap, o sapos mi kamap long hap? Taim mi dai, mi inap i go stap long narapela hap?’
Karen i kirap stadi gut long Baibel wantaim ol Witnes Bilong Jehova. Em i kisim save olsem ol daiman i no stap long heven, tasol i olsem ol i slip i dai. Saveman 9:5 i tok: “Ol i no inap save long wanpela samting.” Tasol Karen inap lukim mama bilong em gen?
Tok bilong Baibel i mekim gut bel bilong em na em inap bilip na wetim gutpela samting i kamap bihain, olsem: “Yupela i no ken tingting planti long dispela tok bilong mi. Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:28, 29) Karen i kisim save olsem long rot bilong Pikinini bilong em, Man i as bilong ol tok bilong Baibel, em God, em bai kirapim bek ol daiman na bai ol i stap laip hia long graun. Em i tok: “Tok Baibel i mekim long dai na kirap bek, i klia tru na i gat as tru bilong en.”
Wanem Rot Bilong Lotuim God Em i Stret?
Taim Angela, wanpela yangpela meri bilong Romenia, em i gat 14 krismas, wanpela pasto bilong lotu Pentikostal i beten long Angela i ken kisim holi spirit, na em i kirap mekim kain kain tok ples. Tasol papamama bilong Angela i pilim olsem ol tok bilong lotu Pentikostal i no stret wantaim ol tok bilong Baibel. Dispela famili i no go moa long lotu na ol i kirap stadi long Baibel wantaim ol Witnes Bilong Jehova.
Pastaim Angela i no amamas, tasol i no longtaim em i lukim olsem pasin bilong lotu bilong em long pastaim i narapela kain long ol tok bilong Baibel. Olsem, em i ritim Jon 17:3, i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” Angela i kisim save olsem ol man husat i laik bai God i orait long ol, pastaim ol i mas kisim save long God. Em i tok: “Olsem wanem mi inap kisim spirit bilong God long kain rot olsem sapos mi no gat save liklik long em? Mi tenkyu long Jehova, long wanem, long rot bilong Tok bilong em, em i bin helpim mi long painim rot bilong lotu i tru.”
Ol Tok i Senisim Pasin
Gabriel, em wanpela man bilong India, em i tok: “Mi man bilong belhat tru. Taim ol man i skrapim bel bilong mi, mi save bikmaus, tromoi nabaut ol samting, na tok nogut na paitim ol man. Pasin bilong stadi long Baibel i bin helpim mi long bosim belhat bilong mi. Na maski sampela hevi i kamap, nau mi inap i stap isi.”
Gabriel i bin ritim kain skripsa olsem Sindaun 16:32, em i tok: “Man i no save belhat kwik, em i mekim gutpela pasin. Dispela pasin i winim pasin bilong pait strong olsem gutpela soldia. Na man i bosim gut em yet, em i winim man i pait strong na kisim wanpela taun.” Dhiraj, em narapela man i bin daunim pasin bilong belhat, em i tok: “Wankain skripsa i bin helpim mi long save olsem pasin bilong belhat kwik em i mak bilong man i no gat strongpela bel, tasol pasin bilong bosim gut belhat i soim olsem man i gat strong long bosim em yet.”
Bipo Philip i wanpela raskol long Saut Afrika. Paitim man, stil, na tok nogut, em ol pasin em i save mekim. Em i bin go kalabus long ol pasin raskol em i mekim. Tasol maski em i mekim ol dispela kain pasin, Philip i gat laik tru long kisim save long God. Bihain long em i kirap stadi long Baibel wantaim ol Witnes Bilong Jehova, em i kisim laik bilong mekim wok bilong God na em i kirap stretim ol pasin bilong em. Em i no insait moa long pasin raskol na em i lusim ol poroman nogut bilong em. Wanem ol tok i tru bilong Baibel i bin kirapim em long senisim pasin bilong em?
Ol Witnes Bilong Jehova i soim em tok bilong Jisas long Jon 6:44. Em i tok: “Papa i bin salim mi na mi kam. Na i no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” Philip i tok, “Jehova i lukim sampela gutpela pasin long mi na em i bringim mi i kam long lain bilong em, em dispela gutpela lain brata.” Na tu, Philip i pilim tru ol stori bilong Baibel olsem Jehova i save marimari long ol man husat i bel hevi long ol rong ol i bin mekim. Philip i tok: “Ol dispela stori i helpim mi long save long pasin bilong Jehova long isi long ol sinman em ol i tanim bel tru.”—2 Samuel 12:1-14; Song 51.
Wanpela yangpela man bilong Australia nem bilong em Wade, em i save dring planti na kisim drak, pilai laki, na slip wantaim planti meri. Tasol em i no stap amamas. Wanpela taim em i toktok wantaim ol Witnes Bilong Jehova na em i orait long ol i stadi wantaim em long Baibel. Wade i lainim wanem samting?
Em i tok: “Mi pilim tru pasin Jisas i mekim long ol narapela. Em i save helpim ol man, mekim pasin sori, na laikim olgeta man, na ol pikinini tu. Taim mi wok long kisim save moa long em, mi laik tru long kamap wankain olsem em. Baibel i skulim mi long rot bilong kamap man tru na long rot bilong senisim pasin bilong mi i kamap gutpela.” Tasol olsem wanem long ol pasin nogut em i bin mekim? Wade i tok moa: “Baibel i lainim mi olsem sapos mi tanim bel long ol rong mi bin mekim na senisim pasin bilong mi, God bai lusim sin bilong mi. Na mi inap i stap oltaim long Paradais long graun. Em nau, mi inap wetim gutpela taim bai kamap bihain!” (Matyu 5:5) Wade i stretim pasin bilong em na nau em i lotuim Jehova na bel bilong em i no gat tok.
Ol dispela tok nau yu ritim, em tok bilong ol man i laik senisim pasin bilong ol. Ol i stadi gut long Baibel bilong ol i ken save, ol tok bilong en inap helpim ol long winim ol hevi bilong ol na bekim ol askim bilong ol, o nogat. Ol gutpela samting i bin kamap long ol i strongim ol long bilip tru olsem ol tok bilong Baibel inap helpim man. Yu tu yu ken bilip olsem.
Wanpela tok em spirit bilong God i bin kamapim long bipo i tok: “Man i kisim gutpela tingting na save, em i ken amamas tru, long wanem, gutpela na stretpela tingting i winim tru silva na gol na ol gutpela ston i dia tumas. Na tu em i winim olgeta arapela samting yu laikim tumas. Gutpela tingting bai i helpim yu na yu inap i stap longpela taim long graun. Na em bai i givim biknem na planti samting long yu. Gutpela tingting bai i mekim yu belgut oltaim na mekim sindaun bilong yu i kamap gutpela. Gutpela tingting i olsem diwai bilong givim laip. Olsem na ol man i holimpas gutpela tingting, ol i gat laip i gutpela tru na ol i amamas.”—Sindaun 3:13-18.
[Blok/Piksa long pes 29]
BAIBEL I HELPIM WANPELA KALABUSMAN
Wanpela man nem bilong em Bill, em i marit na i stap amamas tru. Tasol marit bilong em i no winim wanpela yia, na em i go kalabus long pasin bikhet em i bin mekim sampela yia bipo.
Pastaim em i bin bel hevi tru long em i no stap fri moa, tasol bihain em i tingting strong long em i mas mekim gutpela wok long taim em i stap long kalabus. Em i tok: “Mi stap long bet bilong mi na ritim na stadi long Baibel.” Na tu, em i bihainim ol tok em i wok long lainim. “Mi save helpim na mekim gutpela pasin pren long ol wankalabus bilong mi, na ol i lukim olsem mi no laik mekim ol pasin nogut ol i save mekim. Ol i save tok long mi olsem: ‘Bill i laik mekim wok long taim bilong em long kalabus long gutpela rot, em i laik kisim save long God na long Baibel. Em bai no inap givim hevi long wanpela.’
“Mi gat gutpela nem olsem man bilong ritim Baibel, olsem na ol narapela kalabusman i no pulim mi long insait long ol tok pait bilong ol na ol narapela pasin nogut. Ol gad i lukim olsem mi no inap bikhet long ol. Olsem na ol i givim mi ol wok we klostu de olgeta mi inap stap longwe long bikpela lain kalabusman. Mi bihainim ol tok bilong Baibel na dispela i bin lukautim mi tru.”
Bill i save go long ol miting bilong ol Witnes Bilong Jehova i kamap insait long haus kalabus, na em i wok strong long tokim ol narapela kalabusman long ol samting em i wok long lainim. Em i kisim baptais na kamap Witnes Bilong Jehova taim em i stap yet long kalabus. Em i tingim laip bilong em long bipo na em i tok: “Mi bin westim pinis klostu 50 yia bilong laip bilong mi, na mi laik stretim laip bilong mi. Mi save olsem i gat wanpela rot tasol bilong kalabusman i ken mekim olsem, em i mas bihainim ol tok bilong Baibel. Na rot bilong kisim stretpela save long Baibel, em i mas stadi wantaim ol Witnes Bilong Jehova. Lotu bilong ol tasol i save skulim ol man long tok i tru bilong Baibel. I no gat narapela rot.”
Nau Bill i lusim kalabus pinis, na em i wok strong insait long wanpela kongrigesen bilong ol Witnes Bilong Jehova long Amerika. Em na meri bilong em i wok yet long stadi long Baibel na bihainim ol tok bilong en. Ol i pilim tru tok i stap long Aisaia 48:17, 18, em i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.”
[Piksa long pes 27]
Karen, Amerika
[Piksa long pes 27]
Angela, Romenia
[Piksa long pes 28]
Dhiraj, India
[Piksa long pes 28]
Gabriel, India
[Piksa long pes 28, 29]
Philip na famili bilong em, Saut Afrika
[Piksa long pes 28]
Wade, Australia