‘Em i Skulim Mipela Long Tingim Bilip Bilong Em’

WANPELA Witnes Bilong Jehova long provins Rovigo long Itali, i kisim save olsem em i gat sik kensa na dispela sik inap bagarapim em. Em i stap liklik long haus sik, na long taim em i stap long haus sik em i askim ol long no ken givim blut long em. Taim em i lusim haus sik na i stap long haus, ol nes i save kam na helpim em.

Strongpela bilip bilong dispela sikmeri i gat 36 krismas na pasin bilong em long redi long wok gut wantaim ol dokta na nes i mekim na ol i kirap nogut tru. Paslain liklik long dispela sikmeri i dai long sik kensa, wanpela nes husat i bin helpim em i raitim stori long wanpela magasin bilong ol nes long em i helpim dispela sikmeri em i kolim Angela.

“Angela i meri bilong amamas na em i gat strongpela laik long i stap laip. Em i save em i gat bikpela sik tru, na olsem yumi bai mekim, em i wok long painim wanpela marasin bilong helpim em. . . . Mipela ol nes i wok long kisim save long em isi isi. Em i no les long mipela i helpim em. Dispela i mekim na i no hatwok long helpim em. Mipela i amamas long i go helpim em, long wanem, mipela i save olsem mipela bai bungim wanpela gutpela meri na em wanpela taim we mipela olgeta i kisim helpim. . . . I no longtaim na mipela i kisim save olsem lotu bilong em bai pasim mipela long mekim ol samting long sik bilong em.” Dispela em tingting bilong dispela nes, long wanem, em i ting olsem Angela i mas kisim blut, tasol Angela i no bin kisim.​—⁠Aposel 15:​28, 29.

“Mipela i gat wok bilong helpim ol sikman, na mipela i tokim Angela olsem mipela i no wanbel long tingting bilong em, tasol em i helpim mipela, na mipela i kisim save olsem laip em i bikpela samting long em. Mipela i kisim save tu olsem lotu bilong em i bikpela samting long em na famili bilong em. Angela i no givap na larim sik i winim em. Em i gat strongpela tingting. Em i laik i stap laip na em i wok strong long mekim ol samting bilong i stap laip. Em i kamapim klia tingting na bilip bilong em. Em i gat strongpela tingting em yumi i no gat, na em i gat strongpela bilip em yumi no gat kain bilip olsem. . . . Angela i skulim mipela olsem mipela i gat wok long helpim em long rot i stret wantaim bilip bilong em long lotu, maski mipela i gat narapela tingting long pasin bilong stretim sik bilong em. . . . Mipela i bilip olsem samting Angela i skulim mipela long en i bikpela samting, long wanem, mipela i save bungim kain kain manmeri em ol i gat kain kain sindaun na lotu, na mipela inap lainim sampela samting long ol na helpim ol.”

Dispela magasin i kamapim tok bilong ol Lo Bilong Ol Nes Bilong Itali Long Stretpela Pasin Ol i Mas Mekim Long Ol Sikman, em gavman i bin orait long en long 1999, na i tok: “Taim nes i mekim wok bilong em, em i save tingim ol sikman na ol lo bilong lotu bilong ol, na stretpela pasin ol i laikim, na pasin bilong ples na ol i bilong wanem lain na ol i man o meri.” Sampela taim i hatwok long ol dokta na ol nes i rispektim bilip bilong lotu bilong ol sikman, tasol ol sikman i save pilim tru gutpela wok bilong ol dokta na nes taim ol i orait long mekim olsem.

Ol Witnes Bilong Jehova i save tingim gut ol samting ol i makim bilong mekim long skin bilong ol na ol marasin samting ol bai kisim. Ol i save tingim gut tok bilong Baibel, na olsem stori bilong Angela i kamapim, ol i no wanpela lain i bihainim sampela tingting kranki. (Filipai 4:⁠5) Long olgeta hap bilong graun, planti dokta i wok long tingim laik bilong ol Witnes long ol samting bilong blut.