God na Krais i Gat Wanem Tingting Long Ol Meri?

OLSEM WANEM yumi ken save tru long tingting bilong God Jehova long ol meri? Wanpela rot em yumi ken skelim tingting na pasin bilong Jisas Krais, em i “wankain olsem God yet” na em i kamapim stret tingting bilong God long ol samting. (Kolosi 1:15) Pasin Jisas i mekim long ol meri long taim bilong em i kamapim olsem Jehova na Jisas i rispektim ol meri, na ol i no orait long ol pasin nogut ol man i save mekim long ol meri long planti kantri long nau, nogat tru.

Olsem: Tingim dispela taim we Jisas i toktok long wanpela meri long hul wara. Gutnius Jon i Raitim, i tok: “Wanpela meri bilong Samaria em i kam bilong pulimapim wara, na Jisas i tokim em olsem, ‘Wara i kam. Mi laik dring.’ ” Jisas i amamas long toktok wantaim wanpela meri Samaria long ai bilong ol man, maski planti Juda i no save poromanim ol Samaria. Buk The International Standard Bible Encyclopedia i tok, ol Juda i ting “pasin bilong toktok wantaim wanpela meri long ai bilong ol man em samting nogut stret.” Tasol Jisas i mekim gutpela pasin na i soim rispek long ol meri, em i no gat tingting nogut long ol manmeri maski ol i bilong wanem lain o ol i man o meri, nogat tru. Namba wan taim Jisas i kamapim olsem em i Mesaia, em i kamapim long dispela meri Samaria.​​—⁠Jon 4:​7-9, 25, 26.

Long narapela taim wanpela meri i kam long Jisas em i save karim blut oltaim inap long 12-pela yia. Dispela sik i bin pinisim strong bilong em na i mekim em i sem. Taim em i tatsim Jisas, wantu em i kamap orait gen. “Jisas i tanim na i lukim em, na i tok, ‘Pikinini, bel bilong yu i ken i stap isi. Yu bilip long mi, olsem na yu kamap orait gen.’ ” (Matyu 9:22) Lo Bilong Moses i tok, kain meri olsem i no ken stap namel long ol manmeri, na i nogut moa sapos em i tatsim narapela. Tasol Jisas i no krosim em. Nogat. Long pasin sori em i mekim gut bel bilong em na i kolim em “pikinini.” Man! Dispela tok i mas mekim gut bel bilong dispela meri, a? Na Jisas i amamas tru long oraitim em!

Bihain long Jisas i kirap bek, namba wan taim em i kamap long Maria bilong Makdala na narapela disaipel bilong em, em Baibel i kolim “narapela Maria.” Jisas inap kamap pastaim long Pita, Jon, o wanpela narapela man i disaipel bilong em. Tasol nogat, em i givim ona long ol meri na larim ol i stap namba wan lain bilong lukim olsem em i kirap bek. Wanpela ensel i tokim ol dispela meri olsem ol i mas i go long ol man disaipel bilong Jisas na tokim ol long dispela narapela kain samting. Taim tupela meri i ran i go bilong tokim ol disaipel long dispela, Jisas yet i kamap long ol na i tokim ol: “Yutupela go tokim ol brata bilong mi.” (Matyu 28:​1, 5-​10) Tingting nogut bilong ol Juda long taim bilong Jisas i no stiaim tingting bilong em, olsem ol Juda i tok ol meri i no inap i stap witnes long kot.

Em nau, Jisas i no gat tingting nogut long ol meri o em i ting ol man i winim ol meri, nogat. Em i soim olsem em i rispektim ol meri na em i ting ol i gutpela samting. Pasin bilong mekim nogut long ol em i narapela kain tru long samting Jisas i skulim ol man long en, na yumi ken save olsem tingting bilong em i kamapim stret tingting bilong Papa bilong em, Jehova.

God i Lukautim Ol Meri

“Long bipo i no gat wanpela kantri long hap bilong Mediterenian o long hap bilong Esia na Afrika i larim ol meri i stap fri olsem long hap bilong Wes long nau. Ol meri i mas daun olgeta long ol man, olsem ol wokboi nating i mas daun olgeta long ol friman, na ol yangpela i stap daun long ol lapun. . . . Ol i save laikim ol pikinini man, winim ol pikinini meri, na sampela taim ol i lusim ol bebi gel i stap ausait long bikpela win na ren bambai ol i dai.” Wanpela dikseneri bilong Baibel i stori olsem long tingting bilong planti man long ol meri long bipo. Planti taim, ol meri i klostu wankain long ol wokboi nating.

Ol i bin raitim Baibel long taim ol man i gat dispela kain tingting long ol meri. Tasol maski i olsem, ol lo bilong God long Baibel i soim olsem ol meri i gutpela samting tru, na dispela tingting i narapela kain tru long tingting bilong planti lain long bipo.

Jehova i laik tru long helpim ol meri long i stap gutpela na dispela i kamap klia long ol samting em i bin mekim bilong helpim sampela meri i lotu long em. Tupela taim em i pasim rot na bai ol man i no ken bagarapim Sara, em naispela meri bilong Abraham. (Stat 12:​14-​20; 20:​1-7) God i lukim olsem Jekop i no laikim tumas meri bilong em Lea na God i helpim Lea “long kisim bel” na Lea i karim pikinini man. (Stat 29:​31, 32) Tupela meri Israel i save helpim ol meri long taim bilong karim pikinini, ol i pret long God na ol i no bihainim tok bilong king bilong Isip na kilim i dai ol pikinini man, maski tupela yet inap kisim bagarap long dispela rot. Jehova i pilim gutpela pasin bilong tupela na em i mekim gut long tupela; em i mekim tupela “i karim pikinini.” (Kisim Bek 1:​17, 20, 21) Na tu, em i harim beten bilong Hana. (1 Samuel 1:​10, 20) Wanpela profet i dai pinis em i bin kisim dinau long wanpela man, na taim dispela man i kam kisim ol pikinini bilong meri bilong profet olsem pe bilong bekim dinau, Jehova i helpim dispela meri. Em i sori long dispela meri na givim strong long profet Elisa long pulapim wel long ol sospen bilong meri bambai em i gat rot bilong bekim dinau na i gat inap wel long famili bilong em. Dispela i helpim meri long lukautim famili na lukautim gutnem bilong em.​​—⁠Kisim Bek 22:​22, 23; 2 King 4:​1-7.

Planti taim ol profet i bin tokaut olsem pasin bilong mekim nogut long ol meri o pasin bilong bagarapim ol i no stret. Long nem bilong Jehova, profet Jeremaia i tokim ol Israel olsem: “Yupela i mas mekim gutpela na stretpela pasin tasol. Sapos wanpela man i bin stilim ol samting bilong narapela man na givim hevi long en, orait yupela i mas helpim dispela tarangu na pinisim hevi bilong en. Yupela i no ken mekim nogut long ol pikinini, papa bilong ol i dai pinis, na long ol meri, man bilong ol i dai pinis, na long ol manmeri bilong narapela kantri, ol i stap wantaim yupela. Na yupela i no ken kilim nating ol manmeri long dispela ples.” (Jeremaia 22:​2, 3) Paslain long dispela, profet Maika i tok i no stret ol maniman na ol bikman bilong Israel i rausim ol meri long haus bilong ol na mekim nogut long ol pikinini bilong ol. (Maika 2:⁠9) God bilong stretpela pasin i lukim ol pen na hevi ol dispela meri na pikinini i karim na em i no orait liklik long dispela pasin nogut tru.

“Gutpela Meri”

Man i raitim Buk Sindaun i kamapim klia stretpela tingting long gutpela meri i wanem kain. Dispela gutpela stori long wok na namba bilong meri marit i stap long Baibel, olsem na yumi ken save God i orait long en. Stori hia i tok olsem ol man i no daunim dispela meri o ting em i samting nating, nogat, ol man i amamas long dispela meri, rispektim em, na bilip long em.

“Gutpela meri” em Sindaun sapta 31 i stori long em i gat strong na i givim bel long wok. Em i “amamas” long wok strong na i mekim wok bisnis, na tu, em i save lukluk gut pastaim long graun em i laik baim, na bihain em i baim. Em i samapim ol gutpela klos na salim ol. Em i givim ol let long ol bisnisman. Em i strongpela meri na i save taitim bun bilong mekim wok. Na tu, ol man i laikim gutpela-pasin-sori bilong em na ol tok bilong em i kamapim gutpela tingting na save. Olsem na man na ol pikinini man bilong em i laikim em tru, na moa yet Jehova.

Ol man i no ken daunim ol meri, bagarapim ol, o mekim nogut long ol long kain kain rot, nogat. Meri marit i mas i stap amamas na stap olsem gutpela “poroman” bilong helpim man bilong em.​—⁠Stat 2:⁠18.

Mekim Gutpela Pasin Long Ol

Taim aposel Pita i raitim tok i go long ol maritman Kristen long pasin ol i mas mekim long meri bilong ol, em i tokim ol maritman olsem ol i mas bihainim pasin bilong Jehova na Jisas Krais. Pita i tok: “Yupela ol maritman, . . . yupela i mas mekim gutpela pasin long ol [meri].” (1 Pita 3:⁠7) Insait long dispela tok mekim gutpela pasin long narapela, olsem soim ona long em, i makim olsem tingim narapela olsem em i dia tumas na rispektim em tru. Olsem na man i mekim gutpela pasin long meri, em i no save daunim meri na mekim nogut long em, nogat. Long toktok na pasin bilong em​—⁠long ai bilong ol man na long haus​—⁠em i tingim tru na laikim tru meri bilong em.

Sapos man i soim ona long meri bilong em, dispela bai mekim na marit bilong ol i stap amamas. Tingim stori bilong Carlos na Cecilia. Taim ol i marit inap sampela yia, planti taim ol i kros na tok pait na ol i no stretim dispela hevi. Sampela taim, narapela i no toktok long narapela. Ol i no save long pasin bilong stretim ol hevi bilong ol. Carlos i kros; Cecilia i strong long Carlos i mekim olgeta wok na i gat pasin antap. Tasol taim ol i kirap stadi long Baibel na bihainim ol tok ol i lainim, sindaun bilong ol i kamap gutpela. Cecilia i tok: “Mi luksave olsem ol tok na pasin Jisas i mekim i senisim pasin bilong mi na man bilong mi. Jisas i stap olsem gutpela piksa, na dispela i kirapim mi long mekim pasin daun na pilim tingting bilong narapela. Mi lain long beten askim Jehova long helpim mi, olsem Jisas i bin mekim. Carlos i lain long mekim pasin isi na bosim gut bel bilong em​—⁠na givim ona long meri bilong em olsem Jehova i laikim.”

Marit bilong ol i no gutpela olgeta, tasol ol i marit inap planti yia nau. Long ol yia i no longtaim i go pinis, ol bikpela hevi i bin painim ol​—⁠Carlos i lusim wok mani bilong em na ol dokta i mas katim na rausim kensa bilong em. Tasol ol dispela hevi i no bin bagarapim marit bilong ol, nogat, marit bilong ol i bin kamap strong moa long olgeta taim.

Kirap long taim ol man i kamap sinman, ol man bilong planti lain i bin mekim pasin i no stret long ol meri. Ol man i mekim nogut long ol meri long ol samting bilong skin, tingting, na mekim pasin sem long ol. Tasol Jehova i no laik ol man i mekim ol dispela kain pasin long ol meri. Baibel i kamapim ples klia olsem maski ol lain man i gat wanem kain tingting long ol meri, olgeta man i mas soim ona na rispek long ol meri. God i givim dispela rait long ol meri.

[Piksa long pes 4, 5]

Wanpela meri Samaria

[Piksa long pes 4, 5]

Wanpela meri i sik

[Piksa long pes 4, 5]

Maria bilong Makdala

[Piksa long pes 6]

Tupela taim Jehova i lukautim Sara

[Piksa long pes 7]

Marit bilong Carlos na Cecilia i laik bruk

[Piksa long pes 7]

Carlos na Cecilia long nau