“Wanem Samting i Kamap Long Pikinini Bilong Mi?”
Scott na Sandraa i kirap nogut tru taim pikinini meri bilong ol i gat 15 krismas i kam insait long rum. Bipo gras bilong em i yelo, tasol nau em i ret nogut tru! Toktok i kamap bihain long dispela i mekim na ol i paul moa yet.
“Mipela i bin tok orait long yu ken kalarim gras bilong yu, a?”
“Yupela i no bin tok mi no ken kalarim.”
“Wai na yu no askim mipela pastaim?”
“Bikos mi save yupela bai tok nogat!”
OLSEM Scott na Sandra bai tokaut, taim ol pikinini i yangpela olsem tineja, em taim bilong bikpela senis na hatwok—i no long ol yangpela tasol, nogat, long papamama bilong ol tu. Tru tumas, planti papa na mama i no redi liklik long ol bikpela senis i kamap long pikinini bilong ol taim em i kisim 13 krismas samting. Barbara, em wanpela mama long Kanada, i tok: “Wantu tasol, pikinini meri bilong mipela i senis. Mi tingting, ‘Wanem samting i kamap long pikinini bilong mi?’ I olsem sampela i bin kisim em i go taim mipela i slip na givim narapela pikinini long mipela!”
Dispela samting i no painim Barbara tasol. Tingim tok ol papamama long sampela hap bilong graun i tokim nius Kirap!
“Taim pikinini man bilong mi i kisim 17 krismas samting, em i senis na i strong long kamapim tingting bilong em yet na i no daun long mipela.”—Lia, Briten.
“Tupela pikinini meri bilong mipela i kirap tingting planti long ol samting, na moa yet long lukluk bilong ol.”—John, Gana.
“Pikinini man bilong mi i laik mekim ol disisen bilong em yet. Em i no laik mi tokim em long ol samting em i mas mekim.”—Celine, Brasil.
“Pikinini meri bilong mipela i no laik mipela i holimpasim em o givim kis long em olsem bipo.”—Andrew, Kanada.
“Tripela pikinini man bilong mipela i kisim pasin bilong strong long kamapim tingting bilong ol. Ol i salensim ol disisen mipela i mekim, na ol i tok pait wantaim mipela long ol dispela disisen.”—Steve, Australia.
“Pikinini meri bilong mi i haitim ol tingting i stap long bel bilong em. Em i laik stap long em yet, na em i kros long mi taim mi traim long kirapim em long toktok.”—Joanne, Meksiko.
“Ol pikinini bilong mipela i no laik tokim mipela long tingting bilong ol na ol samting ol i mekim, na ol i laik stap long ol yet tasol. Planti taim ol i laik stap wantaim ol pren bilong ol, na ol i no laik stap wantaim mipela.”—Daniel, Filipins.
Sapos yu wanpela papa o mama bilong tineja, ating yu bin mekim wankain tok olsem i stap antap. Sapos olsem, yu ken bilip tru olsem yu inap kliagut long tingting na pasin bilong yangpela pikinini man o pikinini meri bilong yu. Baibel inap helpim yu. Olsem wanem em inap helpim yu?
Wok Bilong Savetingting na Pasin Bilong Kliagut
Wanpela savetok bilong Baibel i tok: “Kisim savetingting, kisim pasin bilong kliagut long ol samting.” (Sindaun 4:5, NW ) Dispela tupela pasin i bikpela samting taim yu mekim ol samting wantaim wanpela tineja. Yu mas i gat pasin bilong kliagut long ol samting i wok long painim pikinini bilong yu na bai yu no lukluk tasol long ol pasin em i mekim. Na yu mas i gat savetingting na bai yu ken helpim gut pikinini bilong yu long kamap man o meri i gat gutpela tingting.
Yu no ken kisim tingting olsem pasin bilong yu wantaim pikinini long pas gut wantaim i wok long bagarap na long dispela as pikinini i no nidim helpim bilong yu, nogat. Ol tineja i mas i gat helpim—ol i laik bai papamama i helpim ol long dispela taim long laip bilong ol we i gat ol hatwok bilong en. Olsem wanem savetingting na pasin bilong kliagut long ol samting inap helpim yu long mekim olsem?
[Futnot]
a Mipela i senisim ol nem long ol dispela stori.