Baibel i Tok Wanem?
God i Ting Wanem Long Ol Samting Ol Man i Yusim Olsem Helpim Bilong Mekim Lotu?
Lotu Buda, Hindu, Islam, Juda, Katolik, na Isten Otodoks, ol i save mekim wok long sampela samting olsem helpim bilong mekim beten. Planti milion man long klostu olgeta kantri ol i bilip olsem kain samting olsem bai i helpim ol long beten long God na kisim ol blesing. Tasol Baibel i tok wanem?
PASIN bilong mekim wok long sampela samting olsem helpim bilong mekim beten, dispela pasin i bin kirap planti tausen yia bipo. Olsem: Long hap we Ninive bilong bipo i bin i stap long en, ol saveman i bin digim graun na painim imis bilong “tupela meri i gat wing ol i sanap na beten long diwai tambu; ol i . . . holim long [han] kais bilong ol wanpela . . . korona.”—Buk The Catholic Encyclopedia.
Wanem wok bilong korona? Dispela buk i tok: “Taim man i mas kolim kolim wanpela beten planti taim, em i save yusim wanpela samting bilong kaunim beten, dispela i winim pasin bilong kaunim long pinga ol beten.”
Sampela i save mekim wok long prea wil, em samting i olsem liklik dram na insait long en i gat ol pepa ol i raitim ol beten long en. Taim wil i tanim wanpela taim, maski em man, win, wara, o pawa i tanim em, em i wankain long kolim wanpela beten long maus. Sampela taim man i yusim prea wil, long wankain taim em i save kolim wanpela kain sotpela tok. Orait bai yumi skelim tingting bilong God long dispela pasin.
“Maski Long Mekim Planti Toktok Nating”
Jisas Krais, em planti milion man i no Kristen ol tu i save long em olsem wanpela profet bilong God, em i kamapim tingting bilong God long pasin bilong mekim planti toktok nating, olsem kolim kolim planti taim wanpela beten, na em i tok: “Taim yupela i mekim prea, maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.”a—Matyu 6:7.
God i no orait long pasin bilong “mekim planti toktok nating,” olsem kolim wankain tok planti taim. Olsem na yu ting em bai orait long pasin bilong mekim wok long wanpela bis bilong kaunim beten em ol i kolim wankain tok planti taim? I no gat wanpela tok long Baibel i stori long wanpela wokboi bilong trupela God i bin mekim wok long korona o prea wil samting bilong mekim lotu, nogat tru. Taim yu save gut long beten em i wanem samting na wanem wok bilong en, bai yu inap kliagut long as na God i no orait long dispela pasin.
Ol Beten God i Save Laikim
Long beten Jisas i mekim, em i kolim stret God olsem “Papa bilong mipela.” Em nau, Man Bilong Wokim yumi em i no olsem wanpela bikman i stap longwe tru em yumi mas mekim isi bel bilong em long rot bilong kolim wankain tok planti planti taim, o mekim wanpela kain pasin bilong lotu, nogat. Em i wanpela Papa i gat pasin laikim, na em i laik bai yumi luksave long dispela na laikim em tru. Jisas i tok: “Mi laikim tru Papa.” (Jon 14:31) Wanpela profet bilong Israel long bipo, em tu i bin tok: “Bikpela, yu papa bilong mipela.”—Aisaia 64:8.
Olsem wanem yumi ken i go klostu long God olsem Papa bilong yumi long heven? (Jems 4:8) Bilong pas gut wantaim wanpela pren, yumi save toktok long em na em i toktok long yumi. Na i wankain tu long God. God i save “toktok” long yumi long rot bilong Baibel, em i kamapim long yumi ol wok na pasin bilong em, na ol samting em i tingting pinis long mekim bilong helpim yumi. (2 Timoti 3:16) Na yumi save toktok long God long rot bilong beten. Kain beten olsem em yumi pilim tru long bel na i kamapim olsem yumi pas gut wantaim em, na yumi no ken kolim nating nating o kolim wankain tok tasol.
Tingim dispela samting: Insait long wanpela famili em ol i gat pasin laikim, yu ting ol pikinini i save toktok wantaim papamama olsem wanem? Yu ting ol bai kolim wankain tok o wanpela hap tok planti taim, o yusim wanpela samting bilong kaunim hamas taim ol i mekim dispela tok long papamama? Ating nogat, laka? Ol bai toktok gut long pasin rispek na kamapim ol tok i stap long bel bilong ol.
Yumi mekim wankain pasin taim yumi beten long God. Yumi inap toktok wantaim God long planti samting em yumi tingting planti long en. Filipai 4:6, 7 i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi . . . bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” Taim yumi tingting planti long wanpela samting, ating yumi save beten planti taim long dispela samting. Tasol dispela i no wankain long pasin bilong kolim kolim wankain tok planti taim.—Matyu 7:7-11.
Long Baibel i gat planti ol gutpela beten em God i amamas long en. Ol song, na tu, ol beten bilong Jisas, ol tu i insait long ol dispela beten.b (Song 17 na 86, tok i go pas; Luk 10:21, 22; 22:40-44) Wanpela beten bilong Jisas i stap long Jon sapta 17. Kisim sampela minit na ritim. Taim yu mekim olsem, tingim pasin bilong Jisas long kamapim bel bilong em long God. Lukim tu pasin bilong em long dispela beten, em i no tingim em yet tasol—beten bilong em i kamapim olsem em i laikim tru lain bilong em. Em i tok: “Papa, . . . lukautim ol, na man nogut [Satan] i no ken bagarapim ol.”—Jon 17:11, 15.
Olsem wanem? Yu lukim wanpela samting long tok bilong Jisas i kamapim olsem em i bihainim nating wanpela pasin bilong lotu taim em i beten? Nogat tru! Jisas i makim gutpela pasin tru yumi ken bihainim, laka? Em nau, olgeta man i laik go klostu long trupela God ol i mas kisim stretpela save long em. Na pasin laikim ol i kisim long rot bilong dispela save bai kirapim ol long sakim ol kain pasin bilong lotu na ol narapela pasin em God i no laikim. Jehova i tok long ol dispela man olsem: “Bai mi stap Papa bilong yupela, na yupela bai i stap pikinini bilong mi.”—2 Korin 6:17, 18.
[Ol Futnot]
a Long dispela prea, Papa Bilong Mipela, Jisas i no tok: “Yupela i mas mekim dispela prea,” nogat. Sapos em i tok olsem, dispela tok bai pait wantaim narapela tok bilong em i stap long Matyu sapta 6 ves 7. Tasol em i tok: “Yupela i mas mekim kain prea olsem.” (Matyu 6:9-13) Em i laik skulim yumi long wanem samting? Olsem dispela beten i kamapim, ol samting bilong lotuim God i mas i stap nambawan long ol samting bilong skin.
b Tru, ol song em ol singsing ol i save mekim long ol narapela narapela bung, tasol ol dispela song i no olsem ol beten em ol i save kolim wankain tok planti planti taim, o kolim taim ol i mekim wok long korona o prea wil, nogat.
YU LAIK SAVE?
◼ Olsem wanem? Tok Jisas i mekim long no ken mekim planti toktok nating long beten, dispela tok i stret tu long pasin bilong mekim wok long korona na prea wil samting?—Matyu 6:7.
◼ Beten bilong yumi i mas kamapim klia yumi gat wanem kain tingting long God?—Aisaia 64:8.
◼ Sapos yumi sakim ol tok giaman bilong lotu, God bai ting olsem wanem long yumi?—2 Korin 6:17, 18.