Baibel i Tok Wanem?
Mama i Karim Jisas Long Wanem Taim?
WANPELA buk (Encyclopedia of Early Christianity) i tok: “I no gat wanpela man i save long de stret em mama i bin karim Krais.” Tasol planti milion man long olgeta hap bilong graun em ol i tok ol i Kristen, ol i save bung na tingim Disemba 25 olsem de mama i bin karim Jisas. Tasol i no gat wanpela hap bilong Baibel i kolim dispela det. Olsem wanem? I tru mama i bin karim Jisas long Disemba?
Baibel i no kolim wanpela de stret olsem betde bilong Jisas, tasol em i kamapim samting i soim olsem mama i no bin karim em long Disemba. Na tu, long stori bilong sampela buk bilong graun yumi inap save long as na ol i makim Disemba 25 bilong tingim betde bilong Jisas.
Bilong Wanem Jisas i No Kamap Long Disemba?
Mama i karim Jisas long Betlehem, em taun bilong ol Juda. Gutnius Luk i Raitim i tok: “Long dispela hap sampela wasman bilong sipsip i stap ausait long taun, na ol i was long ol sipsip bilong ol long nait.” (Luk 2:4-8) Em pasin bilong ol. Wanpela buk (Daily Life in the Time of Jesus) i tok: “Inap planti mun long yia ol sipsip i mas i stap ausait.” Tasol yu ting ol wasman bilong sipsip bai i stap wantaim ol sipsip bilong ol ausait long taim bilong kol long nait long mun Disemba? Dispela buk i tok moa olsem: “Long taim bilong kol, ol i save stap insait long ol haus bilong sipsip; na dispela i soim olsem de ol i makim bilong tingim Krismas long taim bilong kol, em i no stret, long wanem, Gutnius i tok ol wasman bilong sipsip ol i bin stap ausait long ol ples i gat gras.”
Dispela tingting i stret wantaim narapela stori i stap long Gutnius Luk i Raitim, olsem: “Long dispela taim Sisar Ogastus i putim wanpela lo long ol i mas kisim nem bilong olgeta manmeri. Dispela em i namba wan taim gavman i kisim nem bilong ol, na long dispela taim Kwirinius i stap namba wan gavman bilong provins Siria. Olsem na olgeta manmeri i go long as ples bilong ol, bai gavman i ken kisim nem bilong ol.”—Luk 2:1-3.
Ating Ogastus i putim dispela tok bilong mekim sensas, na dispela bai helpim em long stretim ol samting long wok bilong baim takis na singautim ol man bilong insait long ami. Bilong bihainim dispela singaut Maria i bihainim man bilong em, Josep, na ol i wokabaut inap 150 kilomita samting long Nasaret i go long Betlehem, maski taim bilong Maria long karim pikinini i klostu. Orait skelim dispela samting. Yu ting Ogastus, em man i no save insait tumas long wok gavman bilong ples—inap tokim ol manmeri em ol i tingting pinis long bikhet long gavman Rom—long ol i mas mekim dispela raun long taim nogut bilong bikpela kol?
Planti saveman bilong raitim stori bilong ol samting i bin kamap bipo na ol saveman bilong Baibel, ol i tok Disemba 25 em i no betde bilong Jisas. Yu inap painim dispela stori long ol buk ensaiklopidia, sapos yu gat. Wanpela buk (Our Sunday Visitor’s Catholic Encyclopedia) i tok: “Planti man i wanbel olsem mama i no bin karim Jisas long Disemba 25.”
As na Ol i Makim Disemba 25
Planti handet yia bihain long taim Jisas i dai pinis, ol i bin makim Disemba 25 olsem betde bilong em. Bilong wanem? Planti saveman i bilip olsem dispela taim ol i bin makim bilong mekim Krismas, bipo ol haiden i bin mekim ol bung na amamas bilong ol long dispela taim.
Olsem, buk Encyclopædia Britannica i tok: ‘Long planti hap ol man i bilip long Disemba 25, long wanem, ol Kristen i bin kisim na bihainim pasin bilong mekim dies solis invicti nati (‘betde bilong San’), em bikpela holide bilong Gavman Rom bilong amamasim taim bilong san i laik kamap strong gen, na taim bilong kol i laik pinis.’
Buk The Encyclopedia Americana i tok: “As na ol i makim Disemba 25 bilong mekim Krismas, dispela i no klia. Tasol planti man i tok, ol i makim dispela de na bai em i stret wantaim ol bikpela de bilong ol haiden long bung long taim bilong kol na amamas long san i sanap longpela taim, na long ‘san i laik kamap strong gen.’ . . . Saturnalia Bilong Rom (em bikpela de bilong tingim Saturn, em god bilong ol gaden, na amamas long san i kisim gen strong), i kamap tu long dispela taim.” Ol man i insait long ol dispela kain bung ol i mekim pasin pamuk, kain kain pasin nogut na bikmaus nabaut. Ol dispela kain pasin i save kamap long planti pati bilong Krismas long nau.
Rot Bilong Givim Biknem Long Krais
Sampela i pilim olsem, maski mama i karim Jisas long wanem de tru, i gutpela ol Kristen i mas tingim betde bilong Jisas. Long tingting bilong ol, taim ol man i bihainim stretpela pasin bilong tingim kain bikpela de olsem, dispela em i gutpela rot bilong givim biknem long Krais.
Stori bilong mama i bin karim Jisas em i wanpela bikpela samting long stori bilong Baibel. Baibel i tok taim mama i karim Jisas, wantu planti ensel i kamap na ol i amamas na i litimapim nem bilong God, na ol i tok: “Litimapim nem bilong God i save stap antap tru. Na long graun ol manmeri i ken stap bel isi. God i belgut long ol.” (Luk 2:13, 14) Tasol i no gat wanpela hap bilong Baibel i tok yumi mas bung na amamasim betde bilong Jisas. Tasol i gat wanpela lo i tok yumi mas tingim indai bilong em, na ol Witnes Bilong Jehova i save mekim olsem long wanpela taim long olgeta yia. (Luk 22:19) Em wanpela rot bilong givim biknem long Jisas.
Long laspela nait bilong Jisas long graun, em i tok: “Sapos yupela i mekim olsem mi bin tokim yupela, orait yupela i stap pren bilong mi.” (Jon 15:14) Na tu, em i tok: “Sapos yupela i laikim mi tru, orait yupela bai i bihainim gut ol tok bilong mi.” (Jon 14:15) Tru tumas, nambawan gutpela rot bilong givim biknem long Jisas Krais, em long kisim save long tok bilong em na bihainim.
YU LAIK SAVE?
◼ Bilong wanem mama i no bin karim Jisas long Disemba?—Luk 2:1-8.
◼ Wanem samting i bikpela samting moa, winim de mama i karim man?—Saveman 7:1.
◼ Wanem nambawan rot bilong givim biknem long Jisas?—Jon 14:15.
[Rait long pes 11]
Baibel i kamapim klia olsem mama i no bin karim Jisas long Disemba
[Piksa long pes 10]
Yu ting ol wasman bilong sipsip bai i stap ausait long nait wantaim ol sipsip long taim bilong sno?
[Kredit Lain]
Todd Bolen/Bible Places.com