Yumi Mas Mekim Wanem Bilong Tingim Jisas Krais?

Jisas Krais em “wanpela man i bin stiaim tingting bilong planti man, winim olgeta man i bin stap long graun.”​—⁠“The World Book Encyclopedia.”

OL MAN i gat nem long mekim bikpela wok, ol manmeri i save tingim ol samting ol i bin mekim. Olsem na taim ol man i tingim Jisas, bilong wanem planti ol i save tingim taim mama i bin karim em, na ol i no tingim ol samting em i bin mekim? Long olgeta kantri bilong Kristendom, klostu olgeta man ol inap kolim stori bilong ol samting i bin kamap taim mama i karim Jisas. Tasol hamas man i save tingim ol gutpela tok em i bin mekim long Bikpela Tok Long Maunten na wok strong long bihainim ol dispela tok?

Tru, taim Maria i karim Jisas, dispela i narapela kain tru, tasol ol disaipel bilong pastaim ol i ting ol samting em i bin mekim na ol tok em i bin skulim ol man long en, dispela i bikpela samting moa. Yumi save, God i no bin tingim taim mama i karim Jisas i bikpela samting moa, winim ol samting Jisas i mekim taim em i kamap bikpela man pinis. Tasol Krismas na ol stori nating bilong taim Maria i karim Jisas, dispela i bin mekim na ol pasin tru bilong Krais i no save stap ples klia.

Na i gat narapela samting bilong Krismas yumi tingting planti long en. Sapos Jisas i kam bek long graun long nau, em bai ting olsem wanem long bikpela bisnis ol man i wokim long ol samting bilong Krismas? Inap tu tausen yia i go pinis, Jisas i bin i go long tempel long Jerusalem. Em i belhat stret taim em i lukim ol man bilong senisim mani na ol man bilong wok bisnis long salim ol samting ol i kisim bikpela winmani long rot bilong bikpela de lotu bilong ol Juda. Em i tokim ol: “Kisim ol pisin bilong yupela i go. Yupela i no ken mekim haus bilong Papa bilong mi i kamap olsem haus bilong maket.” (Jon 2:​13-16) Em nau, i klia tru olsem Jisas i no orait long bungim wok bisnis wantaim lotu.

Planti Katolik long Spen ol i tingting planti long pasin bilong wokim bisnis long ol samting bilong Krismas. Tasol taim yumi tingim as bilong planti pasin ol i mekim long Krismas, yumi no kirap nogut long dispela pasin bilong wokim bisnis long en. Man bilong raitim nius, em Juan Arias, em i tok: “Planti man insait long lotu Kristen i toktok planti long ‘pasin haiden’ i kam insait long Krismas na em i kamap olsem taim bilong kisim amamas tasol na baim ol samting, na lotu i olsem nambatu tasol. Tasol ol i no save, planti samting ol i mekim bilong makim taim Jisas i kamap, as bilong dispela em planti samting ol haiden bilong Rom i bin mekim long bikpela de [bilong san].”​—⁠El País, Disemba 24, 2001.

Nau long dispela taim, planti niusman na bikpela buk dikseneri bilong Spen ol i bin toktok long pasin haiden em i as bilong ol amamas samting ol i save mekim long Krismas na pasin bilong wokim bisnis long en. Buk Enciclopedia de la Religión Católica i stori long de ol i makim bilong mekim Krismas na i tok: “I luk olsem Misin Bilong Rom i makim dispela de bilong mekim Krismas, long wanem, em i laik putim ol bikpela de Kristen i olsem senis bilong ol bikpela de haiden. . . . Yumi save, long Rom long dispela taim bipo, ol haiden i bin makim Disemba 25 olsem bikpela de bilong natalis invicti, em betde bilong ‘san i gat bikpela strong.’ ”

Buk Enciclopedia Hispánica em tu i tok: “Dispela de Disemba 25 bilong mekim Krismas, ol i no kisim long rot bilong skelim stret taim bilong betde bilong Jisas, nogat. Ol i kisim dispela de long taim ol i senisim ol bikpela de bilong taim bilong kol em ol i bin mekim long Rom, na mekim i kamap bikpela de bilong lotu Kristen.” Ol Rom i bin mekim wanem kain amamas long taim san i kam antap long skai long taim bilong kol? Ol i save kaikai planti, na mekim ol pati na amamas, na narapela i givim presen long narapela. Ol bikman bilong misin ol i no laik pinisim dispela bikpela de bilong amamas em ol man i save laikim tru, olsem na ol i mekim i kamap “Kristen” na kolim olsem betde bilong Jisas, na i no betde bilong san.

Long ol yia namel long 300 na 500, ol man i strong long lotuim san na mekim ol pasin bilong dispela lotu. “Santu” Augustine (354-​430 C.E.) bilong Misin Katolik em i bin tokim ol wanlotu long ol i no ken mekim ol pasin long Disemba 25 olsem ol haiden i bin mekim bilong givim biknem long san. Long nau tu, i olsem ol bikpela de bilong ol Rom bilong bipo i stap olsem nambawan long tingting bilong ol man.

Gutpela De Bilong Mekim Ol Amamas na Bisnis

Insait long planti handet yia, i gat sampela samting i mekim na Krismas i kamap wanpela bikpela de ol lain bilong olgeta hap i save mekim ol samting bilong amamas na bilong kisim mani long en. Na tu, ol pasin ol i bin mekim long ol narapela bikpela de long taim bilong kol, olsem ol bikpela de bilong ol lain long noten Yurop, isi isi ol i kisim i kam insait long dispela bikpela de i bin kirap pastaim long Rom.a Na long taim bilong yumi, ol man bilong salim ol samting na ol saveman bilong bisnis ol i wok long kamapim strong olgeta pasin bilong ples em ol inap kisim bikpela winmani long en.

Orait wanem samting i kamap long dispela? Pasin bilong tingim de mama i bin karim Jisas em i kamap nambawan bikpela samting, na ol i no tingim bikpela samting dispela i makim. Na taim ol man i mekim Krismas, i olsem ol i no kolim moa dispela nem Krais. Nius El País bilong Spen i tok: “[Krismas] em i wanpela bikpela de bilong olgeta hap, olsem bikpela de bilong ol famili, na olgeta wan wan i save mekim ol samting long dispela de ol i ting i gutpela long mekim.”

Dispela tok i kamapim klia wanpela pasin i wok long kamap strong long Spen na long planti ol narapela kantri. Ol man i wok long tromoi bikpela mani moa bilong baim ol samting bilong Krismas, tasol save bilong ol long Krais i wok long go liklik. I klia tru olsem olkain amamas samting ol i mekim long Krismas i wankain olsem long taim bilong ol Rom​—⁠ol i bin mekim ol kain kain amamas na pati nabaut, na mekim bikpela kaikai, na narapela i givim presen long narapela.

Wanpela Pikinini Man i Kamap Pinis Long Yumi

Orait sapos Krais i no insait long ol samting bilong Krismas, ol Kristen tru i mas mekim wanem bilong tingim taim mama i bin karim Krais na i stap bilong em long graun? Inap 700 yia samting paslain long taim Jisas i kamap, Aisaia i tok profet long em olsem: “Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi.” (Aisaia 9:⁠6) Bilong wanem Aisaia i kamapim olsem taim Jisas i kamap, na ol wok em bai mekim, dispela i bikpela samting tru? Long wanem, Jisas bai kamap wanpela strongpela king. Em bai i gat nem olsem King bilong kamapim gutpela sindaun na bel isi, na gutaim na wok king bilong em bai i no ken pinis. Na tu, Jisas bai mekim wok king long “gutpela na stretpela pasin tasol, na dispela pasin bilong en bai i mekim em i stap strongpela king.”​—⁠Aisaia 9:⁠7.

Ensel Gebriel i mekim wankain tok olsem Aisaia taim em i tokim Maria long em bai karim Jisas. Ensel i tok: “Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.” (Luk 1:​32, 33) Em nau, bikpela samting tru bilong Jisas em dispela wok Krais bai mekim olsem King bilong Kingdom Bilong God. Wok king bilong Krais bai helpim gut olgeta man​—⁠na yu tu wantaim ol famili bilong yu. Ol ensel i bin tokaut olsem Jisas bai “kamapim bel isi long graun long olgeta manmeri [God] i belgut long ol.”​—⁠Luk 2:​14, Today’s English Version.

Yumi olgeta i laik i stap long graun i gat bel isi na stretpela pasin long en, a? Tasol bilong i stap long dispela taim bilong bel isi em wok king bilong Krais bai kamapim, yumi mas mekim ol samting God i laikim na pas gut wantaim em. Jisas i tok, namba wan samting yumi mas mekim bilong pas gut wantaim God, em yumi mas kisim save long God na Krais. Jisas i tok: “Bilong kisim laip i stap oltaim oltaim, ol i mas wok long kisim save long yu, yu wanpela tasol yu God tru, na long man yu bin salim i kam, em Jisas Krais.”​—⁠Jon 17:​3, NW.

Taim yumi save gut long Jisas, bai yumi no gat wok long tingting long em i laik bai yumi tingim em olsem wanem. Yu ting em i laik bai yumi kaikai, na dring, na narapela i givim presen long narapela long dispela wankain de bipo ol haiden i bin mekim bikpela bung na amamas long en? Nogat, a? Long nait paslain long taim em i dai, Jisas i tokim ol disaipel long samting em i laikim. “Man i kisim lo bilong mi na i bihainim gut, dispela man em i laikim mi tru. Na man i laikim mi, Papa bilong mi bai i laikim em. Na mi tu bai mi laikim em.”​—⁠Jon 14:⁠21.

Ol Witnes Bilong Jehova i bin wok strong long stadi long Baibel, na dispela i helpim ol long save gut long ol lo bilong God na Jisas. Ol bai amamas long helpim yu long save gut long ol dispela bikpela lo na bai yu ken tingim Jisas long pasin i stret long mekim.

[Futnot]

[Blok/Ol Piksa long pes 6, 7]

Ating Baibel i No Orait Long Mekim Bikpela Kaikai na Givim Presen?

Pasin Bilong Givim Presen

Baibel i orait long pasin bilong givim presen. Baibel i tok Jehova yet em Man Bilong Givim “olgeta gutpela samting yumi save kisim na olgeta presen i gutpela tru.” (Jems 1:17) Jisas i bin soim olsem ol gutpela papamama i save givim presen long ol pikinini bilong ol. (Luk 11:​11-13) Taim sik bilong Jop i pinis, ol pren na famili bilong em ol i givim presen long em. (Jop 42:11) Tasol taim ol i givim presen, i no olsem ol i mas mekim long wanpela bikpela de bilong kaikai na amamas, nogat. Bel bilong ol i kirapim ol long givim presen.​—⁠2 Korin 9:⁠7.

Ol Bung Bilong Famili

Ol bung bilong famili inap mekim famili i stap wanbel, na moa yet sapos ol wan wan bilong famili i no sindaun moa wantaim. Jisas wantaim ol disaipel ol i bin go long wanpela kaikai bilong marit long Kana, na yumi ken ting em i bikpela bung i gat planti famili na pren long en. (Jon 2:​1-10) Na long tok piksa bilong Jisas long pikinini i bin lusim papa, taim pikinini i kam bek papa i wokim bikpela kaikai bilong famili, na i gat musik na danis tu.​—⁠Luk 15:​21-25.

Kisim Gutpela Kaikai

Planti taim Baibel i stori long ol wokman bilong God i bung wantaim famili, o ol pren, o ol wanbilip na ol i kisim gutpela kaikai. Taim 3-pela ensel i kam lukim Abraham, em i wokim bikpela kaikai bilong ol, i gat abus, susu, bata, na bret. (Stat 18:​6-8) Na Solomon i tok, pasin bilong “kaikai na dring na amamas” i olsem presen God i givim yumi.​—⁠Saveman 3:13; 8:⁠15.

Em nau, yumi save God i laik bai yumi bung wantaim ol pren na famili na kisim gutpela kaikai, na em i orait long pasin bilong givim presen. Na yumi gat planti rot bilong mekim olsem long wanem wanem taim insait long yia yumi laikim.