Wanpela Nupela Pikinini Yumi Mas Tingim

‘Long dispela de wanpela meri i karim pikinini. Em i Bikpela, na em i man God i makim bilong kisim bek ol manmeri.’​—⁠Luk 2:⁠11.

INAP olsem tu tausen yia i go pinis, wanpela meri long taun Betlehem i karim pikinini man. I no planti man bilong dispela taun i save long bikpela samting bilong dispela pikinini. Tasol sampela wasman bilong sipsip em ol i stap ausait long nait na was long ol sipsip bilong ol, ol i lukim bikpela lain ensel na i harim ol i singsing olsem: “Litimapim nem bilong God i save stap antap tru. Na long graun ol manmeri God i belgut long ol, ol i ken i stap bel isi.”​—⁠Luk 2:​8-14, NW.

Orait nau ol dispela wasman i go painim Maria na man bilong em, Josep, long wanpela haus bulmakau, olsem ol ensel i bin tokim ol. Maria, em i givim nem Jisas long pikinini, em i bin slipim pikinini long bokis kaikai bilong bulmakau. (Luk 1:31; 2:12) Orait nau, inap olsem tu tausen yia bihain, planti manmeri bilong graun i tok ol i save bihainim Jisas Krais. Na ol samting i kamap long taim Maria i karim Jisas, dispela i stap olsem as bilong wanpela stori ol man i bin kolim planti taim moa yet i kam inap nau, winim olgeta narapela stori.

Kantri Spen i bihainim lotu Katolik inap planti handet yia pinis na ol i gat ol bikpela de ol i kisim long ol tumbuna, olsem na ol i bin kamapim kain kain pasin bilong tingim dispela bikpela nait long Betlehem.

Krismas Ol i Mekim Long Spen

Long Spen, kirap long yia 1200 samting, long ol bikpela de bilong ol, planti taim ol i save wokim ol piksa bilong pikinini Jisas na ol narapela samting ol i tok i bin kamap long dispela taim. Planti famili ol i save wokim piksa bilong bokis kaikai bilong bulmakau em Maria i bin slipim Jisas long en. Na ol i wokim liklik piksa bilong ol wasman bilong sipsip na 3-pela saveman bilong hap sankamap (sampela i kolim olsem “3-pela king”), wantaim Josep, Maria na Jisas. Sampela taim long Krismas ol i save wokim ol piksa i bikpela olsem man na sanapim long ai bilong ol bikpela haus bung bilong gavman. Ol i ting Francis bilong Assisi i bin kirapim dispela pasin long Itali bilong stiaim tingting bilong ol man i go long stori bilong Baibel long taim Maria i bin karim Jisas. Bihain wanpela lain bruder i kirapim dispela pasin long Spen na long planti ol narapela kantri.

Ol dispela saveman bilong hap sankamap ol i bikpela samting insait long ol bung bilong Krismas long Spen, wankain olsem Santa Klaus long ol narapela kantri. Ol i bilip olsem ol pikinini long Spen i save kisim presen long ol dispela saveman long Janueri 6, Día de Reyes (De Bilong Ol King), olsem ol dispela saveman i bin mekim long nupela pikinini Jisas. Tasol i no planti man i save, Baibel i no stori long hamas saveman i bin kam lukim Jisas. Na ol i no king, nogat. Ol i olsem man bilong lukluk long ol sta bilong kisim save long ol samting bai kamap.a Na tu, bihain long taim ol i kam lukim Jisas, Herot i laik kilim i dai Jisas, olsem na em i kilim olgeta pikinini man long Betlehem “i no winim tupela krismas yet.” Dispela i makim olsem ol dispela man i kam lukim Jisas planti mun bihain long taim mama i karim em.​—⁠Matyu 2:​11, 16.

Kirap long yia 1100 samting, long sampela taun long Spen ol i save wokim pilai bilong taim Maria i karim Jisas, na ol wasman bilong sipsip i go long Betlehem, na bihain ol dispela saveman i kam lukim Jisas. Long nau, long Janueri 5 long planti taun bilong Spen, ol i save sanap long lain na wokabaut long rot na i gat dispela “3-pela king” i stap long ol longpela karis olsem ka ol i bilasim gut tru na i ran long ol rot insait long taun, na ol i givim loli long ol lain i sanap lukluk. I gat ol bilas na singsing bilong Krismas bilong amamasim ol manmeri.

Planti famili bilong Spen i save mekim bikpela kaikai long de paslain long Krismas. Sampela kaikai em turrón (ol switpela kaikai ol i wokim long amon wantaim hani), na ol grep na ol narapela pikinini bilong diwai ol i bin mekim drai, na sipsip ol i kukim long aven, na ol abus bilong solwara. Ol lain bilong famili, maski ol i sindaun long ol longwe hap, ol i save kam bung wantaim long dispela de. Long narapela bikpela kaikai, long Janueri 6, famili i save kaikai roscón de reyes, em raunpela skon bilong “ol King” i gat liklik piksa olsem man i hait insait long en. Ol i bin mekim kain pasin olsem long taim bilong ol Rom, na sapos wanpela wokboi nating i bin kisim hap skon i gat dispela liklik piksa insait long en, em i ken i stap olsem “king” inap wanpela de.

‘Taim Bilong Bikpela Amamas na Wok’

Sampela lain i gat ol pasin bilong ples long mekim Krismas, tasol nau long olgeta hap Krismas i kamap olsem nambawan bikpela de bilong amamas. Buk The World Book Encyclopedia i stori long Krismas olsem em “taim bilong bikpela amamas na bikpela wok long ol milion milion Kristen long graun na long sampela lain i no Kristen.” Yu ting dispela em i gutpela samting?

Yumi save, taim Maria i karim Krais dispela i bikpela taim tru. Ol ensel i bin tokaut long en olsem samting bai mekim “ol manmeri God i belgut long ol, ol i ken i stap bel isi,” olsem na em i bikpela samting long yumi ol man.

Tasol Juan Arias bilong Spen, em man bilong raitim nius, em i tok: “Long taim bilong ol Kristen bilong pastaim, ol i no save wokim bung i gat ol piksa bilong makim taim Maria i bin karim Jisas.” Sapos olsem, orait ol i bin kisim we dispela pasin ol i mekim long Krismas? Wanem gutpela rot bilong tingim taim mama i bin karim Jisas na i stap bilong em long graun? Long stori i kamap bihain long dispela, bai yumi painim bekim bilong ol dispela askim.

[Futnot]