Bilong Wanem Sampela Man i No Save Selebretim Krismas?

Long olgeta hap bilong graun, inap olsem 2 bilion manmeri i selebretim Krismas long Disemba 25, na inap olsem 200 milion ol arapela i selebretim betde bilong Jisas Krais long Janueri 7. Tasol i gat planti milion narapela tu em ol i no laik insait liklik long pasin bilong selebretim Krismas. Bilong wanem?

Ating lotu bilong ol i no hap bilong lotu Kristendom. Olsem, ating ol i bilong lotu Juda, Hindu o Sinto. Ol arapela, olsem ol man i tok i no gat God i stap, ol tisa bilong lotu giaman, ol man em ol i save bihainim tingting bilong ol yet, o ol man bilong helpim ol narapela man, ol i tok stori bilong Krismas em i wanpela stori nating.

Tasol planti manmeri husat i bilip long Jisas ol i sakim ol pasin bilong Krismas. Bilong wanem? I gat 4-pela risen na ol i mekim olsem.

Namba 1: Ol i no bilip olsem Jisas i bin bon long Disemba o Janueri. Baibel i no kolim det stret we mama i karim Jisas. Baibel i tok: “Long dispela hap tu i gat ol wasman bilong sipsip ol i stap ausait na was long ol sipsip bilong ol long nait. Na wantu ensel bilong Jehova i kam sanap klostu long ol, na . . . ensel i tokim ol: ‘. . . Tude . .  wanpela meri i karim pikinini, em Seivia bilong yupela, em i Krais na em i Bikpela.’”—Luk 2:8-11.

I gat planti samting i kamapim klia olsem mama i bin karim Jisas long kirap bilong mun Oktoba taim ol wasman bilong sipsip i stap ausait long nait wantaim ol sipsip bilong ol. Mun Disemba na Janueri em taim bilong bikpela kol tru long Betlehem na long ol ples i stap klostu. Olsem na ol wasman i save bringim ol i go insait long ol haus na bai ol sipsip i no ken kol long nait.

Namba 2: Wanpela bung tasol em Jisas i bin tokim ol disaipel bilong em long mekim, em long tingim indai bilong em na i no betde bilong em, na ol i mas mekim olsem long rot bilong wanpela kaikai bilong bung wantaim. (Luk 22:19, 20) Tingim tu olsem Gutnius Bilong Mak na Jon i no stori liklik long betde bilong Jisas.

Namba 3: I no gat ol stori bilong bipo i soim olsem ol Kristen bilong pastaim i bin selebretim betde bilong Jisas. Tasol ol i bin mekim bung bilong tingim indai bilong Jisas. (1 Korin 11:23-26) Bipo i no gat pasin bilong tingim Krismas, tasol inap 300 yia bihain long Jisas i dai, ol Kristendom i kirap long tingim Krismas long Disemba 25. Long yia 1650 samting, gavman bilong Inglan i kamapim wanpela lo i tambuim pasin bilong selebretim Krismas long Inglan. Long Amerika, Kot Bilong Massachusetts i mekim wankain samting. Bilong wanem? Buk The Battle for Christmas i tok: “Baibel na ol samting i bin kamap bipo i no stori liklik olsem mama i bin karim Jisas long Disemba 25.” Buk i tok moa olsem, ol Puritan i tingim “Krismas olsem wanpela bung bilong ol haiden em sampela man i mekim i kamap olsem bung bilong ol Kristen.”

Namba 4: Dispela bung i kirap long ol pasin haiden. As tru bilong Krismas em pasin haiden bilong ol Rom long mekim olkain bung bilong onarim god Saten bilong mekim ol kaikai i kamap na god bilong san em Sol Invictus o Mitra. Saveman Christian Rätsch na savemeri Claudia Müller-Ebeling em ol i bin helpim long raitim buk Pagan Christmas, i tok: “Wankain olsem planti ol kastam na ol bilip i bin stap paslain long taim bilong ol Kristen, olpela bung em bipo ol i save mekim long olgeta yia bilong tingim san i kamap strong gen, nau ol i makim dispela bung bilong tingim de mama i karim Krais.”

Olsem ol tok i stap antap i kamapim, yu inap luksave long as na ol Kristen tru i no selebretim Krismas, a?