Nius i Kam Long Olgeta Hap

◼ Strong bilong mani long Simbabwe i go daun inap 2.2 milion pesen, olsem na bilong karim dispela hevi, long Ogas 2008, ol i tekewe tenpela siro long ol pepa mani. Olsem na strong bilong pepa mani bilong ten bilion dola i kamap olsem strong bilong wanpela “simdola.”​—⁠AGENCE FRANCE PRESSE, SIMBABWE.

◼ “Ol sik bilong tingting i kisim klostu 12 pesen bilong ol manmeri long olgeta hap bilong graun.”​—⁠WORLD FEDERATION FOR MENTAL HEALTH, AMERIKA.

◼ “65 pesen bilong ol draiva na ol pasindia husat i dai long ol rot bilong Grik em ol lain husat i no save pasim sialet o helmet.”​—⁠EIKONES, GRIK.

◼ “Mipela i bungim bikpela hevi tru [ol hevi bilong wok politik long Jojia] . . . God i stap wantaim mipela na Virgo Maria i lukautim [mipela], tasol wanpela samting i mekim mipela i tingting planti tru​—⁠lain Otodoks bilong Rasia i wok long tromoi bom long lain Otodoks bilong Jojia.”​—⁠GEORGIAN CATHOLICOS PATRIARCH ILLIA NAMBA 2.

“Ol Haus Karim” i Lukautim Laip

Kantri Peru i wok strong long daunim namba bilong ol mama i wok long i dai. Bilong kirapim ol meri Andis long kisim gutpela helpim long klinik na ol i no ken karim bebi long haus, ol i wokim 390 “haus karim” long Peru insait long tenpela yia i go pinis. Bel mama na famili bilong em inap stap long wanpela bilong ol dispela haus i go inap long taim bilong em long karim. Ol dispela haus karim i stap klostu long klinik. Ripot bilong nius Reuters long Cuzco i tok, wanpela naispela samting long ol dispela klinik em olsem, ol i bungim “ol marasin bilong nau wantaim pasin bilong ples” olsem, ol mama bai “sanap na karim.” Dispela pasin i “daunim pen na helpim mama long karim kwik . . . na mama inap lukim gut bebi, winim taim em i slip long bet na karim.”

Yusim Mobail Long Daunim Pasin Raskol

Planti manmeri moa i save yusim mobail fon long ringim Polis Dipatmen Bilong New York. Ol nupela save i opim rot long salim teks mesis long polis. Niuspepa The New York Times i tok: “Ol i kirapim ol manmeri long yusim mobail fon long kisim ol piksa na vidio bilong raskol pasin na salim i go long polis.” Niuspepa i tok ol i wok long mekim sampela samting bambai ‘wanpela lain [Real Time Crime Center] bilong daunim pasin raskol inap salim ol piksa i go long ol ka i patrol i stap long hap we pasin raskol i kamap long en.’

Ol Kiau Bilong Pukpuk i Toktok

Nius The Times bilong London i tok: “Ol bebi pukpuk i save toktok long narapela narapela taim ol i stap yet insait long kiau,” na dispela i helpim ol long makim wanem taim ol bai brukim kiau na kam ausait. Ol i bin rekodim toktok bilong ol bebi pukpuk bilong wara Nail taim ol i stap yet insait long kiau. Na ol i pilaim ol dispela toktok long sampela kiau. Ol bebi pukpuk insait long ol dispela kiau ol i harim dispela toktok na ol i seksekim kiau bilong ol planti taim moa, winim ol bebi pukpuk husat i no harim dispela toktok. Nius i tok moa olsem: “Ol bebi pukpuk husat i harim nois bilong ol narapela bebi pukpuk, ol i skelim gut taim na olgeta i brukim kiau bilong ol 10-pela minit bihain long narapela narapela.” Ol kiau em ol i no harim wanpela nois o ol i harim planti kain kain nois, ol i no skelim gut wanem taim ol bai brukim kiau.