Rot 5: Isi Long Ol

“Yupela i mas isi isi long olgeta man na larim ol i lukim dispela gutpela pasin bilong yupela.”​​—⁠Filipai 4:⁠5.

Mining bilong dispela. Long ol famili i stap gut wantaim, man na meri i save lusim tingting long ol popaia bilong poroman. (Rom 3:23) Ol i no putim ol strongpela lo tumas long ol pikinini, na ol i no larim ol i bihainim laik bilong ol yet tasol. Ol i no save putim planti tumas lo bilong haus. Na taim i gat wok long stretim ol pikinini, ol i mekim long “stretpela pasin tasol.”​—⁠Jeremaia 30:⁠11.

As na em i bikpela samting. Baibel i tok ‘ol man i kisim gutpela tingting i kam long God, ol i save isi long ol man.’ (Jems 3:17) God yet i no strong long ol man bilong graun i mas mekim ol pasin i stret olgeta, olsem na bilong wanem bai tupela marit i strong long poroman i mas mekim ol pasin i stret olgeta? Sapos ol marit i toktok planti oltaim long ol liklik liklik popaia, ol bai bel nogut na i no stretim pasin bilong ol. Mobeta yumi tingim dispela tok i tru: “Planti taim yumi save . . . popaia.”​—⁠Jems 3:⁠2.

Ol gutpela papamama i save isi long ol pikinini bilong ol. Ol i no save stretim ol long hatpela pasin, olsem “bos nogut” i mekim. (1 Pita 2:18) Ol yangpela i kamapim klia olsem ol i mekim gut sampela wok, papamama i save larim ol i stap fri long mekim sampela samting. Papamama i no ting ol i mas bosim olgeta liklik liklik samting ol yangpela i laik mekim. Wanpela buk i tok, sapos papamama i laik bosim olgeta samting long i stap bilong ol yangpela, papamama bai lusim bikpela strong, tasol bai i no gat gutpela samting i kamap long en.

Traim mekim olsem. Mekim wok long ol askim i stap daunbilo bilong skelim pasin bilong yu long isi long famili.

◼ Wanem laspela taim yu bin mekim gutpela tok amamas long poroman?

◼ Wanem laspela taim yu bin sutim tok long poroman?

Pasim tok long bel. Sapos yu bin hatwok long bekim namba wan askim hia, tasol yu no hatwok long bekim namba tu askim, orait tingim wanpela mak bilong winim, olsem yu isi moa long ol narapela.

Toktok wantaim poroman long ol samting yutupela i pasim tok long bel long mekim.

Tingim sampela samting yu inap larim yangpela i mekim sapos em i bin kamapim klia olsem em i mekim gut sampela wok.

Toktok gut wantaim yangpela long wanem taim stret em i mas i kam bek long haus.

[Piksa long pes 7]

Olsem draiva husat i tingting gut, famili i isi long narapela ol i redi long givim rot long narapela