Baibel i Tok Wanem?

YU LAIK bai tineja bilong yu i kamap wanem kain?

A. Wankain olsem yu.

B. Bikhet pikinini husat i no laik tru long kamap wankain olsem yu.

C. Man o meri husat inap mekim gut ol wok bilong em na wokim ol gutpela disisen.

Sampela papamama bai makim C, tasol pasin ol i mekim i soim olsem ol i laikim A. Ol i strong long pikinini i mas bihainim laik bilong ol, olsem ol i tokim pikinini long wanem wok em mas makim. Wanem samting i kamap? Taim em i kamap bikpela, em i mekim samting i narapela kain olgeta long laik bilong papamama. Planti papamama i laik bai pikinini i mekim samting em A i makim, tasol pikinini i mekim samting B i makim.

As na Pasin Bilong Bosim Olgeta Liklik Samting i No Wok

Yu laik bai pikinini i kamap man o meri husat inap mekim gut ol wok bilong em na wokim ol gutpela disisen. Olsem wanem yu inap winim dispela mak? Yumi kliagut olsem pasin bilong bosim olgeta liklik samting bilong pikinini i no inap wok. Tingim tupela as na i olsem.

1. Pasin bilong bosim olgeta samting i no stret wantaim Baibel. God Jehova i wokim ol man bilong i stap fri long bihainim laik bilong ol yet. Em i larim ol man long makim rot ol i laik bihainim, maski em i gutpela o nogut. Olsem, taim Kein i belhat tru na i laik kilim brata bilong em Abel, Jehova i tokim em: “Sapos yu mekim gutpela pasin, orait bai yu amamas, long wanem, mi orait long ofa bilong yu. Tasol sapos yu mekim pasin nogut, orait sin bai i redi long bagarapim yu. Sin i gat bikpela laik tru bilong winim yu. Tasol yu mas strong na winim em.”​—⁠Stat 4:⁠7.

Jehova i tokaut klia long Kein, tasol em i no subim Kein long bihainim tok bilong Em. Kein yet i mas makim olsem em bai bosim belhat bilong em o nogat. Yumi kisim wanem skul? Jehova i no save bosim olgeta liklik samting ol man i laik mekim bilong fosim ol long bihainim tok bilong em. Na yu tu i no ken mekim olsem long ol pikinini bilong yu.a

2. Pasin Bilong Bosim Olgeta Liklik Samting i Kamapim Narapela Samting Olgeta. Tingim olsem wanpela wokman bilong stua i strong long yu mas baim wanpela samting. Taim em i mekim olsem yu tu i strong long sakim em. Maski yu nidim dispela samting, ating pasin bilong em i mekim na yu les. Yu laik lusim em tasol.

Wankain samting inap kamap sapos yu strong tumas long tineja i mas bihainim ol lo bilong yu long stretpela pasin, kisim wankain tingting olsem bilong yu, na winim ol mak yu putim. Yu ting pikinini bai wanbel long dispela? Ating nogat! Pasin yu mekim bai kamapim narapela samting olgeta, em bai kirapim pikinini long les long ol lo bilong yu. Taim papamama i traim long bosim olgeta liklik samting, planti taim dispela i no save wok. Orait yu ken mekim wanem samting?

I no gutpela long traim bosim olgeta samting bilong tineja, na fosim em long bihainim ol lo bilong yu long stretpela pasin olsem yu bin mekim taim em i liklik. Mobeta yu helpim em long luksave olsem em i savetingting long bihainim pasin i stret. Olsem: Sapos yu wanpela Kristen, soim em olsem pasin bilong bihainim ol stiatok bilong God bai givim bikpela amamas long em inap oltaim.​—⁠Aisaia 48:​17, 18.

Taim yu mekim olsem, yu yet i mas stap olsem gutpela piksa. Yu mas mekim ol pasin em yu laik bai tineja i kisim. (1 Korin 11:⁠1) Tokaut klia long em long ol lo bilong stretpela pasin em yu save bihainim. (Sindaun 4:11) Sapos tineja i kisim pasin bilong laikim God na ol lo bilong em, em bai wokim ol gutpela disisen, maski sapos yu stap o nogat.​—⁠Song 119:97; Filipai 2:⁠12.

Skulim Pikinini

Olsem pes 2 bilong dispela magasin i kamapim, wanpela taim bai i kamap​—⁠long tingting bilong yu ating dispela taim bai kamap wantu tasol⁠—​na pikinini bilong yu i bikpela pinis bai “lusim papamama.” (Stat 2:24) Ating yupela papamama i laik bai em i gat save long mekim sampela kain wok taim em i bikpela pinis. Tingim sampela pasin na wok em yu ken helpim pikinini long kisim taim em i stap wantaim yu.

Ol Wok Bilong Haus. Olsem wanem? Tineja bilong yu inap kukim kaikai?, wasim na ainim ol klos?, klinim na stretim gut ol samting long rum bilong em? mekim sampela wok bilong stretim na lukautim ka? Taim pikinini man o meri i lain long mekim ol kain wok olsem, bihain em bai inap long lukautim ol samting long haus bilong em yet. Aposel Pol i tok: “Mi lain pinis olsem maski mi stap olsem wanem, samting mi gat em inap long mi.”​—⁠Filipai 4:⁠11.

Stap Gut Wantaim Ol Narapela. (Jems 3:17) Tineja bilong yu i save pren gut wantaim ol narapela o nogat? Sapos i gat kros i kamap, em inap stretim long gutpela pasin? Yu bin skulim em long rispektim ol manmeri na stretim ol hevi long pasin isi? (Efesus 4:​29, 31, 32) Baibel i tok: “Yupela i mas givim ona long olgeta kain man.”​—⁠1 Pita 2:⁠17.

Bosim Gut Mani. (Luk 14:28) Olsem wanem? Yu inap helpim pikinini long lainim wanpela wok, basetim gut mani, na no ken dinau? Yu skulim em long seivim mani na bai em inap baim ol samting em i nidim na no ken baim nating nating ol samting, na amamas long ol samting em i gat pinis? (Sindaun 22:⁠7) Pol i tok: “Sapos yumi gat kaikai na laplap na haus samting, orait yumi ken ting ol dispela samting em inap long yumi.”​—⁠1 Timoti 6:⁠8.

Ol tineja husat i lain long bihainim ol lo bilong stretpela pasin na ol i save long mekim ol wok, ol i redi long mekim ol samting bilong ol man o meri i bikpela pinis. Ol papamama bilong ol i winim pinis mak ol i putim!​—⁠Sindaun 23:⁠24.

[Futnot]

YU BIN TINGIM DISPELA?

● Olsem papa o mama, yu laik winim wanem mak?​—⁠Hibru 5:⁠14.

● Taim pikinini bilong yu i kamap bikpela, em bai gat wok long mekim wanem ol samting?​—⁠Josua 24:⁠15.

[Ol Piksa long pes 25]

Yu laik bai tineja bilong yu i kamap wanem kain?

Wankain olsem yu . . .

Bikhet pikinini . . .

Man o meri i bikpela pinis na inap mekim gut wok