Yu Inap Mekim Gut Wok Olsem Papa o Mama Wanpis

NAMBA bilong ol famili we i gat papa na mama i stap wantaim em i wok long i go daun. Tingim: Long Amerika i gat winim 13 milion papa o mama wanpis, planti bilong ol em ol mama wanpis. Ol wok painimaut i soim olsem inap 50 pesen bilong ol pikinini long Amerika bai stap inap sampela yia wantaim papa o mama wanpis.

Sapos yu wanpela papa o mama wanpis, yu ken save tru olsem famili bilong yu i ken stap gutpela. Traim long bihainim ol dispela tok daunbilo.

◼ No ken mekim ol tok i daunim yu. Baibel i tok: “Man i sot long ol samting, em i stap nogut na i gat bikpela hevi oltaim. Tasol sapos em i man bilong belgut na amamas, orait olgeta de i olsem de bilong pati.” (Sindaun 15:15) Tru, ating laip bilong yu i no olsem wanpela pati. Tasol olsem dispela ves i kamapim, sindaun bilong yumi i no mekim yumi stap amamas, nogat, pasin bilong holim gutpela tingting i helpim yumi long stap amamas. (Sindaun 17:22) Sapos yu tingting olsem ol pikinini bilong yu i no inap kamap gutpela o sindaun bilong famili bilong yu i bagarap pinis, dispela i no inap kamapim gutpela samting. Ol kain tingting olsem bai daunim yu na bai yu hatwok moa long mekim wok papa o mama bilong yu.​​—⁠Sindaun 24:⁠10.

Samting yu ken mekim: Raitim lista long ol tok yu save mekim bilong stori long sindaun bilong yu, na klostu long en raitim ol gutpela tok i senisim tok yu save mekim. Olsem, senisim tok “Dispela i hatwok tumas long mi” wantaim dispela tok “Mi inap mekim wok bilong mi olsem papa o mama wanpis, na mi inap kisim helpim mi nidim.”​​—⁠Filipai 4:​13.

◼ Basetim mani bilong yu. Mani em samting i save putim hevi long ol papa o mama wanpis​​—⁠na moa yet long ol mama wanpis. Tasol sampela taim man inap stretim hevi bilong mani long rot bilong basetim gut mani. Wanpela savetok bilong Baibel i tok: “Man i gat gutpela tingting, em i save olsem, hevi i laik kamap long em na em i abrusim.” (Sindaun 22:⁠3) Bilong abrusim “hevi” bilong mani, em i bikpela samting long tingting gut pastaim na plenim ol samting.

Samting yu ken mekim: Wokim baset na raitim long pepa ol samting yu save baim insait long wanpela mun na skelim olsem yu save tromoi mani long wanem ol samting. Skelim gut pasin bilong yu long yusim mani. Yu save kisim planti tumas dinau? Yu save baim ol samting long ol pikinini na bai ol i no ken bel hevi olsem papa o mama i no stap wantaim ol? Sapos ol pikinini bilong yu i bikpela liklik, sindaun na toktok wantaim ol na skelim wanem ol rot yupela i ken bihainim bilong seivim mani. Dispela bai skulim ol gut. Na ating ol i gat sampela gutpela tingting bilong helpim famili!

◼ Mekim pasin isi long poroman marit bilong yu long bipo. Sapos yu na poroman bilong yu long bipo i senis senis long lukautim ol pikinini, yu mas save olsem sapos yu toknogutim poroman bilong bipo long ai bilong pikinini​​—⁠o yu yusim pikinini olsem spai bilong painimaut ol samting poroman bilong bipo i save mekim​​—⁠dispela bai kamapim ol samting nogut.a Mobeta yu wok gut wantaim poroman bilong bipo long sait bilong stretim ol pikinini na long ol narapela samting we inap helpim ol pikinini long stap gut. Baibel i tok: “Oltaim yupela i mas painim rot bilong i stap wanbel wantaim olgeta man”​​—⁠na dispela i makim tu poroman marit bilong yu long bipo.​​—⁠Rom 12:⁠18.

Samting yu ken mekim: Taim tok pait i kamap, mekim pasin long poroman bilong bipo olsem yu save mekim long wanwok bilong yu. Long ples wok, yu wok strong long mekim gutpela pasin long olgeta, na tu, long ol lain yu no save laikim tumas. Mekim wankain pasin long poroman bilong yu long bipo. Ating yutupela i no inap wanbel long olgeta samting, tasol no ken larim dispela i kamapim ol bikpela tok pait.​​—⁠Luk 12:⁠58.

◼ Stap olsem gutpela piksa. Askim yu yet: ‘Mi laik bai ol pikinini bilong mi i kisim wanem kain tingting na pasin? Mi yet i save kamapim ol dispela kain tingting na pasin?’ Olsem, yu save stap amamas, maski yu wanpela papa o mama wanpis? O yu larim sindaun bilong yu i mekim na yu ting olgeta samting long laip bilong yu i nogut tasol? Yu save bel nogut yet long pasin em poroman bilong bipo i bin mekim long yu? O sapos em i mekim pasin i no stret long yu na yu no inap stopim dispela, yu inap daunim bel hevi bilong dispela samting? (Sindaun 15:18) Tru, dispela i hatwok, na bai yu popaia taim yu traim long winim dispela hevi. Tasol ol pikinini bilong yu bai lukim tingting na pasin yu kamapim na ol bai bihainim pasin bilong yu.

Samting yu ken mekim: Raitim long pepa tripela pasin em yu laik bai olgeta wan wan pikinini bilong yu i kamapim taim ol i kamap bikpela.b Klostu long en, raitim ol samting yu inap mekim long nau bilong stap olsem gutpela piksa na i helpim ol pikinini bilong yu long kisim ol dispela pasin.

◼ Lukautim yu yet. Yumi save bisi, olsem na em isi tru long yu no tingim tumas strong bilong skin na bel bilong yu. No ken larim dispela i kamap long yu! Em i bikpela samting tru long yu mas lukautim yu yet na bai yu no sot “long ol samting bilong God”! (Matyu 5:⁠3) Tingim​​—⁠ka i no gat petrol bai no inap ron. Yu tu i no inap mekim gut wok bilong yu sapos yu no lusim hap taim bilong “kisim petrol,” olsem kisim nupela strong.

Na tu, i gat “taim bilong lap” na “taim bilong singsing.” (Saveman 3:⁠4) Yu no westim taim sapos yu painim sampela amamas. Dispela i givim nupela strong long yu na bai yu inap mekim yet wok bilong yu olsem papa o mama wanpis.

Samting yu ken mekim: Toktok wantaim ol arapela papa o mama wanpis long olsem wanem ol i save lukautim ol yet. Taim yu skelim gut wanem ol samting i bikpela samting, yu ting yu inap lusim sampela hap taim long olgeta wik long mekim samting yu save amamas long mekim? (Filipai 1:​10) Raitim long pepa ol samting yu laik mekim na long wanem taim yu inap mekim.

[Ol Futnot]